Sabta 5

1 Ata volea daa laviage da dibage aveve toela kitaeu laele ulu evievi ata olie soliale kea katea a soliva. Isito evievi ata la kele ata voleu au mama keate meialemei avoti navai oiva. 2 Katealelu vadeuluga la lamiga letatavai oiva abele laa aveve toela kateale kele uvuavei malaha keu aveve toela ale ke hanavage au tai guliguli kalei uu ulai. 3 Da laili ue solilu isito daa aveve ke huhuai loui kosealu malaha keu aveve toela alu. Daa uale bele malaha ke hanavage tai. 4 Isito da laili ue solige aveve koseale ave laa bahata ale kelate ai lailoi kosive IESU KELISOu ivile igalitoai daa huhuale kelate ai lailoi kosive IESU KELISOu vuvunele ata ke vai hanavage au tai satani vuvunele ui. 5 Ige valivelu aveve toela moeagau avolu loige au ke ivai au avale toela ke kalevai tota kuialai lolivelu kosiveu loivale vali kela avota mauli vai. 6 Katealelu labea lamiga letatavagelive la dibage bekini bauda eseieve vai valavale vaeavage au ke lahoege aule keu uvui kelate aveve toela keule la lahoevege lale toelave. 7 Katealelu aveve toela ale ata ke hanavage au guliguli kalei uu ulai mulimuli ata olisive. Isege laea aveve dua ave kelega la valavau dogave ele bekini bauda vaeava soliale kelate olive. IESU lailoi basiova mamoe kelate ai voeleai lailo toela ke totoalu. 8 Lailo aveve toela keu bekini bauda kelate. Katealelu lai memila avale toela ke kalevai huhui dua ai aveve dua ai IESU lovai tai. 9 Da memila kotovole kisaiai lalai hanavale kele daa loui kosealu ataeau aveve toela ai keateali navivale keali igalitoai oigelive kalaeabe late ava. 10 Evievi ata oliesoliale mulimuli ata kelai da louisolilu isito evievi ata lalaiga da ke loulu. Evie soliale keale keateali navai volea haulu olai vavolo ai seleivale silava toela hoeaseavai aveve katealelu vata kole ulu la oleveo tige keala kea. 11 Isito da lalai kisaiale keu kosealu evievi ata voleu aveve toela avale keti momai igali toalive. Isoho ata keu loui koseige dau evievi ata isito keu vali bahata keateali navai oai volea haulu isivi moeagai silava toela hoeaseavai kotou toela loui eu toela isi vavoloai evievi ata keu kateige ke luvita igalito kalevai aboili lovi ii kalevave. 12 Ekalesia soliale kele da aveveabe kaoa ke koto loulivelu bele isito DILAVAule aveveabe ivai aboele koto loui. 13 Isito abela lalai volete aveve kaoai kele koto louge au ke kalei au ke kale solige Bukau kotou loui avoe aveve toela avale ke louge au la kalevei ogeta tai.