Sabta 4

1 Lo ivei huhui koseale ave kea IESU KELISO hau avale eseala kea DILAVAu memila au koto vai mahogovale ke vai vavege kea ke vai loui ata haivei oivale eseala kea. 2 Loea KELISOu hau avale eseala katealelu DILAVAu olale la neniai kotove lougei. 3 Kalege la di aveve kaoai louge da ba ke huhualivelu bele ige ata volea di aveve kaoai louge da ba ke huhualivelu bele isi da aveve kateale huhuivale bele. 4 Di uvu duave da huhuige aveve be toelau daele ue solilu isito DILAVA igaliu ba di aveve kaoai dalu au ba vadeu loui. 5 Katealelu momai labea volea aveve kaoai kele koto loulive. Vaoe Kosiveu loivale vali kela aule ataea aveve kaoai kele koto loui ataea vaviu aveve ai mahogovale ke aule loui daiai isi ataea abo uvule huhuivale keta aule loui daiai vali kela ata olea aveve dua avale kelai DILAVAule loui koseai lai aveve keu duave. 6 Di kakoluvuia da koto ke louvale kele lale di aveve Abolosi aveve kelate ave. Da ke loui olalela la bukau koto louale ke evisi huhuai loo vave. Momai ata vole letatavai vole letolevalive. 7 Laea vole late olela louge la lamiga letatavagei oiva. DILAVA kela hau bahata lamelu iale lale oleveo kateai lamiga letatavagei huhuai kosea, loea loi melilega lo ko agilu, kaleva, DILAVAla ke amulu. 8 Laea seleai loui koseiva lo DILAVAu avale dua ke loo bahata ava isi loo bahata ai avoele kosive olievelu. La Kosive olievei aveveve ke bahata ke ateto lai bahata Kosive avalu isito la kate savalu. 9 Loea DILAVAu loo agigei ataea iala otovelu kateige ataeau huhuai avoe, kea atau toelaeala kea. Katealelu kavege abo vovoi, kateila abo ai atata anelu taea nile lo visukaeavelu. 10 Lo IESU KELISOu lovi avale kele ataea lo ivege loea soleivale ata latea. Ige laa seleai loui koseiva lo KELISO ivai lulelealu iale kele laea meliasege loea melie solilu sele nona katealelu ataea lo agigei toelatigeto laea lo agigei hoeaseavelu. 11 Katealelu lo aike vali kole sisilaito eniai tiva isi ogona toela katuva. Ataea lo toiavei lo agige toela tigeva loi ou ue solige lo vatava kole ukavakavai tiva. 12 Loi adatelaga lo meliai loviai lovi isi tiva isege ataea loi ivi vai toelativa isito loea hoeaseavei abolai kotou dua loui haiveva. Ataea vateu tuvu loameva igeto loo ke ibilave a soliva. 13 Ataeau lolai kotou toela louva isege loea abolai koto savate louva. Vali bahata lo kateivaga ata volea lolai homasiavelu huhuige loea vatau momolu late. 14 Daa lalai koto ko kisaiai olae solilu la matialivelu laea di uvu ese late. Kateilage da ko kisaiai olai laa haivelu. 15 Ata moeagaea laeo tiale IESU KELISOu koto loui la haivelu isito kea lai mama leleve olie solilu da memila laea loale kotou dua loui la haivege la eviale kelega dau lai mama leleve late olilu. 16 Katealelu daa laa lavigei evive daa vaeu avale kelate lata ai daa lovave. 17 Dale ba Timoti hanavage lae loi dii koto loui laa haivei. Timoti keu dii uvu vola keu evievi ata olisi kosive lovile melialu haualu. Iale aule ba lae loluaga da IESU KELISOu kuva lovai ekalesia bahata haivevale ke deiadave loui laa haivegei. 18 Isito laele ata volea kobekavai abobiga letatavagei huhuige daa ba laeo vadivadiai lolivelu bele. 19 Isito kosiveule olage dale solekata laeo loi ataea abobiga letatavegeale kea aveve kaoai dibai au aveveabeu vuvunealu, bela koto ulala abo ke louva. 20 Laa lamiga letatavegei loui kosealu loea DILAVAu adau vuvunele ulu. Kateaito la koto ulala ke louva lai koto kele vuvunebeu ue solilu. 21 Katealelu dale loluaga oleve kateai laa haivei laa huhuige daaa lai kalau toela loui laa haivei. Koto nonai koto savave loui laa hoeaseavege keule duave.