Sabta 3

1 Di kakoluvia da olai koto vole loui la haivei isito la vatau avevele meliale kele munana tuvu avevetele la melie solilu la IESU KELISO lovale kele eseu esea evievite late. 2 Da memila laeo tiale olai DILAVAu koto bahata loui la haivei isito lai aveve keu toelage da koto bahata loui la haive solilu. 3 Kosealelu la volea aveve vole ivai vatau avevete late ai la volea aveve ivai volea maina ava. Isi volelai tuvuai kotou toela volelai louva, la aveve toela kateale ale kele la vatau ata lovegeva. 4 La volea lui koseiva loea Bolo lovaeviva ige la volea loui koseiva loea Abolosi loviva, la katealelu vatau ataea avale late aeviva. 5 La huhuige Abolosi keu olela keu, isi Bolo keu olela keu. Loea atala lateala loea DILAVAu hau ai la haivege la evisi DILAVA lovaeaviva kosiveu au lovi igaligaliai loamege lo ke ava. 6 Laea vuu late isege dau vuke kavale ata isege Abolosiu keu ee vavuale ata, isege DILAVAla ke hoeaseavage lalavalu. 7 Vuu kavale isi ebuevale kea kitae olie solilu isito DILAVAla ke bahata hoeaseavage kea loi kitaealu. 8 Vuu kavale isi ebuevale ke haukala igaligali la abo ke ava keale lovi kau dua age DILAVAule ke ibilaeabe vavei. 9 Katealelu loea igalitoai DILAVAu lovi avale ata lola koea isege laea DILAVAu vuu late isi ove late. 10 DILAVAu au lovi aveve ke vuvune damuale kelega da oo kouvale ata olisi avolu hau dua ai ou hade melite uluvelu ige ata volea ke tatale oo kouva da louale keu kosealu da olale la igaligaliai hade ke tatale hoeasei oo kou dua ai uve. 12 Hade ke tatale evievi ata volea golota silivata vuleu duata oo kouva, isege volea idita kuluta oo kouva. 13 Vaoe IESU KELISOu vali nii kela aule ata bahata kea aveveabe ke ivai aveveabe keu au duave bela toelalu. Kosealelu vali kela veneule ata bahata vaugei ige IESUle ivage oleve keule nasege oleve keule na solisi. 14 Ataeale hade melite ke tatale oo kou dua aluaga aveveabe keule venele naa solige keale davana dau agisi. 15 Isito atabe aveveule venele nai uesolige keu ba au avevele ibila, davana valivelu bele. Ata voleu oveu hauveta bahata nage keule ada ulata ui iale kelate ata voleu aveveule venele nage keule ada ulata Otogoe tai. 16 Lale huhue solilu laea DILAVAu ou tuvu olige DILAVAu munana tuvu lai uvule ulu vali bahata. 17 Katealelu ata oleu DILAVAu ou tuvu vai toelatige DILAVAule avota ke vai toelatisi. Kosealelu DILAVAu o keu tuvute ige lakea ove tuvute lala kea uva. 18 Labea momai lamiga seleavegelive isi loui kosea dau vatau avevele lulelete ata iale lulele kateale keu sele lulelela. Katealelu lulele kelete kalevai loi DILAVAu luleletele luleleave. 19 Kosealelu vata kou luleleu malomalou lulelela keu Bukau kotou loui avoe vatau luleletele luleleale ke DILAVAule luleleabe ke agige luleleabe keule ue solisi. 20 Isi Bukau kotou tota loui avoe kosiveu dibage vatau lulelete kea huhuige keu sele ula. 21 Laea IESU KELISO ataea ige KELISO keu DILAVAu ata katealelu labea momai lamiga letatavagei vatau lulele lovaevivale, hau kea laelela. 22 Oleve ata au Bolo, Abolosi o Sebasi o vata ko, o "lu" mauli, o voele, o vale vile aike loivale o aule ba loi, kenenia bahata laele. 23 Ige la ko nenia IESU KELISO vile ige IESU KELISOu DILAVA vile. Ameni.