1 Di kakoluvuia da memila laeo tai DILAVAu koto loui la haiveale kele da koto tolove loui ataea lulelete la haive solilu. 2 Da valevile bahata kebe huhue solilu isito IESU KELISOu idiu dole voeleale ke ula da huhuai la haiveva. 3 Da memila laeo tiale goada solisi vabu ulale la haiveva. 4 Da laeo tiale keu atau lulelele la haive solilu isito munana tuvu vuvunele la haivege la luleleige koto keu leleve. 5 Da olae soliale la ataea luleletele koto evilivelu isito da olavale la DILAVAu vuvunele evievi ata olisi. 6 Ata olea abo evievile meliavale kelaiga dale lulele koto loui isito vatau lulele da ba ke haivelivelu bele kosealelu vatau kosive kea vuvune keule ue solisi. 7 Katealelu da vatau lulele ke loue solisito DILAVAu lulelete ke louva DILAVAu memila au lulele ke mahogovage ataea ke dibasolilu DILAVAu memila vata ko a solisito au lulele kele lailo huhugei olale lai loea Otogou valele ke ivei. 8 Vatau kosi kitaea DILAVAu lulele ke diba solilu abo ke dibateto ataga kosi kitae ke vai idiu dole kava solilu. 9 Kele Bukau kotou loui avoe DILAVAu eue Otogoe olea abo uvu vai DILAVA vavuale kelai vale vile moeaga otovelu atabeu ivai, evisi, huhue solilu. 10 Bukau koto keu katealu isito DILAVAu au munana tuvule lailo haivege lai Otogou valevile ke dibalu munanave tuvu vaveveve bahata dibalelu au ke loui lailo haivelu. 11 Da louale keu kosealu atabeu ba au kakolou hau ke ba dibalive bele isito biageule au avale ke neni huhuai kelate atabeu ba DILAVAu aveveve bahata huhualivelu bele isito DILAVAu munana tuvu aveveve ke neni dibalu. 12 Lailoea vatau avevele lulele solilu isito DILAVAu au munanau tuvu hanavage lailo agisi luleletige lai valevile ko DILAVAu lailolai ai otoveale ke dibalu. 13 Katealelu lai ataea lulelele koto loui ata haive kalevai, isito munana tuvu lailo haiveale koto leleve ke loui ata olea lauma helagau agigeale ke haive. 14 Isito ata olea DILAVAu munana tuvu agige soliale kea ba DILAVAu avevele lulelealivelu bele isi DILAVAu munana tuvu ke aveveta ba dibalivelu bele. Ata kateale keale DILAVAu munana tuvu agigeale ke ulaeale DILAVAu aveve kele lulele ai. 15 Munanau tuvuvale keale valevile kele luleleai kele koto loui isito atabeu ba munanau tuvu agigeale kea aveve kaoai kele koto loulivelu bele. 16 Katealelu Bukau kotou loui avoe oleule kosiveu huhui dibai oleule lulele ke haivui atabeu ba ke haivulivelu bele isito lailoea IESU KELISOu lulele vale kele lailoea vale vile kole luleleavelu.