Sabta 1

1 Dau di ivila Bolo DILAVAu au olale da toiavage da IESU KELISOu Abositolove olisi hauve ava, da isi lailoi kakolo vole Soseteni loeala lalai kisai ko hanavalu. 2 DILAVA ataea Kolinito oe uvale lalaiga lo koto ko hanavalu DILAVAu la toiavei olale la loi IESU KELISOu ata olisi aveveve late ave keluga lo lalai kisai ko hanavalu isi ataea oleve keveo lailoi kosive IESU KELISO ivi letatavai hoeasevale ata bahata kelaiga lo koto ko loui hanavalu IESU KELISOu keu ata bahata lailoi kosive. 3 Da olalela lai loi mama kitae DILAVA isi lailoi kosi kitae IESU KELISO kea la huhugei la hoeaseavege lale u dua ave. 4 Da vali bahata lalai guliguliai DILAVA imiliaviva kosealelu ige valivelu la huhugei la hoeaseavegei. 5 La IESU luvita igali toale kele DILAVAu lai aveve ke hoeaseavage la kele lulele kitae agisi kotove louva. 6 Da memila IESU KELISOu koto loui la haiveale keu lai uvule ukolikolia ulu. 7 Katealelu laea lailoi kosive IESU KELISOu loiveve ke huhuai inohovele uvale kelu DILAVAu la hoeaseavei au lovi avolu aveve ke vuvune lamelu. 8 Aule la melitievege vali vaola lailoi kosive IESU KELISOu loige avevebe toelau laele ulivelu bele. 9 Lai luleleige DILAVAu lailo goada vavelivelu louale ke aule ai DILAVAu la toiavei olale la vove lailoi kosive IESU KELISO ke luvita igalitoai ui. 10 Di kakoluvuia da lailoi kosive IESU KELISOu ivile da la lavigeva la bea momai vole didiavevale o aligei uvu abutialive isito la bahataea uvu igaliave lale katealuaga igali toai huhui igali ageve. 11 Di kakoluvuia "kolou" ole uvale ata volea da laviage da evilu laea volelai tuvuai kotou tuvu volelai loui voleali neniai ue soliva. 12 Da louvale keu kosealu la volea loui avoe loea Bolo lovava isege volea loui avoe loea Bita lovaeviva, isege volea loui avoe loea IESU KELISO lovaeviva la koto kateale louge keu toelalu. 13 Da la lavigeva au IESU KELISOla la aligelu bela la huhuige da Bolo la lalai idiu dole voelealu lale di ivilega Babatisoalu? 14 Da kate solilu da la Babatisoge solilu isito Kulisibasi isi Geiasi ata abuti ke ula eala daa Babatisogeve solilu da ata moeaga babatisoge soliale keu duave. 15 Laea ba koseai loulivelu bele loea Bolou ivilega Babatisoalu. 16 Da huhuige da ata moeaga Babatisoge solilu isito di ata abutita keala Babatisogelu Sitevenasi ole uvale ketaga abo babatisogelu. 17 Ata Babatisogelu IESU KELISOu da hanava solilu isito kotove dua loululivelugau au da hanavalu keu olae soliale da ataea lulelele koto loui dale kateale aluaga KELISOu idu dole voeleale keu siauveu ba daele ulivelu bele. 18 Ata olea koto evie solisi voeleu kuvala ivale kea IESU KELISOu idiu dole voeleale koto kele lulele solisi huhuai loui avoe malomalo nonala keu isito lai loea ukolikoli kuvala tivale lailoea huhuige koto kole DILAVAu siau ulu. 19 Bkau kotole DILAVAu loui avoe dale luleletea lulele agige aule ue solisi isi ataea abo lulelele vadeu avale ke dale bavui. 20 DILAVAu koto kele vatau avevekele leleivale keale oleveo kateai ige vatau aveve huhuavei kele lulele ivale keale oleve kateai DILAVAu lailo haivege vatau lulele keu momau lulele la keu. 21 DILAVAu au lulelele kuvaeabe bavuge ataea ba abo lulelele DILAVA dibalivelu bele. Ataea huhuige lai DILAVAu nona louvale keu malomalo kotola isito ata olea koto keo evisi kele luleleage DILAVAule ke agigei. 22 Diuia atakea olale IESU ivai teteivale ke vole age ea ivai tetehamai ba IESU lovai isege Guliki ata kea koto ko homasiavai vatau lulelete kaoai oiva. 23 Isito lailoea IESU KELISOu idiu dole voeleale ke koto loui ata haiveva ige Diu ata kea koto ke evisi tuvuavelu. Olae solilu ke evilivelu isege Guliki ataea koto ke evisi loui avoe momau kotolau ata kea ke belalai oiva. 24 Isito DILAVAu Diu ata isi Guliki ata vole toiavege ea loi dibage IESU KELISOle DILAVAu vuvuneta lulelevetau ulu. 25 Ataea huhuige DILAVAu koto keu malomalo nona isito DILAVAu koto keu ataea lulele ataea koto ke leivialu ataea huhuige DILAVAu aveve keu melitava solilu. Isito DILAVAu goadave keu ataele ke leivialu goadave baua. 26 Di kakoluvuia DILAVAu la toiaveale ke huhuave laea ataea nile lulele solisi vuvune solisi ata kitae olie savalu isoho la igaligaliai kateavelu isito la ke nenia kate solilu. 27 Ataea huhuige laea malomalo aveve avale ataea isito DILAVAu la agigei lulele lamege vatau avevetele luleleivale ata keale ke ivai abo lalai kotou toela louvale ke huhuai matiavei ataea huhuige laea siau laele ue solilu isito DILAVAu la makagei olavale vatau huhui toela avale ke bavui. 28 Ataea nile olea vuvuneai ata kitae olivale kelete DILAVAu makage soliva isito ivie solivale isi ata ivite olie solivale keletela DILAVAu ke makagei olavale vatau huhui toela avale ke bavui. 29 Da louale keu kosealu atabeu DILAVAu nile amiga letatavalivelu bele. 30 Isito DILAVAu lailo agigege lai IESU KELISO luvita igalitoalu DILAVAu IESU KELISO ke letatavage keu lailolai lulelete ata olilu ige lai kele luleleai DILAVAu nile atau dua olisi ige au aveve toelale lailo agigelu. 31 Bukau kotou kelu loui avoe atabeu ba amiga letatavalivelu bele isito aule kosiveu ivi ula loui letatavai hoeaseavagei.