1 Di kakoluvuia da memila laeo tiale kotou dua loui la haivege lake evisi valu. Isi aike kele meliai uva katealelu da olale tota kotou dua vole loui la haivei. 2 Da koto ke loui la haiveale ke vatala dua ave. Lake vatala dua age DILAVAule la agigei la vatalau dua asolige DILAVAule la kalevei. 3 IESU KELISOu kotou dua da vai laeo loaleu la haivei kosealu bukau kotou louale kelate IESU KELISOu lailoi toela ibilalugau voelealu. 4 Au voeleige Bukau kotou louale kelate abo vai abavuge vali ni abutita igalitau vesusege au kobelalu. 5 Kobelai tialeu amigavai Bita haivulu isito ba valivole nile amiga vai Abositolo tuelo ke haivege ea ivalu. 6 Ige vali volele evievi ata vai hadeleti kea igalitoai ivaevelu. IESU KELISOu amiga vaitai haivege evievi ata kele volea vovisege volea ulu. 7 Isi valivoleo tai amiga vai Dieimisi haivulu isi au mohoho keneni haivege abo ivaevelu. 8 Ige IESU KELISOu vaola amiga vai daa haivuge dake ivalu. Evievi ata moeagaea ke ivaevelu igeto dau ba vaola ivai Abositolove ata olilu. 9 Isito dau Abositolo kele ata kitae olie solilu da olae soliale abo dalu loui koseai Abositolo ata kosealelu da memila DILAVAu Ekalesia kavei agigei toelatige kitae ai vateu tuvu moeaga vavelu. 10 Isito DILAVAu dalu uvuai daa vage daa Abositolove olilu keu dalu uvuai da vage daa uu ula olie solilu. Isito DILAVAu lovile da meliai Abositolove vole leivigelu daa dii olale lovive ke asoliva. Isito DILAVAu dal vuai da duluasege da lovive ke ava. 11 Da kotove loui la haiveva isege Abositolo volea abota koto loui la haiveva ige la evisi huhuai ava. 12 Lo kotou dua loui ata haivei koseiva IESU KELISO keu voeleai kobelalu isege la volea loui koseiva vovivale keale oleveo kateai. 13 La koto louale keu leleve oliteto IESU KELISO keu voelele kobela solilu. 14 KELISO keu voelele kobela soliteto loi alolo keu baiveu ue solilu ige lai evievi keta baie solilu. 15 Da kele koto vole louge evive lo la haivei loui kosealu DILAVAu voelele KELISO isage kobelalu. Isito lavolea loui kosealu vovivale ata kea ba kobekavalivelu bele. La koto kateai louale keu leleve oliteto lo koto loui la haivevalekeu sele nonala lo ke louva. 16 Kosealelu vovivale ata kea kobekava soliteto DILAVAu KELISO isage kobela solilu. 17 Isi DILAVAu KELISO isage kobela soliteto lai evievi ke baiu ue solilu. Ige lai toela keu vato laele ulau ke alu. 18 La koto ke louale keu leleve oliteto evievile vovovale kea vovoi ue savalu. 19 Lai loea lailoi evievi vai KELISO vilele vaeavai eu tiveve keu ue solige evievi ata olie soliale keale loui koseai, iei ata ke nohovula sele nona ke evisi loui lovai oivale ataeala kea. 20 Isito koto leleve keu kosealu DILAVAu voelele KELISO isage kobelalu. KELISOu kobelale kele lai dibage ave uvevete kole lai loeale kobekavai tai mauli agisi. 21 Voele keu ata igali vilelegau lolu kelate volele kobelale keu ata igali vileogau lolu. 22 Lai loea bahata adamulega lolu isi Adamu aveve toela ale kele lai lole bahata vovogei. Isito lai KELSI luvita igali toale kele lailole bahata vovokele kobekavai. 23 Kobekavale kele KELISOu luta lai lolai kobelalu ige ivivele vovoale keale au loivale kela abota kobekavai. 24 Vali kela KELISOule au vuvunele vuvunete ke bahata kavege abole ue solisi Otogoe uvale vatae uvale ke bahata leivigevege keale bahata vuvuneve valae ue vei. Ige KELISOule au vuvune vai au mama DILAVA vavui avolu loui koseai di ata bahata ko nalieve. 25 KELISOu ke nalievevaga DILAVAule olea KELISO vai toelativale kea vuvuneabe neni vesuiavage ue solisi. 26 DILAVAta vai toelativale kea vuvuneabetale ue solige voeleavale vuvune ketale vesui. 27 Bukau kotou louale keu katealu avoe aule vuvunete ata bahata leivigei isito lai kele luleleage au ba au mama DILAVA ke leivialivelu bele. Kosealelu DILAVA kela vuvune bahata au voo KELISO ke vavulu. 28 DILAVAule vuvune bahata agisi KELISO vavuge aule olea DILAVA vai toelativale keneni vesuiavege ue solige tota au vuvune bahata agisi DILAVA vavuge aule au vuvune ata bahata nalievei. 29 La volea loui kosealu vovovale ata kea ba kobekavalivelu bele isito oleveo katealeluga la vovoale kelai Babatisoiva. Kosealelu lai dibage vovivale keale ba kobekavai. 30 Vovivale kea kobekava solisege badeuluga lo vali bahata vateu tuvu agiva. 31 Di kakoluvuia vali bahata voele aveve keu daele loiva lailoea lailoi kosi kitae IESU KELISO luvita igalitoale kele da lalai sisila kitae alu ilake aive koto loui la haiveva. 32 Da koveo ui DILAVAu hau asege Ebesesi atau toelaea ovo ai hanite lateai daa vai toelativa isito vovivale ata kea kobekava solige vadeuluga da ata kea vateutuvu agiva. Vovivale kea kobekava solige lailoea lailoi olate ai lovi isi ee isi uu ulai lai kateaito valivoleo vovoi uesolisi. 33 Ata volea koto kateale loui la seleaveva isito momai kotoeabe ke evivale lale kotoeabe evisi lovei tiluaga lale aveve dua ke kalevai aveveabe toela late lata ave isi abo late olive. Ialelu loui lai aveve toela kalevai huhuai dua ai aveve lilikate ave la volea DILAVAu kuva keneniai iva solilu da ke loui lai matialu. 35 Isoho la volea da belai loui koseai vovovale keale oleveo kateai kobekavai abole kobekavai vava oleveo kateale vai. 36 Malomalo kalevave lale loviu ai vai vatale kage visovea daisege baiveu dogau dobai vatau uvue tisege iveule sakavai ue solisi. 37 Lale kone i kage isoho i vole kageale kele la ba avave bahata eta kalivelu bele isito ieve ulala a vai laiva ige aule lavisi. 38 DILAVAu au olale igaligaliai vaveale kele abole oleve kateai lala vai. 39 Kelate valevelea vatale uvale kea vava igali olie solilu. Ataea vavae keu vole ige ovoea vavate keu vole isege uguia vavate keu vole ige emiko vavate keu vole. 40 Kelate Otogoe valevile isi vatau vale vile kea vole late olie solilu. Otogou ataga otogou iviivi keu vole. Ige vatau ivate keu vole kea igalitoa solilu. 41 Vali ni ke ivage vole ige batau ni keu vole ige didi ke ivage au nite vole agelu. 42 Iale kelate vovovale keale kobekavai abo vavau dogata abo vovoge abavuge sakavai kisialu isito kobekavale kele vavau dogata abole kobekavai. 43 Ataeale vovoge vavaeabe keule toelai ui meliabe keule vesuge kaohovo ulai ui. Isito vaoe kobekavale kele meliai ui vavau dogata atagai ui. 44 Vovovale kea vatau vavataga kea vovolu. Isito kobekavale keu Otogou vavata abole kobekavai. Lai luleleige vatau vavau uu ige Otogou vavateta ulu. 45 Bukau kotou loui avoe DILAVAu luta Adamu age keu vatau ata olisi ulu. Isito vali voleo DILAVAu KELISO hanavage au Otogole lolu ige kele ataea uveve doga agievei. 46 Lailoea ave Otogou vava agie solisito vatau vavataga ko uva isito ba vaoe Otogou vavate agisi. 47 DILAVAu memila vatale Adamu alu isito vaoe KELISOu loale keu Otogole lolu. 48 Adamu vatale loale kelu ataeau vatau vavate agilu isito kELISOu Otogole loale kelu ataeale Otogou vavate agievei. 49 Lailoea Adamule vatau vava agievelu isito vaoe Otogole loale KELISOu vavate late lailole agievei. 50 Di kakoluvuia da louale keu kosealu lailoeale vatau vavata DILAVAu Otogoe talivelu bele. Vatau vava keule vatale sakavai ui katealelu lai ba vatau vava keta Otogoe talivelu bele. 51 DILAVAu koto vole vai mahogovale ke dale aike louge evive lailo volea vovosege voleale nita usege IESUle loige lai bahata vavau toela kalei vavau dogave agievei Otogou vavate. 52 Vali vaola kibiu kotoige solekata niu vaga kavale kelate vovivale keneniale kobekavai vavau doga agisi ige nita uvale keale abota vavau dogave agievei. 53 Vali kela lailole vatau vavate kalevai vavau doga agievei kele vali bahata ukolikoliai uevigei vovolivelubele. 54 Vali kela lailole vatau vavata ui vovivale ke kalevai vavau dogave agievei vali bahata ui tigei ige lailoi aveve keule bukau koto vai lelevetisi koto keu loui avoe KELISOu vovovale ke vuvuneve vesuiavalu. Ige ukolikoli vuvuneve keu loi egealu isi vole vile leivialu. 55 Bukau kotou tota kele loui avoe voele ai vuvunela oleve ke voele ai govadala oleve ke. 56 Lai dibage aveve toelalega voeleu vuvunealu. Ige basu ula age toelau vuvunewu loi kitaeai ulu toela vesuia valivelu. 57 Isito lai loi kosi kitae IESU KELISOu vuvunele lailoi mama kitae DILAVA kelu lai sisila kitae vavui IESU ivile isi DILAVAu ivi letatavai hoeaseavai. 58 Di uvu kakoluvuia labea momai hoahoagelive isito melihamai leleisi IESU hau kole ata haive dua ageve la hauve avale keu baiveu ulu laleba agisi sisila kitae ai DILAVA hoeaseavave.