Sabta 13

1 Volelai isiviai volea haule abolai hauavei dulugeve. Dale ata volea kotole koto loui isoho Aneluia koto ketale dale DILAVAu koto loui luleleai to kele atalai homasiavege di koto keu baiu ba ulivelu bele. 2 Ivage da Belovetaea lulelelte ke vai vaoe vadeu loiveveteu mahogovai uale ke loui daiai ata haivegei. Dii evievile meliai tala vole laviage au soaitai volela lavige keu duave isito daele isivi ue solige da eula lulu ulala ke ai oiva baiveu ue solilu. 3 Da di hau agisi hauesite ke vaveale keu duave baua, isoho da DILAVAu koto loui ata haivesege abo da vai vauge da voeleage keta duave. Isito da atalai olaesolisi duluge solige da avale keu baiu uesolilu. 4 Atalai olai dulugevale keu kosealu lai solekata volelai tuvuai aveve toela avale ke kalevaito volelai olai voleali ui sisilai vole dulugei volelai olai udua agei lai ba volea maina ai amiga letatavagelive, koto louive. 5 Lailoi kakoluvu lai olai vole duluge vole hoeaseavei aveve kelega ba la vole lai tuvuai vole agigei toela tilivelu bele. Ige olea lailo agigei toelatige ke ibila alive avolu DILAVAule ba ke ibilave vavui. 6 Volelai olai o isiviale kele dulugevale kelu lai ba aveve toela ke sisilave alivelu bele. Isito lai lole kotou dua ke evisi sisilave ai toelave kale. 7 Lai volelai isiviai vole dulugevale kele abo lailo agigei toelatige lai ke huhu kalevaito vadeu vaoe lailolai loivale ke ula huhuai avolu melialivelu ke agisi. 8 Vaoe avevete koto loui vole haivevale keule vesui. Ige abo koto ni voletele koto louvale keule vesui. Ige lai vatau avevetele luleleale keule vesui. Isito lai volelai olai vole duluavale keu ba vesulivelu bele. 9 Lailoi lulele keu aike eseieve baua ige lai vaoe loiveve nona loui vole haivevale keta eseieve baua. 10 Isito vali vaovela lailole vadeuia loiveve ke ivai huhuai lulele kitaeai. 11 Daa eseu eseta uge di huhui keu di nona keu eseu esea huhuia beta nonaeabe ava isito da loi bosiai huhuabeta nonaeabe keta kalevelu. 12 Lai aike DILAVA iva solisito aveveve keula ivaevelu isito lailole vaoe DILAVA ba lailoi niteta ivaevei. Aveveve kele luleleai da aike luleleale kou eseieva isito DILAVAu aike di aveve bahata ke ivale kelate dale data vaoe DILAVAu aveve ke bahata ivai avoele lulele kitaeai. 13 Lai aike aveve abutita igali tale ueviva aveve volela lailoi evievi aveve volela vaoe vali kele vadeuia loiveve ke huhuai uva. Ige volela lai volelai isiviai ke isi vole ali sisilavale ke isito aveve abutita igalita kele volelai olavale isi vole dulugevale keu hau kitaela keu.