Sabta 11

1 Da IESU KELISOu avale late ai lovai tiale kelate lata da lovai love. 2 Di kakoluvuia da lalai sisila kitae alu kosealelu da koto bahata loui la haivevale keneni la huhuai ava. 3 Isito da koto ko igali louge kele luleleave KELISOu kinela DILAVA keu ke valale ui au louale ke ava iale kelate malaha kea kinela IESU KELISO ige keatekea kinela malahaea. 4 Katealelu malaha oleu dubue guligulilu tiluaga nona loui ata haivelu tiluaga au kinele saneka lebodia vaeavaito kine ulata Dubu uvue tai au sanekata tiluaga IESU KELISOlau ke vai toelatilu. 5 Ige keate vadeu Dubu uvue guligulilu koto loulivelu tiluaga au kine bavue soliale keu au vela vai toelatilu evievi keatea. Abo kine bavue solisi Dubu uvue tivale kea tebau keatea abo kine boige kouale kelate. 6 Evievi keate olea abo kine bavue solivale kea aboi kine boige kouale keu duave ige abo ke ivai matiai abo kine bavui guligulilu tai. 7 Isito malaha keale dubue talivelu abo kine bavulivelu bele kosealelu DILAVAu malahalai ale keale valavele ui hoeaseavai isito keateale abo kine bavui kosealelu keale malahaea vavale ui DILAVA hoeaseavai. 8 DILAVAu keatele malaha asolilu isito malahaealegau keate alu. 9 Keu keaelu malaha asolilu isito malahalugau keate alu. 10 Katealelu keateale abo kine ke bavuge ataeale ke ivai huhuai koseai kea abo velavuia vuvuneu valale ualeala kea kea kateige Aneluiale kele sisilai. 11 Kosiveu ola soliale keatea abo velavu kalevei abouvu ulivelu isi malahaea abo ivuvu kalevei abouvu ulivelu isito keale voleali igalitoai ui tigei. 12 Kosealelu valevile ke nenia DILAVA vilele lolu DILAVAu malahale keate alu ige keatele malahaea ulu. 13 La huhuige keate keale Dubu uvue DILAVA hoeaseavai guligulilu abo kine bavue solige keu duave bela keu toelalu. 14 La huhuige malahaea abo kine kalevege egeage abole kele matiavei. 15 Isito keatea abo kine kalevage keu egeige keu duave kosealelu DILAVAla kineu numu egete ke vavege keu kineabe ke bavulu. 16 Isoho atabeu di koto bokoige dale koto koseale loui lo koto ko igali loui DILAVAu ekalesia keneni haivege ea aveve ke igali aeviva. 17 Dale aike kotovole loui kele ba la hoeaseavalivelu bele kosealelu ekalesiaea vole bevuai igalile ui vole hoeaseavei uge duave isito laea kate solisito vole agisi toelativa. 18 Lai aveve vole toela da evige keu kosealu la igali toai vole bevuai koto evisito koto kele volelai loui vole aligeva da koto ke evisi huhuige isoho lelevela keu. 19 La volelai loui vole aliage kele dale koto vole louila volea aveve dua ava isege la volea soleivalea avevete ava. 20 Katealelu laea vole bevugei igali toai kosiveu louale kelate ai aleto iesoliva. 21 Isito lavolea lovi kitae, ee kitae agisi loi dubu uvue ui ieviva isege lavolea ada ulala loevealelu loui vagalata ueviva la kele lovi isi e isi vole vavesolige keu toelalu. 22 La vadeuluga lai oe lovi kitae isi ee kitae ie soliva isito agisi ataea nile loiva kelu lovi isi ee isi vaveve kosealelu ata volea hau aboele ue solialelu loui. Lale katealuga DILAVAu ekalesi vole agigei isutievei katealelu loui la huhuige dale laa sisila ai be dale la homasiavei. 23 Daa memila aveve kateale loui la haive solilu isito kosiveu avale ke ulala da loui la haivelu. 24 Diudasiu IESUlu haiavale vavi kela IESU valava vai hoeasea vaito vakoai loui avoe di misila kou da lameva ko isi da huhuave. 25 Ige mohohovea ke ige vesuge eu kabusi vole vai uaini lehosivai vai vavei loui avoe e ko ive kou di taola kou ko isi da huhuave di tao kou lotige DILAVAule di tao kele basu dogave ai la ko isi daa lalai voeleale ke vali bahata huhuigeve. 26 IESU koto keu katealu ieale la valava ke isi ee ke ivale ke ataeale ke ivai kosiveu voeleale ke huhuai uvaga aule kuialai loi. 27 Katealelu ata oleu IESU taota valavata huhuige keu avoele kitae olie solilu isi kateai au avale toela ke tatale aleto ige au valava keta IESU taotaga au kevai toelatilu. 28 Katealelu da olale lale luta lai aveve toela ke loui daiaito ba valavata e keta ive. 29 Valava keu kosiveu vavau misi kelatela keu isege kabusile ee keu taove latela keu. Katealelu lale lai toelata ige DILAVAule lai aveve kaoai ke ibilave lamelu. 30 Katealeluga la moeagaea haluluviava isege evievile melie soliva isege volea voviva. 31 Isito lailole luta lailoi aveve toela ke kaoai loui daiaito ba aleto ige DILAVAule lailo kavelivelu bele. 32 Lailole lailoi aveve toela kaoai loue solige DILAVAule lai loi aveve toela kaoai keu ibila lailo vavege lailole vateu tuvu kitae agievei kele luleleai kateage lai ba vatau ata keali ibilau toela agilivelu bele. 33 Katealelu di kakoluvuia la kosiveu aleto valuaga vole kalevelive isito vole bemotoai aboili igalile ui aleto ive. 34 Laa Lai oe lovi ie solisi loi aleto ige toelalu. Isito lai oe lovi isito ba loi igalitoai aleto ige keu duave lale katealuaga DILAVAu ba vateu tuvu lamelivelu bele isito dale valivoleo loi kele koto vole loui la haivei.