Ուրիշները Չդատել (Ղկ 6.37-38,41-42) ¹ «Մի՛ դատէք [քննադատէք եւ դատապարտէք] ուրիշները եւ Աստուած ալ ձեզ պիտի չդատէ [քննադատէ եւ դատապարտէ]: ² Որովհետեւ ի՛նչ ձեւով, որ դուք կը դատէք, ա՛յնպէս ալ Աստուած պիտի դատէ ձեզ, եւ ի՛նչ չափանիշ, որ դուք կը գործածէք, ձեզ ալ նո՛յն չափանիշով պիտի դատէ: ³ Ինչո՞ւ եղբօրդ աչքին մէջ գտնուող շիւղը կը տեսնես, բայց նկատի չես առներ, որ քու աչքիդ մէջ գերան մը կայ: ⁴ Ի՞նչպէս կրնաս եղբօրդ ըսել՝ “Ձգէ՛, որ աչքիդ մէջ գտնուող շիւղը հանեմ”, մինչդեռ գերան մը ունիս աչքիդ մէջ: ⁵ Կեղծաւո՛ր, նախ գերանը հանէ՛ քու աչքէդ, որպէսզի յստակ տեսնես եւ կարենաս շիւղը հանել եղբօրդ աչքէն: ⁶ Սուրբ բանը շուներուն մի՛ տաք եւ ձեր մարգարիտները խոզերուն առջեւ մի՛ նետէք: Այլապէս անոնք կրնան կոխկռտել զանոնք եւ ապա դառնալ ու բզկտել ձեզ: ⁷ «Խնդրեցէ՛ք եւ պիտի տրուի ձեզի: Փնտռեցէ՛ք եւ պիտի գտնէք: Թակեցէ՛ք դուռը եւ պիտի բացուի ձեզի: ⁸ Որովհետեւ ա՛ն որ կը խնդրէ՝ կը ստանայ, ա՛ն որ կը փնտռէ՝ կը գտնէ, եւ անոր, որ կը թակէ՝ դուռը պիտի բացուի: ⁹ Կամ ձեզմէ ո՞վ, եթէ իր որդին բաղարջ մը հաց խնդրէ, քար կու տայ անոր: ¹⁰ Կամ եթէ ձուկ խնդրէ՝ օձ կու տայ անոր: ¹¹ Հետեւաբար դուք, որ չար էք, գիտէք լաւ նուէրներ տալ ձեր զաւակներուն, ո՜րքան աւելի ձեր երկնաւոր Հայրը լաւ բաներ պիտի տայ անոնց, որոնք կը խնդրեն իրմէ: ¹² Հետեւաբար ինչ բան որ կ'ուզէք, որ մարդիկ ընեն ձեզի, դուք ալ նոյնը պէտք է ընէք անոնց, որովհետեւ այդ սկզբունքը իր մէջ կը խտացնէ Օրէնքն ու մարգարէներու ուսուցումները: ¹³ «Նեղ դուռէն մտէք, որովհետեւ լայն է այն դուռը եւ ընդարձակ է այն ճամբան, որ կործանումի կը տանի, եւ կան շատեր, որոնք այդ ճամբան կ'առնեն: ¹⁴ Բայց նեղ է դուռը եւ դժուար է այն ճամբան, որ կեանքի կը տանի, եւ քիչեր կան, որոնք կը գտնեն զանիկա [Բ.Օր 30.19: Եր 21.8]: ¹⁵ «Զգուշացէ՛ք սուտ մարգարէներէն, որոնք ձեզի կու գան ոչխարի հագուստներով, բայց իրականութեան մէջ գիշատիչ գայլեր են [Եզ 22.27]: ¹⁶ Իրենց պտուղներէն պիտի գիտնաք զիրենք: Արդեօք փուշի թուփէն կարելի՞ է խաղող քաղել, կամ տատասկէն՝ թուզ: ¹⁷ Լաւ ծառը լաւ պտուղ կու տայ, մինչ վատ ծառը՝ վատ պտուղ: ¹⁸ Լաւ ծառը չի կրնար վատ պտուղ տալ, ոչ ալ վատ ծառը՝ լաւ պտուղ: ¹⁹ Ամէն ծառ, որ լաւ պտուղ չի տար, կը կտրուի եւ կրակը կը նետուի: ²⁰ Ուրեմն իրենց պտուղներէն պիտի ճանչնաք զիրենք: ²¹ «Չկարծէք, թէ ամէն ով որ “Տէ՜ր, Տէ՜ր” կ'ըսէ ինծի, Երկինքի Թագաւորութիւնը պիտի մտնէ, այլ՝ միայն անոնք, որոնք կը գործադրեն կամքը իմ Հօրս, որ երկինքն է: ²² Այդ օրը շատեր պիտի ըսեն ինծի՝ “Տէ՜ր, Տէ՜ր, մենք չմարգարէացա՞նք քու անունովդ: Քու անունովդ դեւեր չհանեցի՞նք: Եւ քու անունովդ շատ մը հրաշքներ չըրի՞նք”: ²³ Այն ատեն բացէ ի բաց պիտի ըսեմ անոնց. “Ես բնա՛ւ չեմ ճանչնար ձեզ: Հեռացէ՛ք ինձմէ, դո՛ւք, որ անօրէնութիւն կը գործէիք [կ'անտեսէիք իմ պատուիրաններս]” [Սղ 6.8]: ²⁴ «Հետեւաբար ամէն ով որ կը լսէ խօսքերս եւ կը հնազանդի անոնց, պիտի ըլլայ իմաստուն մարդու մը պէս, որ իր տունը շինեց ժայռի մը վրայ: ²⁵ Անձրեւներ եկան, ջուրերը յորդեցան, հովերը փչեցին ու զարկին այդ տան, բայց անիկա չկործանեցաւ, որովհետեւ հիմնուած էր ժայռին վրայ: ²⁶ Բայց ամէն ով որ կը լսէ այս խօսքերս եւ չի հնազանդիր անոնց, պիտի ըլլայ անմիտ մարդու մը պէս, որ իր տունը շինեց աւազին վրայ: ²⁷ Անձրեւներ եկան, ջուրերը յորդեցան, հովերը փչեցին ու զարկին այդ տան, եւ անիկա կործանեցաւ ու անոր կործանումը ամբողջական էր»: ²⁸ Երբ Յիսուս վերջացուց խօսիլը, բազմութիւնը զարմացած էր անոր ուսուցումով, ²⁹ որովհետեւ ան կ'ուսուցանէր հեղինակութեամբ եւ ոչ թէ Օրէնքի ուսուցիչներուն պէս: