Ichipandwa 9

1 Nomba ulo mfi fintu fyapwile, bacilolo kabesa kuli ne no kulabila, "Abantu ba mubena Israeli, banshimapepo, nabena Lebi, tabaitalushako abene ku bantu ba mumpanga naku fyeshiku fyabo: abena Kenaani, abena Hiti, abena Perisi, abena Yebusi, abena Amoni, abena Moabu, abena Egypti, nabena Amori. 2 Pantu balibulilepo bambi abana babo abanakashi na bana babo abalalume no kusankanya abantu bamushilo nabantu ba mumpanga abantu, ne ntungulushi naba cilolo ebabalilepo ukutabapo na bucishinka muli mfi." 3 Ulo naumfwile mfi, kandepula ilaya lyanji no mwingila no kusulula umushishi ukufuma ku mutwi wanji no mwemfu, kanjikala na panshi, amano ukupwa. 4 Bonse mbo abali kututuma pa mwinshi waku Lesawaku Israeli pa kutabapo na bucishinka kubafumine muli bunkole kabalongana kuline ulo naikele ninshi amano yalipelele ukufika na ku cabupe ca mucungulo. 5 Nomba pa cabupe ca mucungulo kanjima ukufuma mu musango nabelelemo uwa musebanya ne fya kufwala fyanji ifilepukile no mwingila, efi nafukeme panshi no kutambalika amaboko yanji kuli Lesa, Lesa wanji. 6 Kandabila, "Lesa wanji, ndinensoni no kupelelwa ukwebati njinwine cinso canji kuli we, pantu imembu shesu shafula ukuciluka napa mitwi yesu, no kushininwa kwesu kwakula ukufika na ku myulu. 7 Ukufuma lukoso munshiku shafikolwe fyesu ukufika nduno twaba mukushininwa ukutangaikulila. Mufilubo fyesu fwe, imfumu shesu, naba nshimapepo besu balipelwa mu minwe sha mfumu sha calo ncino, kuli panga, kuli bunkole na kukutunte fipe na kufinso ifili ne nsoni, ifituli na lelo. 8 Nomba nduno pakashita akanini, inkumbu ukufuma kuli Lesa, Lesa wesu alishile mu kutusha nafwe batabile abashalapo no kutupela apa kunyanta amakasa muli njino ncende ya mushilo. Mfi fyali fya kwebati Lesa wesu esule amenso yesu no kutupelo kupemwinako panini mu busha bwesu. 9 Pantu tuli basha, nomba Lesa wesu tatulabapo lelo alilundako bucishinka bwa cipangano kulifwe. Alicitefi pa menso ya mfumu yaku Persia epakwebati atupele ifiso fya bwangu, pakwebati tukuule inanda yaku Lesa wesu no kubukulula ifyaonaikileko. Acitile mfi pakwebati atupele icibumba ca bucingo mu Yuda namu Yelusalemu. 10 Nomba mpa, Lesa wesu, nindo tungalabilapo panuma yamfi? Tulilabukileko amafunde yobe, 11 amafunde ayo wapele ku babomfi bobe bakasesema, ulo walabile, "Nji mpanga iimukoyamo no kupoka nji mpanga iikowelele. Yalisombela ku bantu ba muli nshi mpanga nefya mashiku yabo. Balisushamo ukufuma pampela ukufika ukunankwe no bukoweshi bwabo. 12 Kanshi nomba, tekwesha ukupa abana benu abanakashi ku bana babo abalalume, nakambi tekweshapo ukufwaya umutende wabo uulipo ne mikalile iisuma, epakwebati mukakose no kulyefiweme ifya muli njilya mpanga, kanshi efi mwakulenga abana benu ukuikwata inshita yonse." 13 Nangwacabamfyo ifintu fyonse ifyaishile pali fwe pa mulandu waficitwa fyesu ifibipile na pakushininkishiwa kwesu ukukulu - ukutolapo mwe, Lesa wesu, mwalikatilile mfi ukubifya kwesu kwalingile ukupokelela no kutusha abashalapo abapusuka - 14 Bushe nakambi tutobe amafunde yobe no kutampo kukuminkana mu fyupo namba bantu abamuselu? Napo tawakakalipepo no kutupwishishisha pakwebati pekabapo wakushala, nangu umo uwakupusuka? 15 Yehoba, Lesa, waku Israeli, walilungama, pantu twashala kubati nimbalya abapusuka abashalapo ukufika na ku bwelelo. Bona! tulimpano pamenso yobe mu kushininwa kwesu pantu tapapo nangu umo uugeminina pa menso yobe pa mulandu wamfi.