1 Nomba panuma ya mfi, ulo imfumu Ashuerushi ya Pesia yalokuteka, Ezra kaisa ukufuma ku Babiloni. Ifikolwe fyakwa Ezra fyali ni Seraya, Asaria, Hilkia, 2 Shallumu, Sadoki, Aitubi, 3 Amaria, Meraioti, 4 Seraia, Ussi, Bukki, 5 Abishua, Fineasi, Eliasa, uwali umwana waku Aaroni shimapepo mukulu. 6 Ezra kaisa ukufuma ku Babiloni nakambi ye ali uwishibile sana ifyakulembo fya mafunde yaku Lesa ayo Yahweh, Lesa waku Israeli, abapele. Imfumu kaimupela fyonse ifi aipwishe pantu ukuboko kwaku Yahweh kwali pali ye. 7 Bambi pa ba mu ntuntuko shabena Israeli na ba shimapepo, abena Lebi, abakwimba mwi Tempele, abakusunga umulyango, na bonse abatuminwe ukubombela mwi Tempele kabaya ku Yerusalemu mu mwaka wa cinelubali ku bufumu bwaku Ashuerushi. 8 Kafika mu Yerusalemu mu mwenshi wa isano mu mwaka umo wenka.. 9 Kafuma mu Babiloni pa bushiku bwa kubalapo mu mwenshi wakubalapo. Cali ni pa bushiku bwa kubalapo mu mwenshi wa isano uwo afikilemo ku Yerusalemu, nico ukuboko ukuweme ukwaku Lesa kakuli naye. 10 Ezra alibikile umutima wakwe pa kubelenga, ukubomba, no kusambilisha amalamuno ne fipope ifya mu mafunde yaku Yahweh. 11 Nci e cipope ico imfumu Ashuerushi yapele Ezra shimapepo nakambi kalemba wa mafunde yaku Yahweh na malamuno yaku Israeli: 12 "Imfumu ya shamfumu Ashuerushi, kuli shimapepo Ezra, kalemba wa mafunde aku Lesa wa mwiulu: 13 Nkokonkobesha nati uuli onse mu bena Israeli mu bufumu bwandi pamo na bashimapepo babo na bena Lebi abakofwaya ukuya ku Yerusalemu, bangaya nobe. 14 Nebo, nemfumu, nabakabilo bandi cinelubali, namutuma ukuya mukufwailisha palwa Yuda na Yerusalemu ukulingana ne funde lyaku Lesa, ilili mu minwe yenu. 15 Mulingile ukuleta silufele na golide ifi bapela kuli Lesa wakwa Israeli, uwo ubwikalo bwakwe ni Yerusalemu. 16 Mukapele apa lutu yonse silufele na golide ifi abaku Babiloni bapela pamo nefyapelwa lutu na bantu na bashimapepo ku nanda yaku Lesa mu Yerusalemu. 17 Kanshi mushite ingombe, impanga no twana twa mpaanga, nefya busomboshi ne mitulo ya fya kunwa. Mukatule pa lutala ululi mu nanda yaku Lesa mu Yerusalemu. 18 Silufele na golide uwashalako mukaucite ifimukofwaya nabo mulinabo, ukusekesha Lesa wenu. 19 Mukabike ifisolobelo ifyapelwe lutu kuli mwe pantanshi yakwe ku ncito ya nanda yaku Lesa wenu mu Yerusalemu. 20 Fimbi ifyakufwaikwa ku nanda yaku Lesa wenu, mwakupinta ku cipao candi. 21 Nebo, ne mfumu Ashuerushi, napanga icipope kuli bonse abasunga ifipao mu ncingo shonse nakwitala lya Nika, ukweba ati fyonse ifi Ezra amwipusha filingile ukupelwa ifikumanine, 22 ukufika ku matalanti ya silufele umwanda umo, ifipimo fya busomboshi umwanda umo, imilingilo ya mwangashi umwanda umo, ne milingilo ya mafuta umwanda umo, no mucele uwingi. 23 Ifili fyonse ifya kufuma mu cipope caku Lesa wa mwiulu, citeni no kuipelesha pali nji nanda. Pantu nindo ubukali bwakwe bwakwishila pa bufumu bwandi na bana bandi? 24 Tukobeba pali mwebo ukweba ati tabalingilepo ukubikako ifya kutula ne misonko pa bali bonse bashimapepo, abena Lebi, bakemba, abakusunga imilyango, nangula pa bantu abatuminwe ncito ye tempele na basha ba nanda yaku Lesa. 25 Ezra, na mano ayo Lesa akupela, ukasonte ba kapingula na bakalubulwisha abakupingula abantu bonse mu ncingo shonse ukifika na kwitala lya Nika, no kubombela bonse abeshi ifunde lyaku Lesa. Mulingile ukusambilisha na mbo abateshipo ifunde. 26 Ukukanda onse uutakoumfwila ifunde lyaku Lesa nangula ifunde lya mfumu, cingaba kwipaya, ukubasowa mu calo, ukupokwa ifipe, nangula ukukakwa. 27 Lumbanyeni Yahweh, Lesa wa fikolwe fyesu, uwabikile fyonse mfi mu mutima wa mfumu ukucindamika inanda yaku Yahweh mu Yerusalemu, 28 nakambi uwafushishe uluse lwakwe kuli nebo pa cinso ca mfumu, ba kabilo baiko, na bonse bacilolo baiko aba maka. Ukuboko kwaku Yahweh ukwa maka kwalinkoseshe, nande kambunganya intungulushi ukufuma mu Israeli ukuya nande.