Icipandwa 4

1 Eco, pantu Klistu aculile mu mubili, Ipangasheni na mano amo yenka. Pantu onse uwacula mu mubili aleka ulubembu. 2 Icikonkapo cakweba ati, umuntu wa uyo musango, inshita yakwe yonse iya mu mubili, tekalapo mukusekesha abantu, lelo ukufwaya kwaku Lesa. 3 Mwaliposa inshita iikulu sana ukucita ifi aba ku calo bafwaya, ukwikala mubulale-lale, ukukumbwa, ukunwa ubwalwa, ukwangala bubi-bubi mukukolwa-kolwa, ukupepo tulubi. 4 Balabona kubati ceni ukutabakonkapo muli mbu bwikashi bwa bungwa, eci balabilila ifibipile pali mwe. 5 Bakulondolola kuli oyo uuli no kupingula aba mweo naba fwile. 6 Ni pali nci imbila yabililwe naku bafwa, ukweba ati , nangu balipingulwa ku mibili pakuba abantu, bangekala mu mupashi ifi na Lesa acita. 7 Pantu impelo ya fintu fyonse ilipalamime. Eco mulokuba mu mano aya weme, nakambi mulo kukolwapo mukutontonkanya pa mulandu wa mapepo. 8 Ukucila pali fyonse likoso, mulokutemwana umo no munakwe, pantu ukutemwa kulafimba pa membu ishingi. 9 Mulokusungana umo no munakwe ukutalokuilishanyapo. 10 Ngefi umo umo pali mwe apokelela icabupe, acibomfye ukutangatilako bambi, mucicetekelo ukulokulanga inkumbu shaku Lesa mu kufula kwa shiko. 11 Kani umuntu akolabila, cilokuba mu cebo caku Lesa. Kani umuntu akotangata, lekeni cibe cakufuma mu maka ayo Lesa apela. Mulokucita mfi fintu pakweba ati munshila shonse Lesa alokucindamikwa ukupitila muli Yesu Klistu. Lekeni kube kuli Yesu Klistu ubucindami na maka umuyayaya no muyayaya, Amen. 12 Mweba temwikwa, mulokucibonapo kubati ceni icakumwesha mumulilo icicitikile kuli mwe, kubati icintu iceni sana calokucitika kuli mwe. 13 Lelo, nangula mupite shani mu fya kucula fya ku Yesu, kamusekelela, ukweba ati mungesa kusekelela no kusansamuka ulo ubucindami bwakwe bwakufisuluka. 14 Kani bakomutuka pa mulandu we shina lyaku Yesu, mwalishuka, pantu umupashi wa bucindami no mupashi waku Lesa uli pali mwe. 15 Lelo mulekapo nangula umo pali mwe acule kubati cipondo, kabwalala, ncita fibi, nangula kasongelekekanya. 16 Lelo kani umuntu acula kubati mwina Klistu, lekeni ebapo na nsoni; sembi, lekeni alokucindamika Lesa muli ndi ishina. 17 Pantu ino ni nshita yakutampa kwa kupingula ukutatikila mu nganda yaku Lesa. Kani bwatatikila pali fwe, cakuba shani kuli mbo abatomfwilapo imbila iiweme iyaku Lesa? 18 "Nakambi, kani cilikosele kubololokele ukupusuka, cakuba shani kubatasumina na babembu?" 19 Eco lekeni mbo abakocula pa bufwayo bwaku Lesa babike imyeo yabo muli Kabumba wa cishinka pa kubomba ukuweme.