1 Muli nji nshila, mwebakashi mulingile ukuicefya ku balume benu. Mulokucita mfi ukweba ati nangula bambi tabomfwilapo icebo, bangacimfiwa apatapo ne shiwi, ukupitila mu mibo ya bakashi babo. 2 Pantu ninshi balibona imibo ya cishinka mu mucinshi. 3 Nci lekeni cilokucitwa ukutaba kunse ya mubili mu kuikobaika ifili kubati kuluka imishishi, utubangili twa golide, ne fyakufwala fya mutengo. 4 Lelo, lekeni cilokucitwa ku buntu bwa mukati bwa mutima, no kuwama kutashila ukwa kutekanya nakambi mu mupashi uutalalile, eciwamishe mu menso aku Lesa 5 Pantu mfi efi abanakashi ba mushilo akale abalokutetekela muli Lesa balokuicindamika, ukupitila mu kuicefya ku balume babo. 6 Muli nji nshila Sara alokunakila Abraham no kumwita ati shikulu. Nomba mwe muli bana bakwe kani mukocita ifiweme nakambi kani tamukotinapo amakatasho. 7 Mu nshila imo yenka, mwe balume mulokwikala na bakashi benu ukulingana no kwishiba, kubati niku cipe icinakile, umwanakashi. Mulingile ukubapo mucinshi pakuba impyani shinenu ku nkumbu sha mweo. Mulokucita mfi ukweba ati amapepo enu alokumfwika. 8 Icakupelako, bonse mwe , mulokuba no mutima umo, ukulangulukilana, abatemwene kubati banankashi, aba mitima ya nkumbu, abatekentye. 9 Mulokubeleshapo ububi pa bubi nangula insele pa nsele. Mukupusanako, kamutwalilila ukupaalana, pantu nci eci mwaitilweko, ukweba ati mukapyane ipalo. 10 "Uyo uukofwaya ukutemwa umweo no kubona inshiku ishiweme alingile ukukanya ulumini lwakwe ku bubi ne milomo yakwe kuku labila ubufi. 11 Lekeni atalamuke ku fibipile no kulokucita ifiweme. Lekeni afwaye umutende no ku ukonkelela. 12 Amenso ya Mfumu alabona abololoke, na matwi yakwe yalomfwa ukulomba kwabo. Lelo icinso ca Mfumu calipata mbo abacita ububi." 13 Mba ni nani uyo uunga musansa kani mwaba ne cilaka ca kucite ifiweme? 14 Lelo kani mwacula pa mulandu wa bololoke, ninshi mwapalwa mwe. Mulokutinapo ifi bo batina. Mulokusakamanapo. 15 Icilingile, patwileni pa mbali Imfumu Klistu mu mitima yenu ukuba uwashila. Mulokuipekanya cina nshita ukwasuka bonse abamwipusha pa citetekelo mwakwata. Citeni nci mu kufuuka no mucinshi. 16 Mulokuba ne tontonkanyo iliweme ukweba ati abatuka ukwikala kwenu ukuweme muli Yesu basebane pantu bakolabila ifibi pali mwe kubati nimwe ba ncita fibi. 17 Cili iciweme, kani efi Lesa akofwaya, ukweba ati mucule pa kucite ifiweme ukucila pa kucita ifibipile. 18 Klistu naye kacula umuku umo pa membu. Ye umololokele kaculila fwe, fwebatali bololoke, ukweba ati atulete kuli Lesa. Balimwipeye ku mubili, lelo kacitwa uwa mweo ku mupashi. 19 Ku mupashi, alile no kushimika ku mipashi iyo nomba iili mu cifungo. 20 Bali ba bucintomfwa ulo ukutekanya kwaku Lesa kwalokupembela mu nshiku sha kwa Nowa, mu nshiku sha kubasa ubwato, nakambi Lesa kapususha abanini - imyeo cine lubali - ku menshi. 21 Nci ecilangililo ca kubatishiwa icimu pususha nduno - ukutabapo ati kusamba ifiko kwa mubili, lelo ukufwaisha itontonkanyo ilyelele kuli Lesa - ukupitila mu kubuka kwaku Yesu Klistu. 22 Klistu ali ku kuboko kwaku kulyo kwaku Lesa. Aile kwiulu. Bamalaika, abene ba lusa, naba maka bonse kaba munakila