¹ Na hatelanga pokopoko,hurika hetpris ri vapopo turane hurika mugamuga turana bakovi ni lohoka na lo na maka Juda ri nugu tatea e Isu ri habia ne Pailat. ² Lakea e Pailat i nanea e Isu,"Ioe a king ne hurika Juda e?Lakea e Isu i koli maea ngavana,"Ioe o taki pali." ³ Hurika hetpris ri ta kupo lae ne Isu manga i rata potu i kupo. ⁴ Lakea e Pailet i nana tabua e Isu,"Ioe go koli a ngava o uka?Longo i kupo hateka potu ni rata virihi vomu?" ⁵ Pali e Isu kimi kolia ranga ngavane Pailet,na hini nga,Pailet i tahoka ni luhoi i kupo. ⁶ Na tahuna na ni kani dagi i bele,Pailet i puga bakovi na bavi biri pagitala i malamala,manga hini i ngaru ne hurika bakovi a ngatavine. ⁷ Na palane hurika bakovi ni longo taro ngava ni rabalaki a bakovi pololilo na bavi,i tahoka tara a bakovi a rana e Barabas i made. ⁸ Hurika a bakovi a ngatavine ri valai ne Pailet ri nanea ge rata virika maki i rata hosi. ⁹ Lakea e Pailet i koli mule a ngavane ria,"Mua mu ngaru iau ga habi ne mua a King ne hurika Juda? ¹⁰ Iau a lohoka vona tamudi hale ne hurika hetpris na rana ri bolea e Isu i lakea vona. ¹¹ Pali hurika hetpris ri rata e hurika bakovi a ngatavine ri gale tora maea ge pugea e Barabas ge malamala. ¹² Lakea e Pailat i koli mule tabua i ta maea,"Re mua mu ngaru iau ga rata ara na King ne hurika Juda?" ¹³ Lakea ria ri gale dagi tabu maea,"Padi tatea na kai tavalavala." ¹⁴ Lakea e Pailat i koli maea ria,"Ara potu ia i ratea?"Pali ri gale dagi ri ta;"Padi tatea na kai tavalavala." ¹⁵ Pailat i ngaru ni vakaloboa ni ngaru ne hurika bakovi a ngatavine lakea i pugea e Barabas i lakea ne ria.Lakea ia i ru e hurika nugu maheto vona ri hotua e Isu muri ia i habia e Isu nigi padi tata na bolo. ¹⁶ Hurika nugu maheto ri bolea e Isu i dili na nure ne hurika gavman lakea e hurika nugu maheto ri muri vona. ¹⁷ Ri koloa varikia pepol ne Isu na gina a mota i padipadi i manga hat King ri rua na gina. ¹⁸ Ria ri ta biu ne Isu ri ta,"King ne hurika Juda!" ¹⁹ Ri bia gina,ri kalupea,ri pasike puru ri tatami ni turume puru ma. ²⁰ Muri ne ria ri ta biu ne Isu,ri puga vorokia vona a varikia pepol ri vakarodoa vona varikia muga vona,lakea ni bole nigi padi tata na kai i tavalavala. ²¹ Tara bakovi,ia e Saimon o Sairin,tamane Aleksendra turane Rafas.Ria ri ratea ge kalohoa a bolo. ²² Hurika nugu maheto ri bolea e Isu i lakea vona tara tanga a rane Golgota.A vuhuna ngava iea i maea"Tanga ne hurika tuhanga gina bakovi tabuli vonga." ²³ Ria ri ngaru ni habi vona ranga wain ni pulo turana marasin,pali ia kama i ninu. ²⁴ Muri ne ria ri paditatea na bolo e Isu,ri videa a varikia vona ri pilai satu rigi bole takutaku virika mavidana. ²⁵ Na 9 kilok na hatelanga,ri vaka tavorea na bolo e Isu. ²⁶ Na tabekena kai tara,ri herea tara bokona ngava ne Isu maea,"King ne hurika Juda." ²⁷ Turane Isu,ni vaka tavore a panaho i rua,tara na limana kanena tara na limana maurina. ^{28 29} Hurika tara erei ri lakea lakea vona hini nga ri ta biua,"Aa!Ioe kunana o taki maea go puka purua tempel go vakapesi tabua na parava ge tolu. ³⁰ Ioe o kori mule ioe o puru na bolo. ³¹ Na naro i taku,hurika hetpris turana hurika bakovi ri lohoka na lo ri ta biua,"Ia i kori e huriki ranga,pali ia kimi kara ni kori mulea. ³² Rua e Kristo,King na Juda,ge puru mule na bolo teu bara te masia bara te luhoi tora."A panaho rua ru tavore rua ranga ru ta biua. ³³ Na 12 kilok,a uvo dagi i kaftagua malala i vano i lakea na 3 kilok. ³⁴ Lakea na 3 kilok,Isu i gale dagi maea,"Eli,Eli,lama sabaktani?"Vuhuna ngava iea i maea,"Deo nau,Deo nau,navai o pe iau?" ³⁵ Ranga e hurika tara ri pesi tabukoi vona ri longoa ri ta,"Masia,ia i gale Elaisa." ³⁶ Tara bakovi i nunu valai vona i bole a wain i vagole i habi vona." ³⁷ Muri,e Isu i gale dagi i mate. ³⁸ Lakea a lavalava na tempel i mavida tabeke rua i puru liu polotano. ³⁹ Na tahuna a mugamuga na nugu maheto i masia e Isu i mate na dala iea,ia i takitala maea,"Muholi hateka,ra koma iea ia e tune Deo." ⁴⁰ Lakea na hini nga hurika ngatavine ri pesi basi ri matanono.Pololilo ne ria e Meri Makdalin,turana ngatavine,e kinane Jems e Joses,e Salome tara. ⁴¹ Na tahuna ia i tabana o Galili,ri muri vona ri rata kamumua.Hurika ngatavine ranga ri muri lakea vona o Jerusalem. ⁴² Tahuna a malunga i bele,lakea a parava ni pelekado puru virika maki na parava na sabat, ⁴³ Josep o Arimatia tara i bele vonga.Ia tara bakovi dagi na kansol ia i kara ni dava harikinga ne ViriDagi.Ia i lakea ne Pailat i nanea na podane Isu. ⁴⁴ Pailat i turutu maea e Isu i mate pali,lakea i nana matakari na nugu maheto pali re Isu i mate. ⁴⁵ Tahuna e Pailat i longo maea e Isu i mate pali,na matakari ne hurika nugu maheto,ia i habia ne Josep o Arimatia. ⁴⁶ Josep i konea lavalava i bole purua podane Isu na bolo i sivua na lavalava,i rua na matmat karaba na kedo.Lakea ni bole a kedo dagi ni tukari dili a matmat. ⁴⁷ Meri Mekdalin turana ngatavine e kinane Joses ru masia ra hini ni tanu e Isu vona.