¹ Na tahuna e Isu i pea a ruma ni vasileki laho lokovonga,tara murimuri i taki maea,"Vinara,matai ra maka kedo i mata kamumu pali a maka ruma ranga i mata kamumu!" ² Isu i taki maea ,"Ioe o matai ra maka ruma dagi?Uka tara kedo ge tabuli polomeli na kedo tara.Maka kedo lobo biri mapuka puru." ³ Na tahuna e Isu i made na lolo e Oliv,i tabuli na tabeke tara na ruma ni vasileki,Pita,Jems,Jon turane Andru to nanea. ⁴ "Taki mateu,ara parava ra maka maki nga ge bele?Ara kilakila ge bele ni vakasiri maea re virika maki nga bari bele? ⁵ Isu i vakatubu ni taki tou,"Matou moto matadoko.Mege valai tara bakovi mege bole matou ni lakea na dala tara. ⁶ Kupo a bakovi bari valai na ragu bara ri ta,'Iau e Kristo,'Pali ria bari rata marogo e hurika bakovi a ngatavine ri lakea na dala tara. ⁷ Na tahuna matou moto longoa nuverei na vabinga dagi i bele a maka ngava taminga i bele na vabinga dagi,matou nahani luhoi lege lae.Re virika maki nga biri bele,pali a ni lobona malala i tabana. ⁸ Lakea a tara na bakovi a ngatavine bari vaubi turana hurika tara na bakovi a ngatavine ranga,pali a tanga tara bari vaubi turana tanga ranga.Pali a vuruke dagi biri bele na hini ranga, a tanga ranga biri bele a pago dagi.Re virika maki nga i manga ni madihina ngatavine ia i hataki muga na tahuna ni poda koma. ⁹ Matou moto matadoko kamumu,bara ni habi matou lakea na limana tagari bara ni ubi matou pololilo na ruma ni vasileki.Na ragu bara ni vakapesi matou na matana gavana na matana maka king,pali matou bara moto takitala iau. ¹⁰ Pali muga vona ra maki nga,a leho ni takitala a velenga kamumu ge vano ge lakea ne huriki lobo vona malala iea. ¹¹ Na tahuna ni nugu tata matou ni rudu tala matou ni vano,nahani luhoi lege lae na ara ngava motogo rata.Vona ra haro iea,ara ngava go takia,Deo biri habia ne vomu.Kimi ne matou motogo ta,pali a hanu kiripiripi ia bari ta. ¹² Turana bari nugu tatea turana tara lakea biri habia na maka bakovi bara ni ubi mate,lakea e tamana i rata naro i palupu ne tuna.Maka koma bara to rata hale tamane tou e kinane tou bara to rata tou to mate. ¹³ Huriki lobo a bakovi a ngatavine kama rigi ngaru matou na rana matou moto luhoi torea a ragu.Pali erei a bakovi a ngatavine i pesi tora lakea i nugu tata a ni luhoi tora i vano na ni lobona malala,ra bakovi iea ia biri made kamumu. ¹⁴ Na tahuna matou moto matai a maki hale ni vakabele a halenga ni pesi na tanga na hini kimi ge karea ni pesi vona(rua ra viri herea ra makea ia ge palala),erei a bakovi a ngatavine i made o Judia ria rigi ha lakea na maka lolo. ¹⁵ Rua ra bakovi ri made polomeli na mapana ruma ia keme ge puru pololilo na ruma ni bolea tara maki ge pori polovavo, ¹⁶ Pali a bakovi ia na hania,ia nahani ge hamule ge bolea harikia vona. ¹⁷ Pali a ni dodo hateka ne hurika ngatavine erei ri singou lakea e hurika ngatavine ri vakaruru vona ra tahuna iea! ¹⁸ Matou moto vasileki mavonga ra maka maki nga keme ge bele na tahuna na vala na ais. ¹⁹ Nara maka pile bara ri habi a ni madihi i dagi turana ni mava ne hurika bakovi a ngatavine.Ra maka ni mava nga kimi hosi na tahuna e Deo i ratea ra malala iea i valai i harena mona.Pali bari uka ra maka ni madihi a ni mava ge bele muri tabu. ²⁰ Pali re ViriDagi kimi kali mulea a parava,hurika bakovi a ngatavine lobo bara ri velu.Pali e ViriDagi i luhoi e hurika bakovi a ngatavine erei ia i pasi ria ne vona,mavonga ia i kali mulea parava. ²¹ Pali lakea tara bakovi i taki matou maea,'Masia,e Kristo ia koea!'O'Masia,ia i made nga!'Moto nahani luhoi tora vona virika ngava nga. ²² Narana virika Kristo tatami turana profet tatami bari bele kava bara ri vakabele virika sain turana mirakel ni tami e hurika bakovi a ngatavine,pali ria rigi kara,bara ri tami e hurika bakovi a ngatavine e Deo i pasi ria pali nege vona. ²³ Matou moto mata kamumu.Muri ra maka maki nga bari bele manga hini iau a taki matou ngane. ²⁴ Pali muri vona ra maka ni mava nga i bele vona ra tahuna,a haro bari mapulo i uvo a keva tara keme ge para. ²⁵ Maka hada ranga bara ri boru puru valai virika ni tora na hunu bari vakulu. ²⁶ Lakea muri bara ri matai a tuna bakovi bari valai na bubu turana ni tora dagi turana a bagetua. ²⁷ Pali bara i rudu e virika ensel vona lakea ia bari kali palupu e hurika bakovi a ngatavine ne vona na tabekena malala lobo,na ni vakatubuna malala i vano na harena malala i vano na harena hunu. ²⁸ Matou moto bolea ni luhoi na hanuna a kai a fik.Tahuna a rahana a kai a fik i karaba,ia i vakabele a pagana karaba matou moto pala maea ia parava kamumu na haro i valai tabukoi. ²⁹ Palupu manga,na tahuna matou moto matai ra maka hini nga i bele matou moto pala maea ia i made tabukoi hateka na matana geit. ³⁰ Muholi hateka iau a taki matou,hurika bakovi a ngatavine ri made ngane kama rigi mate ma na ara ra hini iau a taki bari bele. ³¹ Hunu turana malala bari lobo pali a ni tagu kama ge lobo. ³² Pali i uka tara bakovi ge lohoka vona parava a kilakila ne nau ni hamulene tuna bakovi maka ensel na hunu lakea e tune Deo ia tara kimi lohoka vona parava a aua ni hamulena tuna bakovi.Virika ensel na hunu e tune Deo kama i lohoka na parava turana aua,pali e Deo Tata kunana ia i lohoka. ³³ Matou moto pasi mata moto mata na rana kama moto lohoka na ara tahuna ra maka maki nga ge bele. ³⁴ Ia i manga bakovi i ngaru ni lakea na tanga basi i pea a ruma vona i ru e hurika voravora vona ni mata kari a ruma.Ia i habi a leho takutaku ne hurika voravora vona ia i ta tora na bakovi ge matakari a ruma vona rigi matakari kamumua. ³⁵ Mavonga matou moto made pasimata na ara matou kama moto lohoka na ra parava ra tahona ruma ia ge hamule valai;mege valai na malunga,o na kururodo o na parava a kilala i tani o na hetelanga liu. ³⁶ Pali re ia ge valai laviriri hateka,nahani ge matai ioe o tabana ni mahita. ³⁷ Ara ngava iau a taki matou ngane,iau a taki e hurika bakovi a ngatavine.Mua lobo liu mu matadoko.