² Jehova wakambula kuli Mozesi, kuti ¹ " Ambula kubantu baIzilayeli alimwi wambe kulimbabo, 'Ndime Jehova Leza wanu . ³ Mutakachiti zintu nzibakali kuchita bantu bamu Ijipiti, ooko nkumwakali kukkalakuchindi chakayinda. Mutakachiti zintu eezyo bantu bamuKkenani, kunyika nkwenjomutola. Mutakatobeli tunsiyansiya twabo. ⁴ Milayo yangu njomuyelede kuchita, alimwi imbeta zyangu nzimuyelede kubamba , ikuti mukeende mulinzizyo, nkaambo ndime Jehova Leza wanu. ⁵ Nkinkaako amubambe milayizyo yangu amilawu yangu. Na muntu wiibamba, uyopona nkaambo kanjiyo. Ndime Jehova. ⁶ Kutabi muntu uswenene afwifwi awaluzubo lwakwe akuvumbula meya. Ndime Jehova. ⁷ Utavumbuli chintanda chabanyoko; mbanyoko, utabavumbuli chintanda chabo. ⁸ Utavumbuli chintanda chabanakazi bawuso nkambo nchitanda chawuso. ⁹ Utavumumbuli chintanda chamuchizi wako, nikuba kuti mwana wawuso musimbi na mwana wabanyoko, nikuba kuti wakakkomenena mumunzi wenu kana kuti kule anduwe. ¹⁰ Utavumbuli chintanda chamwanako mwalumi na mwana wamwana wako wechanakazi, nkaambo chintanda chabo nchintanda chako." ¹¹ Utavumbuli chintanda chamwana musimbi wamwanakazi wawuso, ngwakakomezya mumpuli yawuso, mbukuli muchizako. ¹² Utavumbuli chintanda chamuchizi wawuso, nkaambo nduzubo lwa wuso. ¹³ Utavumbuli chintanda chamukulana wabanyoko nkambo nduzubo lwabanyoko. ¹⁴ Utavumbuli chintanda chamukulana wawuso , nkonkuti utasweni afwifwi abanakwe nkambo mbanyokulu. ¹⁵ Utavumbuli chintanda mukamwana nkambo mwanakazi wamwanako; toyelede kuvumbula chintanda chakwe. ¹⁶ Utavumbuli chintanda chamwanakazi wamukkulanako,nchitanda chamukulanako. ¹⁷ Utavumbuli chitanda chamwanakazi achamwanakwe musimbi, alimwi toyelede kubweza mwana wamwana wakwe mulombe, na mwana mwana musimbi wamwana wakwe musimbi kumuvumbula chintanda chakwe. ¹⁸ Utakwati mwanakazi wamukkulanako mbuli mwanakazi wako wabili akuvumbula chintanda mwanakazi wako kachipona. ¹⁹ Utasweni kumwanakazi akumuvumbula chintanda chakwe kuchindi chakwe chamwezi. ²⁰ Utalali amwanakazi wasimabambanwa wako akulisofwazya anguwe munzila eyi. ²¹ Mutakapedi naba umwi wabana banu kuti bakabikwe mumulilo, kuti mukapayizye kuli Molekki, nkambo tamwelede kusampawula zina Leza wanu. Ndime Jehova. ²² Utawoni amwalumi nyokwe mbuli koona amwanakazi , ayo malweza. ²³ Utawoni amunyama akulisofwazya awe.Nikuba mwanakazi atalipedi koona amunyama ; olo ndupilingano. ²⁴ Utalisofwazyi azezi nzila, nkambo mulizezi nzila inyika zilisofwede, zisi nzyensikatande kunembo lyenu. ²⁵ Inyika yakasofwala, aboobo ndapenzya chibi chabo alimwi nyika yakabaluka bantu bakede mulinjiyo. ²⁶ Nkikaako nywebo amubambe mbeta zyangu amilayizyo yangu, alimwi mutachiti zisesemyo ezi, naba muzyalwe waIzilayeli naba mweenzu ngumukkala awe. ²⁷ Obu mbububi bantu balimunyika mbubakachita abo bamunyika eyi, abo bakakkede omu kamutanasika, alimwi lino nyika yasofwala. ²⁸ Nkikaako amuchenjele kuti inyika itakamuluki anwebo mwakwisofazya, mbuli mbuyakaluka bantu bakali kunembo lyanu. ²⁹ Kufumbwa uchita chimwi chazisesemyo ezi, bantu bachita zintu ezi bayogwisigwa kuzwa mubantu babo. ³⁰ Aboobo mubambe mbeta zyangu mutachiti ziyanza zisesemwa zyakali kuchitwa omuno kamutanasika, ikuti mutakalisofwazyi anzizyo. Ndime Jehova Leza wanu."