¹ Jehova wakambula a Mozesi, kuti, ² ''Kambile Aaloni abana bakwe balombe aboonse bantu ba Izilayeli. Ubabuzye eezyo Jehova nzyakulayilila: ³ Kufumbwa mwalumi uzwa ku Izilayeli ujaya musune, kana kabelele, nikuba wajayila kunze kwamusasa, kuti achite chipayizyo - ⁴ Na tayeta kumulyango wedumba lyakubunganina kuti achipe kachili chipayizyo kuli Jehova katanasika kudumba lyakukombela, ooyo muntu ulamulandu wakutila bulowa, alimwi muntu oyo welede kugusigwa akati kabantu bakwe. ⁵ Makanze amulazyo ooyu ngakuti bantu ba Izilayeli bayoyeta zipayizyo zyabo kuli Jehova kumulyango wadumba lyakubunganina, kumupayizi kuti batule ziipo zyabulyidilane kuli Jehova, kwinda kuti bapayizye zipayizyo alubuwa. ⁶ Mupayizi uyosansiila bulowa kuchipayililo cha Jehova kumulyango wedumba lyakubunganina, uyowumpa mafuta nkambo kanchicho kuti bagwisye bweema bununkilila kuli Jehova. ⁷ Bantu tabachelede kupa zipayizyo zyazikozyanio zyempongo, nkambo bachita aanga mbaamu. Ooyu ngomulazyo unoliwo kwalyoonse kumazyalane abantu babo. ⁸ Welede kwamba kuti kulimbabo, 'Kufumbwa wakwa Izilayili, nikuba kufumbwa muzwakule ukkala ambabo, uupa chipo chakumpilizya nikuba chipayizyo ⁹ alimwi tacheeta kumulyango wedumba lyakubunganina kuti akonzye kupayilila kuli Jehova, ooyo mwalumi welede kugwisigwa kuzwa akati kabantu bakwe. ¹⁰ Na umwi muntu wan'anda yakwa Izilayeli, nikuba muzwakule uukala aakati kabo walya gazi, ndiyoomubusizya bukkali bwangu ooyo muntu uulya gazi alimwi ndiyoomugwisya kuzwa kubantu bakulimbabo. ¹¹ Nkambo buumi bwamunyama bulimulubulowa bwakwe. Ndamupa bulowa bwabo kulindinywe kuti muchite chozezyo kuchipayililo nkambo kabuumi bwenu, nkambo mbulowa ibuchita kubozezya, nkambo mbulowa bubozya buumi. ¹² Nkinkako ndamba kubantu ba Izilayili kuti takwe akati kenu welede kulya bulowa, nikuba muzwakule ukkede akati telede kulya bulowa. ¹³ Kufumbwa wabantu bakwa Izilayili, nkuba kufumbwa muzwakule ukkala akati kanu, uvwima banyama na bayuni belede kulyigwa, oyo muntu welede kutila bulowa bwako alimwi akuvumba anyika. ¹⁴ Nkambo buumi bwamunyama buli mubulowa. Nkinkaako nchindakamba kubantu ba Izilayili, 'tamwelede kulya kufumbwa bulowa bwamunyama, buumi bwamunyama oonse buli mubulowa bwakwe, kufumbwa ubulya welede kutandwa.'' ¹⁵ Imuntu wonse oyo ulya munyama walifwida nikuba wajayigwa abanyama bamusokwe, nikuba muntu uzyaligwa mumonya nikuba muzwakule ukkala akati kabo, welede kusanzya zisamo zyakwe, akulisanzya amanzi, alimwi uyosofwala kusika goko. Eelyo uyosalala. ¹⁶ Pesi kuti tasanzya zisamo zyakwe welede kunyampula mulandu wakwe.''