¹ Lino majulu anyika zyakamana, azyoonse zintu izyakazwide mumo. ² Mubuzuba bwamusanu aabili Leza wakasika kumaninsizya mulimu wakwe ngwakachita, alimwi elyo wakalyokezya mubuzuba bwamusanu aabili kuzwa kumulimu wakwe. ³ Leza wakalongezya izuba lyamusanu aabili akulisalazya, nkambo mulindilyo wakalyokezya kuzwa kumulimu wakwe ngwakachita mukulenga kwakwe. ⁴ Eezi nzizyakachitika atala amajulu anyika, chiindi nezyakalengwa; mubuzuba obo Yahuwe Leza mbwakalenga nyika amajulu. ⁵ Katakwe lusaka lwamuunda lwakaliwo pe munyika, alimwi kakutakwe muunda wamisamu pe wakali wamena, elyo Yahuwe Leza takalina wisya imvula pe anyika, alimwi tekwakali muntu pe sikupanda nyika. ⁶ Pesi sikunkwe wakanyampuka kuzwa aansi akutililila nyika yoonse. ⁷ Yahuwe Leza wakabumba muntu kuzwa kulusuko lwenyika akuyoyela mumpemo zyakwe muuya wabuumi, alimwi muntu wakaba muumi. ⁸ Yahuwe Leza wakabyala chilili kubuzwezuba, mu Edeni, alimwi oko wakabika muntu ngwakapanga. ⁹ Kuzwa kunyika Yahuwe Leza wakachita misamu yoonse kuti imene eyo iyebeka kumenso akubotezya kuchilyo. Ezi zyakabikilizya musamu wabuumi wakali akati kachilili, amusamu waluzibo lwabubotu abubi. ¹⁰ Mulonga wakazwa ku Edeni walikutetya chilili. Kuzwa waawo wakanzaana akuba amilonga yoone. ¹¹ Izina lyawakutanguna ngu Pisyoni. Nguuwo ukunkila munyika yoonse ya Havila, oko kuli ngolida. ¹² Ingolida yayeyo inyika imbotu. Alimwi kwakaliko mundalila abbwe lya onikisi. ¹³ Izina lyamulonga wabili ngu Gihoni. Oyu ukunkila kunyika yoonse ya Kkusyi. ¹⁴ Izina lyamulonga watatu ngu Tigilisi, alimwi ukunkila kubuzwezuba bwa Asiha. Mulonga wane ngu Yufuletisi. ¹⁵ Yahuwe Leza wakabweza muntu akumubikka muchilili cha Edeni kuti achibeleke akuchibamba. ¹⁶ Yahuwe Leza wakalayilila muntu akwambula kuti, ''Kuzwa kumisamu yoonse ilimuchilili ulaangunukide kukwiilya. ¹⁷ Pesi kuzwa kumusamu waluzibo lwabubotu abubi utakalyi, kuzwa elyo zuba notakawulye, nchobeni uyofwa.'' ¹⁸ Eelyo Yahuwe Leza wakati, ''Tachili chibotu pe kuti muntu abe alikke. Ndiyomupangila mugwasyi umwelede.'' ¹⁹ Kuzwa kuvu Yahuwe Leza wakalenga banyama boonse bamumuunda abayuni boonse bamumulengalenga. Elyo wakabeta kumuntu kuti abone akubawuzika mazina. Kufumbwa muntu mbakaziwuzika achimwi chilengwa, ndilyakaba izina lyacho. ²⁰ Muntu wakawuzika mazina kuzivubwa zyoonse zyamumuunda. Pesi kumuntu lwakwe tekwakajanika mugwasyi umwelede pe. ²¹ Yahuwe Leza wakachita kuti ng'onzi impati ziwide amuntu, elyo muntu wakoona. Yahuwe Leza wakagwisya kamwi katumpango alimwi wakajala nyama awo mpakagwisya kampango. ²² Akampango ako Yahuwe Leza nkakagwisya kuzwa kumuntu, wakalenga mwanakazi akumweta kumuntu. ²³ Muntu wakamba kuti, ''Echino chiindi, ooyu ndifuwa lyamafuwa aangu, anyama yenyama yangu. Uyoyitwa ''mukayintu,' nkambo wakagwisigwa kuzwa kumuntu.'' ²⁴ Nkenkako mwalumi uyosiya wisi abanyina, uyojatana amukayintu wakwe, alimwi bayoba nyama yomwe. ²⁵ Boonse bakalimaya, mwalumi amwanakazi wakwe, pesi tibakali abweeme pe.