¹ Lino inzoka kiijisi maanu kwinda bamwi boonse banyama bamumuunda oyo Yahuwe Leza ngwakalenga. Wakati kumwanakazi, ''Mbaakamba na nchoonzyo Leza, 'Tamwelede kulya kuzwa kumunsamu wamuchilili'?'' ² Mwanakazi wakati kunzoka, ''Ngatulalya michelo kuzwa kuminsamu yamuchilili, ³ pesi atala amuchelo wamunsamu uli aakati kachilili, Leza wakati, ''Tamwelede kuulya pe, nikuba kuuguma, na kuti uyofwa.'' ⁴ Inzoka yakati kumwanakazi, ''Ninchobeni tokofwape. ⁵ Nkambo Leza ulizi kuti mubuzuba mbomuyowulya menso aako ayojulika, Lino uyooba mbuli Leza, kuziba chibotu achibi.'' ⁶ Eelyo mwanakazi nakabona kuti munsamu mubotu kuchilyo, alimwi ulabotezya kumenso, alimwi munsamu ulayandika kuti umwi abe musongo, wakabweza umwi wamichelo yawo akwiilya. Mpawo wakapa lubo imwi michelo kumulumi wakwe ngwakali aawe, alimwi wakiilya. ⁷ Menso abo boonse akajulika, alimwi bakaziba kuti bali maya. Bakasuma matu amukuyu akuchita chilivumbyo. ⁸ Bakamvwa musoso wa Yahuwe Leza kayobwenda muchilili muchindi chakubomba kwezuba, elyo mwalumi amwanakazi wakwe bakayuba kuzwa kubuliiwo bwa Yahuwe Leza akati kaminsamu yamuchilili. ⁹ Yahuwe Leza wakayita mwalumi akwaamba kuti, ''Uli kuli ?'' ¹⁰ Mwalumi wakati, ''Ndakumvwa muchilili, mpawo ndayoowa, nkambo ndili maya. Eelyo ndakaliyubika.'' ¹¹ Leza wakati, ''Ngwani wakwambila kuti uli maya? Sa walya kuzwa kumunsamu ooyo ngundakakulayilila kuti utakawulyi ?'' ¹² Mwalumi wakati, ''Mwanakazi nguwakandipa kuti ndibe anguwe, wandipa muchelo uzwa kumunsamu mpawo ndawulya.'' ¹³ Yahuwe Leza wakati kumwanakazi, ''Ninzi eechi nchuwachita ?'' Mwanakazi wakati, ''Inzoka yandeena, mpawo ndawulya.'' ¹⁴ Yahuwe Leza wakati kunzoka, nkambo kakuti wachita eechi ?'' Watukwa webo olikke akati kazivuubwa zyoonse abanyama boonse bamumuunda. Uyoyenda abula bwako, akuyoolya bulongo mumazuba abuumi bwako boonse. ¹⁵ Ndiyobika inkondo akati kaako amwanakazi, aakati kambuto yako ambuto yakwe. Uyowuma mutwe wako, alimwi uyoluma kasiindi kakwe.'' ¹⁶ Kumwanakazi wakati, ''Ndiyovuzya machise mukutumbuka bana; Uyotumbuka bana mumachise. Chiyandisyo chako chiyooba kumulumi wako, pesi uyokwendelezya.'' ¹⁷ Kuli Adamu wakati, ''Nkambo kakuti waswilizya ijwi lyamwanakazi wako, akulya kuzwa kumunsamu, atala azeezyo nzindakakulayilila webo, kuti, utakalyi kuzwa kuli nguwo; ilitukidwe inyika nkambo kako; Uyolya kwinda kumulimu uchisa mumazuba abuumi bwako. ¹⁸ Iyokuzyalila maamvwa amitubetube, alimwi uyoolya izisyu zyamumuunda. ¹⁹ Amitukuta yakubusyu uyoolya insima, kusikila ukabweede kunyika, nkambo kuli njiiyo nkuwakazwa. Nkaambo uli bulongo akubulongo uyobweeda.'' ²⁰ Mwalumi wakawuzika mwanakazi wakwe izina lyakuti Eva nkambo mbebanyina babawumi. ²¹ Yahuwe Leza wakachitila Adamu amwanakazi wakwe zisamo zyechikuumba akubasamika. ²² Yahuwe Leza wakati, ''Lino muntu waba mbuli ndiswe, kuziba chibotu achibi. Lino oobu teelede kuzumizigwa kuti asikile luboko lwakwe, abweze kuzwa kumunsamu wabuumi, awulye apone kwalyoonse.'' ²³ Nkiinkako Yahuwe Leza wakamutandila aanze achilili cha Edeni, akupanda nyika ooko nkwakagwisigwa. ²⁴ Eelyo Leza wakatanda muntu kuzwa muchilili, akubikka kkelubbimu kubuzwezuba bwachilili cha Edeni, efulo limweeka eelyo lyakali kuzyunguluka koonse koonse, kuti likalinde kunzila yamunsamu wabuumi.