¹ Yúmo mamé-uyi wayuka-garaq yaímma aaro-aukapao áqnaabariq-uraa kayuka Yérúsárému-keyiréta, Îtumma yama yáútúmakaraae. ² Wení tisáípóro-annama yiyáámma íma teteq-éta tai-ákúrakuq yiyaa-kake aáwaqa kénaawataq yimónaraae. ³ Yíu wayuka-garaq Yumo mamé-uyí anna-wayukama yeqtí yináábútáámo yiráátiraaáaimma paá yáqtoketa-bowata, aáwaqo náánétama, yiyáámma teteq-umátuweta kénaamiye. ⁴ Yúmo mamé-uyí anna-wayukama, mákéti-bakemmo kéyetama, nommá pétuweta aáwaqa naaréta, abo maarauma nommô nai-nááwímá, táápeqa, kópaa-garaq nói-tataaqo aáwaqo maqmá kénaamma, teteq-umátuweta néwaaomiye. ⁵ Yúmo mamé-uyí-anna wayuka-garaq aaro-aukapaq áqnaabariq-uráá kayukama Îtumma ítaraae, "Nóin-aaitabawaqení tisaípóro-anna wayukama íma yeqtí yináábútáámo yiráátiran-áaimmma kéwaretawaq yemá íma yiyáámma teteq-umátuwetawaq aáwaqa kénaao," tete-ítaraae. ⁶ mará téna timáyímíkaiye, "Naayóbáq-úrámmá Áítáíya keráwátábá árain-aimma timá agaama-kaíne, keráwáqá áráí kayukara-umá atori ínówe téna, Îtogoní ámáanai kwannabi mará-téna wemá agaama-kaíne: " 'Yeráwáqá paá yóyáukake ketíwîqa timá-múte yauyínówe. Abo yeráwátí yirukómá neékaq-uramma mániye. ⁷ maa-márábí káyúkátí yímán-aimmô timáyímémma kéwareta, abo Îtogo-ní ámáan-aimma yinaaé-kéumatuweta, kaaqari mónóq-áímmá kétimatikaae.' ⁸ tiraín- amaan-aimma íma waraa-kake tinaaémma kéumatuweq maa-márábí kayukati ámáan-aimma ítama tuwaayapi maakeq kéwaraae. ⁹ Îtuma timáyímíkaiye, "Îtogo-ní ámáan-aimma tinaaémmô ínó-taba, Náayo-kayukati amaan-aimmô warai-aukapaqa áqnaabariq kéowe. ¹⁰ Móteti tiraíye, 'Enabo-garaq enanó-ni aménábáqa kayoné-umá máo', abo 'Náawamo wení anówa-karaq abowámô timá-taítawa-umáyikenama, min-iniko- wákómá puyíníye. ¹¹ keráwáqá Párásísi-anna wayukama mará-kête, 'Náawamô môra-yataaqo maakéma, emá enanóya enabommá kétimayime, "Maa-tátááqá Îtogomma timuq-yatááqá aménúne téq-tero," ¹² abo keráwáqá mirá tewata, íma yinóboyuma yíwáqna kéowe. ¹³ Mirámô-ommá keráwáqá Îtogo-ní ámáán-aimma títauqa yaamá-kárápeqa, ketinábúmô timátímíkain-amaan-aimma kéwaraae. Taíbaqa keráwáqá mamirán-áímmá wayukama kétimayimewata yemá íma Îtogo-ni amaan-aimma kéwaraae." ¹⁴ Ôqa Îtuma nétúqya kayukama yááyama aikuyikarena timáyímíkaiye, "Maan-aimmá ítaama arútáaro. ¹⁵ Íma môra maapaq-yataaqo wayukagomo mamá arunóbáqó maránnímma, wemmá mamá táwíq-íníbo, wayuka-goní arunóbákémmô paábaqo yáwini-tataakoma wemmá mamá táwíq-iniye." ^{16 17} Mirá-timáyimituwena itata mi-kákémmá abo wení tisáípóro-anna wayukate maréta kémaae naupaq komáá máeta Îtumo wayukamo timáyímítuwan-aitaba wemmá ítáraae, ¹⁸ Îtuma wení tisaípóro-anna anóna-éna timáyímíkaiye, " Kéráwákáráq mamí káyúkámô otekáán-umá íma ítáama kétagaae. ¹⁹ Aáwáqo nainónna-yataako íma wayuka-goní arunnóbáq kummánibo, áyáqnobaq kukéna ayáábáq yáwîniye,min-áitaba emmá íma mamá táwí-íníye. ²⁰ Wayúka-goní arunnóbáq-kémmo yáwini-tataakoma íma íráqóniq-uráiye, minná-goma wemmá mamá Îtogoní aúrakaqa táwígoniq-iniye. ²¹ Mémá aúpáq wayúka-goní arunóbáké táí-auyanamma iténa kebó-yátáákárîq kéena moyámmá kémayena wayúkama ikamímá, kumari-áímmá, ²² kennáé-timá taíbaq yataaqo mayaí-áímmá, wayúka iyáábuqnabuqo-umáyikai aimma, kaaqarimô-ti aimma, wayúkama kaaqari áímmó timáyikai-aimma, maa márábí tátáá-tábámó ôriq umá akai-aaimma, wayúkamo makáíyaa tataakaqo aúraananna-ai aimma, aúmaa mamé kéuye wayúkama aónama mémapaq yuwai aimma abo neginagí aimmo taroq-i aimma, ²³ minná méma arunnópáqké kéuyiye. Mamirán-áíkómá mamá wayúka-goní arummá kégabiraiye. ²⁴ Mikákémmá Îtuma wení tisáípóro-annate mi márúqá yuwéna abo Tááya marukoní waqókáq urááe. Wayúkama íma timónaigaae téna wemá môra naupaq uyáábéqma aúpáq mánaae timmánibo, wayúkama wemmá aónatukaae. ²⁵ Môra inikoma Îtu-taba mi náúpáq maiya ten-aimmo kéitenama, wení ayáámûkomma kuti-wáqkómá arunópáq máitana, uyááténa Îtu-kaq iréna wení aítaupi yama aipaqké awautaiye. ²⁶ Mamin-ínímmá Yéntáiriq inimma, Síríya aukapaq Pónésiyaae te-márúká paáq-urai ini-powana, ayáámûkomma aenaenumá kuti-wámmá kárátuwaikaae-téna Îtumma anegáqnagaq-uráiye. ²⁷ Îtuma mamin-íníkómmá maráténa timámíkaiye, "Iyápórawaqtí aáwaqo mamá iyáákómmo aménúnama íma kanaráq-uráipowaq, Áqnábaqa kemá ketí iyápó-annama, Yíuq-anna wayukama yíménata naamá yímûq-yátukaiyaare," téna timámíkaiye. ²⁸ Mamin--íníkómá Îtumma anónná-uráiye, "Anóko, miná árai-kétenanibo, iyáákómá paá yaare-góní aménápáqkémmá iyápóráwaqo náátúwáiyan-araqtamma áinaniye," téna tiráiye. ²⁹ Abo Îtuma mamin- íníkótábá tiráiye, "Emo kateko aimmo-timá kemmo anónná-umátúwánna aitaba, enayáámûkoní arupiké kuti-wámmá aenaenumá kárátuwaupo, amuq-yatáápíké naópaq kówaao," téna tiráiye. ³⁰ Wemá naópaq uréna aónaimma, ayáámûkoni arupimmá íma kuti-wamma maitana, íráqóniq-umá wannaaráq aa-íwaimma waguréna maitana koma aónaraiye. ³¹ Ánibo mi-kákémmá Îtuma Táiyaa aukapaq-ke yuwéna abo Saíton maruqa maréna, Kéraariq waayûmma maipaq, Tíkápórísi aukapaq uraíye. ³² Môra aamá íma téna, abo aáqa-atiraagurai naaqa, Îtuma wení ayaamma mami-nááqká maraikaae téte wemmá anegáq-nagaq uraae. ³³ Îtuma mami nááqá wayúka-bikemma awîqma áwáábaq wenaamábaq môma akaarena, abo wení ayáánaubi-kaq wiráátima wiqmaréna aamábíraq ánéqkukaiye. ³⁴ Îtuma mûte wîyopaq aónaatuwena, abo awaméq-umátuwena, Árámíki aipikemma, "Epátáá" tiraíye, mamin-áípíkémma minnâ, "Ôtaamá ígiye" kête. ³⁵ Kabêq-itana mami nááqkómá aáqa péé-titana, aamá iténa abo ôyauqkomo ummamô yémáímma, aamá tiraíye. ³⁶ Îtuma yímáámma kéyimena íma wayukama timáyíméro," téna timáyímíqma yoqkeke-immánibo, yeráwáqá anómma timá-wéyááwé uraae. ³⁷ Waayúka ítáma iyánáq-umá ánáátareta mará-tiraae, "Wemá máqte-tataaqa íráqóniq keumayikena, abo yaáqo-atíraraa kayukama-garaq yôyauqo aráápagurai kayukama aamá kéiteta aamá kéte," téta-tiraae.