¹ Îtuma kéqnamma Yíwisi anna wayukatí monoq naupa uyábékurena môra ayáá-karere naaqa maitana aónaraiye. ² Yáimma wayukama Îtumma aatómaq-kéeta yúramma karáqtuweta máqe-urááe. Tabaatimô araaténa ayáá-karere naqo atôbama-kainaatama, yeráwáqá yáátoqma-aimma tiyáákaneta Îtumma aatómaq-urááe. ³ Îtuma ayáá-karere naaqkotaba, máqte kayukatí yúbaq yama itówao titana yama itóumagitana, ⁴ Ániyetena Îtuma wemmô yáátoqma-aimmô tiyáákaneta-o kayukama ítáma yimónaraiye, "Tabaatiráqá wayuka íráqóni-ke áwâqnaa inónama kanaarárábi, aqa wayuka mamá táígoniq-ke yíkaminonama kanaarárábiyo?" titata abo yeráwáqá íma anónná-umá wemmá timámíkaa-bo páátí máqe-urááe. ⁵ Yeráwátí yirunnóbáqá weganokano-kéeta, karere naqa í-gaone-gaone o-naitaba, Îtuma yimônamae kéyautena áyáátaba-kéumayikena, abo anómma yirutábá-umáyíkáraiye. Ayáá-karere naqtaba, "ayáámma arúqtuwaao" titana, arúqtuwaitana min-áyáákómá kanaaráq-itana mayai-mataiye. ⁶ Miráitata Párásisi anna wayukama monoq naaúpake máápaq yáubagureta, abo Érôtimmo waráá anna wayukate áíkuteta nááraq-umá Îtumma ikamínô naimma téite-urááe. ⁷ Mikákémma Îtuma yuwéna wení tisáípóro-rawate Kéraariq nokaayukaqa keowata anô kayuka-namma Kéraariq-kemma, Yútiya-kemma, ⁸ Yérúsárému-kemma, Ituméya-kemma, Yóteniq aukapake nokómmá méraan-abapakekaraq abo Tááya-kekaraq Síton marukake anô kayuka-namma Îtumo kéi-tataaqa ítáátuweta kuyúqmareta Îtu-kaq irááe. ⁹ Anô kayuka-namma ikûyáketa wemmá awetánátá-ínówana Îtuma wení tisáípóro- rawataba nópí-kááré mamá yokaa-umátíkáíyaraq nópí-káárépí máenata íma wayuka kemmá ikûtiketa tiwetánátá-oro téna timáyímíkaiye. ¹⁰ Minnâ táíbaq karí wáyúkámá atóbamayikaimma aónatuweta, náaraq kaarimo yokáá kayukama Îtu-ní aúraq yáátoqma aónáá-nata karímá ánáátatiqkai-kááe téta wenawéqtára wenaqtara-umááeta Îtumma ánékuyineta-urááe. ¹¹ Ááqibo wayukatí yirunnóbáqó kuti-wáámmô máaqe-émámma Îtummo káonetama, mami káyúkámá yotáámitata Îtu-kaq marabí yótípake yiqnommá atéta waáqa-kéeta maráá-téta tirááe, "Emá Îtogoní áanimma máane" téta-tirááe. ¹² Îtuma mamí kútí wákáwáqá kétimayimena íma ketábámá Îtogoní aánikomiye téraq wayukama timáyíméro" téna timáyímíqma yokege-uráiye. ¹³ Aániyetena mikáákémmá Îtuma anubaq maré-kéuyena timáyíkái kayukama anaaé maréta utááe. ¹⁴ Umááwana Îtuma môra tiyaaka-garaq kaayaqá wení kúyotoqa, apósóro anna wayukae téna yíwîqa kéyaayimena, wení mayairaq timáyíkáinata áqnáábariq-uma monoq aman-aimma kéteta ¹⁵ abo wayúkatí yirunnóbáké kuti-wámmô aenaen-umá kárátuwai imamu mayainô kayukama aónama yiwîkaiye. ¹⁶ Môra tiyaaka-garaq kaayaq ápósórómo yiwîqkai kayukatí yíwîqa minna Sáímónitaba Pítaae téna ó-awiqa yamámíkaiye. ¹⁷ Yébétiní áanikoratama Yêmitiyaa Yónitabama Boánésiye téna yíwîqa yamáyímíkaiye. Mamin- áwíqkóní áaimma minná wíyôn-aagon- araare. ¹⁸ Éntaruwe, Pírípiye, Pátáárómiye, Mááqtíyuwe, Tómáátiye, Árápáyásiní áanikoma Yémítinye, Táátáéyásiye, Sáímóniye, yirot anna wayuka-bikene, ¹⁹ abo Yútáásiye, môra awîqa minná Iskáríótiye, naamuroté aamá timá-yaarûtítata Îtumma ikááka naare. ²⁰ Mikáákémmá Îtuma yauweréna naaôpaq kouraiye. Kéqnamma anô kayuka-namma yama áíkutaae. Wegááraq wení tisáípóro-anna mami káyúká- bíqtábá-owana íma yeráwáqá aáwáqá naino kanaama wáqe-uraiye. ²¹ Mamin-áímmá wení anoboyu-garaq aunabaqa ítáátuweta Îtu-taba aqnô-kari mayaiye timátuweta awiraibaq maréta-urááe. ²² Abo tiyááka aaman-aimmô ítááma arûtaraa kayukama Yérúsárémuke kukéta tirááe, "Arunnôbaqa kuti-wákáwákóní anômma, Bérísápap máenabowana akoqnáá ámítana kuti-wákáwáqá wayúka-bikemma aenaen-umá kégaratuwaiye" téta Îtu-tabama tirááe. ²³ Miráátewana Îtuma yááyama yíqkaarena wáéqma-itain-aipike maráátena timáyímíkaiye. "Náaraq-umá Sátánima yotéqma Sátánimma ikámma waqtuwániyo? ²⁴ Ááqibo môra marukaq wayukamô kaumo-kááyaqpi koyaataqku-yayaataqku étama, kanaaráq mi-marukaq wáyúkámá itóuma akoqnáá-ínô? ²⁵ Abo môra anna-wayukamô yatááqma nékaq-nekaq étama, kanaaraq min-ánná wáyúkámá itóuma akoqnáá-umá máinô? Ímiye. ²⁶ Abo miráárán-umá Sátáánimô weíyáán-aiqo mamaarénama, wemá íma itóuma akoqnááma-íníbo wení akoqnáá mikáq ánáátaniye. ²⁷ Áráímma íma môra-waigo imaamu-nákóní naammá yawîtima wení oótamma moyámmá maaména perániye. Áqnáabaqa naakóní aboámmá imamukutuwéna yáqtoqma ánnáma áíyayaakaq atáutuwenama abo wení naammá yawîtíma oótamma mayániye. ²⁸ Árain-aimma timátímúne, máqte kumiq-aaikaraq taí-aimmo tiráiyamma, paá Îtogoma matuwániye. ²⁹ Miráimmanibo náawamo Aokaq-Aágótábámô taí-aimmô timá awáágutuwema, mi kúmíqá íma Îtogoma matuwáinana mi kumiqko paá weté matûqmatuq-íníye. ³⁰ Yeráwáqá kuti-waqkoma arunnóbáqá máiye téta ten-aitaba wemá wáéqma itain-aipike timáyímíkaiye. ³¹ Îtuní anówa-garaq aunabaqa yamaa máápaq maeta abo ³² anô kayukanamma naaun-arunnóbáq iqkúyaqkara-wanabowana, yáimma wayuka-raq timáyíkáwata mûtimamikaae. "Enaanó-garaq enaunabaqa emmá aónaneta yamááe" tewana, ³³ Miráá tewana, Îtuma maráá téna ítááma-yimónaraiye, "Náawawa ketinó maitanawaq abo ketúnabaqa náayuwabiyo?" ³⁴ Maraq wemmô yáútúyaqkara kayukama yimônamae kéyautena maráá téna tiraiye, "Mannámô tiqkéta máa kayukama minná ketinó-garaq ketúnabaqa maae." ³⁵ Náawamô Îtogoní aqkáí-áqkáí ááímmô waráínna iniqko-waqkoma, wemá ketímanaaqa, ketíbâqa-garaq ketinó miye," téna Îtuma timáyímíkaiye.