¹ Yaq imaqbaban, yaqgo gamuk ta asor usaqta na in kazaq. Ne Iyahta anan ginad dimniyan. Gamuk na ya ne gimen timar tonta. Teq ne gamuk na anadin emad dumunmo toqos daqay haqad ya a ta mar tonnan ituw a hiqiyaq. ² Mataw gihol abatan asan urotgo bilaqayta na gigo ne gihol waz naqmo hiqiyiy. Na in bilaqne gaun karuw asan mugtitay nog iyim in mataw gisan miqin tonayta. In bilaqay, I mataw gisan urotsaq in God ago dauhibta iyay haqayta. ³ Haiqgam. Igmo God ago dauhibta iyim toqosauqta. Igmo God ago Bugaw Dumunta amalib God ayon lotu emauqta. Ad Krais Yesus amomo i gilumsihan i in abin uluwauqta. Teq i ginad emauq, Gisan akabiyan kabemmo emayta na asit a higilimsihdaq haqauqta. ⁴ Ari gisango daq nagan mataw gilumsihdaqta iyid ya kaziqmo tidimniy nagta. Mataw asor gisango daq kabemmo emim in ginad emay, Daq kaqmo i tigilumsihdaq haqayta. Teq gisango daq na gigo ya mataw na giquriyamim ya ihol abin tidimniyim usta. ⁵ Ya inen iqeman yaqgo kam 8 nazaq tiqiyan mataw ya isan urotiyta. Teq ya Benzamin asesan araq iyim ya Israel mat diqta araq. Nazaq iyan ya Hibru gigo ned watwatmota. Teq ya Farasi araq iyim ya God ago maror Moses bilamta na anononmo muzinyaiqta. ⁶ Ya God ago kabiy emnan zaway diq iyim ya Yesus ago on mataw gimuzad gimiqin tonyaiqta. Teq ya God ago maror Moses bilamta na ago gunun muzin bugsaq mataw ya ilum kemim yaqgo afaqan araq ahol a hiwaqad in ya inan mat titnonta haq yaqayta. ⁷ Kaziqmo ya inad emyaiq, Ya Juda gigo maror muzin bugta na ago God tiqiwaqdaq haqyaiq. Ta teq muran ya Krais ago tuhurit kemim ya gisango daq bunmo emta na in bilaqne nagah samanta nog tiqiy. ⁸ Helmo ya bilaqaiq. Ya ibin dumunta usta na ya inadib in nagah diq a haiqta. Ari yaqgo Iyahta Yesus Krais ago ya tuhuritta naqmo in nagah heltaqmo. Ya Krais amomo ago hib soqotnan haqad nagah bunmo ya inad wazta na ya tuhulos bug. Ad Krais amomo ilumsihdaq haqad ya gunun akabiyan kabemmo emta na ya inadib in bilaqne naga hekbel dadaq asan nog tiqiy. ⁹ Ya Krais amomo ago hib soqotnan inad bilaqaq. Ad ya God ago maror Moses bilamta na muzinad matawmo gigo hib ihol abin titnonta waqnan inad a hibilaqaq. Haiqgam. Ya Krais anan helmo haqeq God-mo ago hib ibin titnonta waqnan inad usaq. Gibin titnonta na mataw Krais anan helmo haqsaq God-mo in gibin na negaqta. ¹⁰ Ya Krais ago hurit kemnan inad iyahmo usaqta. Teq God ago zaway Krais wazan eramta na ya iholib loyinanmo. Ad Krais santitiy sorta nazaqmo ya in ago santitiy na asor sornanmo. Ya nazaq emeq teq Krais santitiy sorim le in momta nazaqmo ya in asen muzeq in amta nazaq ya emnanmo. ¹¹ Ya ihol nazaq bibewunad oseq teq Krais hodhodab eramta nazaqmo ya hodhodab useq tiqeraqdaiqmo haqaiq. ¹² Ya Krais ago daq naway na giwaq bugan tiqiyunin nazaq ya a hibilaqdaiq. Teq ya mat dumun tiqiy hasta nazaq a haiqmo. Krais Yesus ya iwaqan ya in ago tiqiyta. Nazaq iyan muran ya in ago daq nagan wazeq ihol ugid yaqgo tiqiy bugdaq haqad ya iholtuw bulad tiluwaiq. ¹³ Ya imaqbaban, ya inad kazaq emaiq. Ya Krais ago daq nagan a hiwaz bugaiqta haqaiq. Teq daq amilikmo ya emaiqta na in kazaq. Kabiy daq bunmo ya ibun ban tilahta nagan anan ya idek zizalsaq nagah dumunta ya ibun ban usaqta naqmo ya waznan iholtuw diq bulaiqta. ¹⁴ Ya zaway diq iyeq sibeq le God yaqmen tow eman usaqta nab gatiqeq naw dumunta na tuwaqdaiq haqad ya iwaz meqniyim iholtuw bulad luwaiqta. Naw na God ya ililewunan ya danteq Krais Yesus yaqmen amta na muzineq gale Heven-ib tiqiyeq teq ya tuwaqdaiqta. ¹⁵ Ari on mataw ginad tizilimta na, i bunmo ginad nawa ya tibilayta nazaqmo usan. Ad ne ginad ta araq usid teq God giqisuhunid ne ginad tiqem has daqay. ¹⁶ Teq nagah bunmo ago i ginad tiqem hasauqta naqmo i waz naqmo hiqiyad adaqan amuq. ¹⁷ Ya imaqbaban, ne ya isen muzeq ya daq em nogmo ne emiy. Ne izaq luw os daqayta na ago i tigibilen bug. Nazaq iyan mataw i gisen muzad daq emsaq ne gibiy kemiy. ¹⁸ Na izaqgo mataw kabemmo Krais ago kruse gihar ugad osayta. Ya imeq kabemmo ne gidek wazad mataw na ginan tigibilenta. Ad muran ya a ta gibilen tonad ya imeqil woqaq. ¹⁹ Mataw na oseq teq tihiqiy daqayta. In gihol ginadmo bilaqne in gigo god nog iyan in daq amo amo ameqbay inaqta emad luwayta. Teq in gimeqbay a hiwoqaqta. Haiqgam. In gihol abin uluwad ginad dimniysaq osayta. Mataw naqanta in og ka ago nagahmo ginadin emayta. ²⁰ Ari igmo i on mataw Heven-ibta. Mat i gilumsiheq ta giwaqdaqta na amatin in saw nabmo oseq teq a ta guwoqdaqta. Na i gigo Iyahta Yesus Krais-mo. I in abaq tonad gihol misisisaq osauqta. ²¹ In ago zaway ayahta amalib nagah bunmo giqemid ahenib tiqiy bugdaqta. Ad in ago zaway naqmo amalib i gihol miqinta ka emid inmo ahol anuwanta nog iyeq dumun diq tiqiydaqta.