¹ Nazaq iyan ya imaqbaban dumunta, ya tibilayta nazaqmo ne Iyahta ago hib soqoteq giwaz meqniyeq turiy. Ya ne ginan inad bilaqsaq ya ne gibiynan igem gaqaqta. Ne bilaqne yaqgo kabiy anawun dumun diqta nog iysaq ya ne ginan inad tidimniyaqta. ² Teq ya on giger Yuodiya ayow Sintike inaq ginan inad meqniysaq ya kazaq aturanmo gibilenaiq. Ne giger Iyahta ago on iyim iyan ne gigem amilikmo iyeq osiy haqaiq. ³ Ad mat ni yaqgo iteqsor diqta na ya ni kazaq nibilenaiq, Ni on giger na gilumsih haqaiq. In giger ya iteqsormo diq iyan i agaribmo Yesus awagamun dumunta na akabiyan emyauqta. Saq Klemen teq ya iyogniz ta asor ya ginaq kabiy emyauqta na in on giger na ginaq kabiy em yaqaytamo. In bunmo ginan God ago buk mataw kayeqmo tuteqmo os daqayta ginan usaqta nab mar tonan usaq. ⁴ Ari ne bunmo Iyahta ago hib tisoqotim osad iyan tuteqmo ne ginad dimniysaq osiy. Ya gamuk na a ta bilaq tonan. Ne ginadmo dimniyan. ⁵ Teq ne tok nemeq kiskismo ossaq on mataw bunmo ne gigo daq na ahol waq kemiy. Iyahta ne gigerabmo diq osaqta. ⁶ Saq ne nagah araq anan ginad himeqniyan. Haiqgam. Ne gigo kabiy daq bunmo ago ne God bulonad susumun ugiy. ⁷ Ne Krais Yesus aholib soqotim inaq ossaq God-mo ne gigem ginad wamuzsaq ne gigem kiskismo tuqusdaq. Saq afaqan ne giholib gatiqsaq ne izaq tonim gigem kuteh nemaqta na ago ne a hihurit daqay. ⁸ Ya imaqbaban, yaqgo gamuk ta asor usaqta na in kazaq. Ne ginad kazaq emad osiy. Naga daqin in helta teq in abin dumunta teq in titnonta teq in anumlan haiqta teq in awaq dumunta teq in ulilab emnanta, daq naqanta bunmo ne anadin emad luwiy. Daq dumdumun diqta teq daq bunmo i abin wazid eraqnag diqta nagan bunmo ne anadin emad adaqan emiy. ⁹ Daq emnanta na bunmo ya anan gibilenan ne huritim tuwaqiyta. Teq ya daq na bunmo emsaq ne yaqgo hib ahol tuwaq kemiymo. Nazaq iyan ne daq dumdumunta nagan emsaq God i gigem eman kiskismo usaqta na in ne nenaq toqosdaq. ¹⁰ Kam sisaq nog ne ya inan ginad meqniyaqta na ya asit a hi loyinta. Helmo ne ya inadin em yaqayta teq ne gigo dan hiqiyyaq. Ari muran Iyahta ne gimen dan eman ne ya tiqilumsihay. Nazaq iyan ya inad diq dimniyaq. ¹¹ Teq ya nagah ago siqim iyim osta na ago ya a hibilaqaiq. Haiqgam. Ya nagah osgo inaq o haiq na ya inad a himeqniysaq ya igem dumunmo usaqta. ¹² Kam asor ya mat inaq haiqta nog osaiqta. Ad kam asor yaqgo nagah kabemmo inaq iyim osaiqta. Kam asor ya dadaq kabemmo neqaiqta. Ad kam asor ya zarow diq iyim osaiqta. Teq ya kam bunmo igem dimniysaq osgo adaqan na ya tuhurit kem. Nazaq iyan ya nagah kabemmo inaq iyim osaiqta na ago ya a hibilaqad ya igem dimniysaq osaiqta. Ad ya nagah kabemmo ago siqim iyim osaiqta na ago ya a hibilaqad ya igem dimniysaq osaiqtamo. ¹³ Krais-mo ya zaway yagsaq ya kam bunmo igem dimniysaq osaiqta. ¹⁴ Teq ne yaqgo afaqan na gihol ugim soran ya inad tidimniyaq. Na ne daq dumunta emay. ¹⁵ Ne mebmebmo Yesus awagamun dumunta huritiyta nab ya ginaq osim teq ya eraqim saw Masedoniya hulosim lehsaq Yesus ago dauh araq ya a hiqulumsihiy. Haiqgam. In yaqgo hib nagah tuwaqim teq in amenin emim nagah araq a hiyagiy. Kam nab ne gimomo ya ilumsihiyta. Na ne Filipay on mataw, ne tuhuritiyta. ¹⁶ Teq ya ne gihulosim le uliq Tesalonaika-ib kabiy emad nagah ago siqim iysaq ne ya ilumsihim teq ne a ta ilumsih toniy. ¹⁷ Teq ya ne gigo nagah anan a hisunaiq. Haiqgam. Ya inad kazaq emaiq. Ne ya ilumsihsaq ne gigo daq dumunta na anon kabemmo tisorqendaq haqaiq. Saq abeb God ne gigo daq anon kabemmo na ahol waqad in amenin dumunta tinegdaq haqaiq. Na ago ne ya ilumsihan ya inad tidimniyaq. ¹⁸ Ari Epafroditus ne gigo naw waq bolim ya ibenab tiqam. Eman ya ne gigo nagah na waqan in tiqiyunin. Nagah ne waq daqyta na ne uriyamim nagah asor bunta inaqmo ne emiy. Ne gigo naw na bilaqne faq aqasin ahuran dumunta nog iyan God tamaz na waqim agem dimniyaq. ¹⁹ Teq yaqgo God ago nagah dumdumun diqta bunmo Krais Yesus ago hib usaqta. Nazaq iyan ne Krais aholib soqotim inaq ossaq nagah bunmo ago ne siqim iyayta na God-mo negid tigiyunindaq. ²⁰ I Gimam God abin tuteqmo kuluwa-kuluwmo uluwuq. Hel diqtamo. ²¹ Ya ne gigo hib on mataw Krais Yesus aholib soqotim God ago on mataw tawonta iyim osayta na bunmo yaqgo zeq dumun ka in nagaiq. Saq ya imaqbaban Krais ago on mataw ya ginaq kawa osaiqta ka in zeq dumun ne negaymo. ²² Teq God ago on mataw tawonta kab osayta na bunmo in gigo zeq dumun ne negad in gilikmanib mataw asor Sisa ago bitab kabiy emayta na in ne ginadin emad in gigo zeq dumun eman nawa lehaqmo. ²³ I gigo Iyahta Yesus Krais agem dumunta ne bunmo negan. Nawaqmo.