¹ Ari ne Krais aholib soqotim inaq osad ne gigem zaway iyim osayta. Ossaq Krais ne ginan anad bilaqsaq ne gigem kiskismo usaqta. Teq God ago Bugaw Dumunta ne bunmo giduganib ussaq ne gigem dumunta mataw negad ginan ginad meqniyaqta. ² Ne nazaq emsaq ya ne ginan inad tidimniyaq. Ari ne gigo daq dumdumunta na ulumsiheq ne ginad amilikmo usaq araqibmo an anan ginad bilaqsaq osiy. Osad ne gigem amilikmo usaq ne ginad amilikmo usanmo. Ne nazaq emsaq teq ya ne ginan inad tidimniy naqmo diq hiqiydaq. ³ Ne negmo gihol anadin emad gibin ayahta waqgo hiqemiy. Haiqgam.Ne gihol wazid woqsaq an abin uluwad an ahenib iyeq osiy. ⁴ Ne negmo gihol ulumsihgomo daq hiqemiy. Haiqgam. Ne giyogniz ginadin emad in gilumsihiymo. ⁵ Krais Yesus anad usta nazaqmo ne ginad usan. ⁶ In God diq iyim osta. Teq in gigo ban ulilibta na anad a hiwaz. ⁷ Haiqgam. In gigo ban ulilibta na hulosim in abin wazan woqan in kabibiy mat samanta abin waqim ahol ug. Ugad in mat diq asan waqim bo tugatim. ⁸ Gatiqim in mat diq iyim osad ahol wazan woqsaq in God-mo aqez muzinim lehmo tumom. Teq in danteb dumuntab a himom. In ayibmo dom wolan momta. ⁹ In nazaqmo ahol abin wazan woqan teq God in abin wazan ulilibmo diq iy. Ad God in anan araq mataw bunmo ginan uriyamta na tuqug. ¹⁰ Ugan teq mataw bunmo Heven-ib osayta na teq og kab osayta na teq og aduganib osayta nagan bun diqmo in Yesus anan biyad teq in ayon abakbakan tuqulum laquw daqay. ¹¹ Ad in bunmo bilaq daqay, Yesus Krais in Iyahta haq daqay. Haqsaq Amam God abin ulilibmo diq galeh tuqusdaq. ¹² Ari ya iyogniz, negmo teq kazaq emiy. Ne yaqgo nan hurit yaqayta nazaqmo ne muran em tutad osiy. Teq ya ginaq ossaq ne nan huritiy haqad ya a hibilaqaiq. Haiqgam. ¹³ Muran kam kab ya ne gihulosim uliq kab pesanmo ossaq ne ya iqez ka hurit naqmo hiqiyiy haqaiq. Ne ginad emiy. God-mo ne gimuganib kabiy emad in ne ginad wazan eraqsaq in anad usaqta nazaqmo ne kabiy daq emayta. Nazaq iyan God ne giwaqnan haqad gimen danteq amta na ne muzinad gihol anononmo wamuzad ne rabad gihol harara nemsaq danteq na muzinad luwiy. ¹⁴ Kabiy daq bunmo ne emad na ago ananin kabemmo ne bilaqad an himugiy. ¹⁵ Ne nazaq emad oseq teq ne gigemab ginumlan hiqiysaq afaqan araq a hiqem daqay. Haiqgam. On mataw miqmiqinta muran kam kab osayta ka gilikmanib ne God ago onmin dumun diqta iyeq toqos daqay. Osad on mataw na daq hihiq emsaq ne os dumunta kayeqmo os tut daqayta na agamukan tigibilen daqay. ¹⁶ Ne gamuk dumunta na gibilenad ne bilaqne ulig ulilib oyaqta nazaq nog ne on mataw God gileh ugayta na gilikmanib oyad toqos daqay. Ne nazaq diq emid teq Krais ta boldaqta akaman nab ya ihol abin uluwad biladaiq, Ya kabiy samanmo a hiqem haqdaiq. Ad yaqgo zaway zaway hunegan le saman a hiqiy haqdaiq. ¹⁷ Ne Yesus anan helmo diq haqad God ago kabiy emad ne gihol bunmo tamaz nog God ugayta. Saq abeb mataw ya inol emid inedan wain ayun nog ne gigo naw na amalib wazbalid woqsaq i agaribmo gihol tamaz nog God tuqugam. Ya ihol nazaq diq loyinaiqta teq ya inad a himeqniyaq. Haiqgam. Ne ya inan ginad dimniysaq ya inad tidimniyaqmo. ¹⁸ Ad nazaqmo ya ne ginan inad dimniysaq ne ginad dimniyanmo. ¹⁹ Ari Iyahta Yesus anad bilaqid teq ya Timoti emid nawa ne gigo hib hidmo tilehdaq. Leheq in mileq ta boleq ne izaq osayta na awagamun ibilenid ya igem zaway tiqiydaq haqad. ²⁰ Yaqgo mat araq Timoti nogta haiqgam. In anad ya inad nog iyim in ne ginadin diq emaqta. ²¹ Mataw asor bunmo in gimo gihol anadin emad in Yesus Krais ago kabiy anadin diq a hiqemayta. ²² Teq negmo Timoti ago tuhuritiyta. In mat atuw inaqta. Amun amam ulumsihaqta nazaq in ya ilumsihsaq i agaribmo Yesus awagamun dumunta akabiyan emauqta. ²³ Nazaq iyan ya bit kab ossaq yaqgo hazizir le izaq iyid ya ahol waqad teq ya Timoti emid hidmo nawa ne gigo hib tilehdaq. ²⁴ Teq ya inad emaiq, Asit naqmo Iyahta yaqmen dan emid ya ne gigo hib tilehdaiqmo haqaiq. ²⁵ Teq ya inad emaiq, Ya Epafroditus ne gigo hib emid in mileqeq ta lehdaq haqaiq. Na in ya imaqbab nog iyim ya inaq i araqibmo kabiy emad Yesus ago bab ginaq an wolauqta. Kaziqmo ne mat na yaqgo hib eman bolim in ya ilumsihad osim bo muran tiqiy. ²⁶ Iyim in muran ne gibiynan anad diq meqniyaqta. Ad in moqad usta na ago ne huritim ginadnad emiyta na ago in agem afaqan iyaqmo. ²⁷ Helmo in moq waqim tumoqnan tonta. Teq God in anan anad meqniy. Anad meqniysaq in Epafroditus amomo anan anad a himeqniysaq in ya inan anad meqniymo. In anad kazaq am. Pol irquran osaqta na ago afaqan sorsaq in ayow na moqid ago afaqan na ayah diqmo isihdaq haqad in Epafroditus ulumsihan a himom. ²⁸ Nazaq iyan ya in emid ne gigo hib lehnan inad ayahmo bilaqaq. In ne gigo hib lehid ne ahol waqad teq ne ginad dimniydaq. Saq ya ne ginadin emad inadnad kabemmo emaiqta na asit tihiqiydaq. ²⁹ Naza qiyan in le ne gigo hib gatiqid ne ginad dimniysaq Iyahta abinib in waqiy. In Krais ago kabiy aduganib moqnan tonta. ³⁰ Ne ya ilumsiheq yaqgo kabiy ka asor a hiqem daqayta iyan in ameq wolnetnan haqad inmo ahol nog hulosnan ton. Nazaq iyan ne mat naqanta gibin tuquluw daqay.