¹ Ne God ago onmin iyan in ne ginan anad diq bilaqaqta. Nazaq iyan ne in asen muzeq in daq em nogmo ne emiy. ² Ad Krais i ginan anad bilaqsaq in i giyon ahol nog hulosta nazaqmo ne an anan ginad bilaqsaq osiymo. Na izaqgo Krais ahol tamaz nog God ugan God ameb in bilaqne tamaz ahuran dumunta nog iyan in huritim anad diq bilamta. ³ Teq ne an haresmo hureqeq inaq hiqusiy. Ad ne daq anumlan anumlan inaqta bunmo hiqemad mataw asor gigo nagah hiqutetiymo. Daq nawa ya ginan bilayta na ne aban emsaq in abin asit ne gilikmanib higatiqan. I God ago on mataw tawonta iyim i nazaq wastitayeq osamta. ⁴ Teq ne gamuk miqinta teq gamuk agadanta teq gamuk akamolmolin inaqta miqinta nagan ne hibilaqiy. God ago on mataw gamuk naqanta a hibilaqayta. Haiqgam. Ne gamuk miqinta na hulosad gamuk dumuntaqmo amalib God eseymo ugiy. ⁵ Ne gamuk ka huriteq ginad diq em hasiy. On mataw an haresmo hureqim inaq usayta na teq mataw daq anumlan inaqta emayta na teq mataw nagah haresmo utetayta na in God ago maror aduganib gibin haiqta. Mat nagah haresmo utetaqta na in bilaqne god katiyta abin uluwaqta nazaq nog iyaq. Mataw naqanta nagan bunmo in God ayow Krais inaq gigo os dumunta nab le a higatiq daqayta. ⁶ Ne gihol waz naqmo hiqiyiy. Luweq mat araq kat negad ago gamuk samanta gibilensaq ne muzin daqay. Ne nazaq hiqemiy. Mataw gamuk samanta muzinad God ago gunun othasaq God in ginan agem meqniysaq faq negaqta. ⁷ Nazaq iyan ne mataw naqanta giholib hiqiyad nenaq araqib hiluwiy. ⁸ Kaziqmo ne romriqab osiyta. Ari muran ne Iyahta aholib tisoqotim ne inaq saw anuwanib toqosay. Nazaq iyan ne on mataw saw anuwanib luwayta nazaq nog ne luwiy. ⁹ Na izaqgo ne saw anuwanib daq emsaq saw anuwan naqmo in ne gigo daq dumdumunta teq ne gigo daq titnonta teq ne gigo daq helta nagan bunmo giqeman anon kabemmo tisorqenaqta. ¹⁰ Teq nagah daqin ne emsaq Iyahta anad dimniyaqta naqmo ne nagunad luwiy. ¹¹ Mataw romriqab osad daq samanta emsaq ne gilumsihad ginad hiqemiy. Haiqgam. Ne gigo daq dumunta naqmo amalib ne mataw gigo daq miqinta emid ulal iyan. ¹² Na izaqgo daq hares mataw ulilemim emayta na in miqin diq iysaq i giqezabmo bilaqnan gimeqbay woqaqta. ¹³ Ari nagah bunmo saw anuwanib gatiqimmo ulal iyaqta. Nazaq iyan saw anuwan naqmo in daq bunmo alulin eman ulilab gatiqaqta. ¹⁴ Daq naqmo ago mataw bar wazad kazaq bilaqayta. Mat ni usaqta na ni eraq haqayta. Eraqeq ni hodhod huloseq asan ban gatiq haqayta. Gatiqeq ni Krais ni Krais ahol anuwanib os haqayta. ¹⁵ Nazaq iyan ne gihol wamuzad luwiy. Ad ne mat anad haiqta luw nog hiqiyiy. Haiqgam. Ne bilaqne mat anad inaqta luw nog iyiy. ¹⁶ Muran kam kab daq miqinta haresmo gatiqim tilehaq. Nazaq iyan ne kam abu hiqulumad ne God ago kabiy em naqmo hiqiyiy. ¹⁷ Ad ne agadan hiqiyad Iyahta anad izaq usaqta na ago ne ginad em haseq nazaqmo ne emiy. ¹⁸ Teq ne yuq aturanta ayahmo uluwad gimaqbel hihulosiy. Haiqgam. Yuq na mataw ginad wamuzsaq in daq hiqemnanta emad in gimo gihol miqin tonayta. Ari negmo teq ne God ago Bugaw Dumunta ban ugid in ayahmo ne giholib usad ne ginad wamuzan. ¹⁹ Saq ne gimaqbaban nenaq humab woleq lotu abarin teq Buk Song-ib bar usaqta na teq bar asor Bugaw Dumunta ne giholib eman gatiqaqta nagan ne wazad osiy. Osad ne Iyahta ayon bar nagan wazad ne gigemabmo diq in abin uluwiy. ²⁰ Teq ne giholib daq bunmo gatiqaqta na ago ne i gigo Iyahta Yesus Krais abinib i Gimam God esey ugiy. ²¹ Krais ne gibiymuzsaq ne in wazinad ahenib iyeq osiy. ²² Teq ne on mat tuwaqiyta na, ne Iyahta ahenib iyim osayta nazaq ne gidugniz gigenib iyeq osiymo. ²³ Na izaqgo mat in aweq afiqinta. Bilaqne Krais in on mataw inmo nan huritayta na gigo gifiqin iyim osaqta nazaq nog. Teq Krais in ago on mataw na gilumsihim giwaqan in Krais anon nog iyim osayta. ²⁴ Ad Krais ago on mataw in ahenib iyim osayta nazaqmo on in gidugniz gihaqenib iyeq in ginad muzin bugiy. ²⁵ Saq ne mataw aw tuwaqiyta na, ne giqonan ginan ginad bilaqan Krais in ago on mataw ginan anad bilaqsaq in gilumsihnan haqad ahol nog hulosta nazaqmo ne giqonan ginan ginad bilaqan. ²⁶ Krais in ago on mataw na giqemid tawon diq iy daqay haqad in gimen ahol nog hulosta. In nazaq emim teq in ahol awagamun na in ago on mataw negan in tuhuritiyta Huritim in gamuk na anan helmo haqad yuq huzan Krais in gigem soholan in ameb ginumlan tihiqiy. ²⁷ Ginumlan hiqiyan in giwaqan dumun diqmo iyan Krais aholyon tigiwam. Krais ago on mataw na giholib gibatlan araq hiqiyangisan dumun diq iysaq in ahol awaqan dumunmo diq tiqiy hasaqta. Nazaq iyan in Krais ago on mataw tawon diqta iyim in gihoib daq araq ananin waq daqayta na ahiqusaqta. ²⁸ An nazaqmo mataw aw tuwaqiyta na in gimo gihol anan ginad bilaqaqta nazaqmo in giqonan ginan ginad bilaq daqaymo. Mat in aweq aluwan tonad na inmo ahol aluwan tonaqtamo. ²⁹ Mat araq diq inmo ahol bab ugad a himiqin tonaqta. Haiqgam. Mataw bunmo in gimo gihol aluwan tonad in gihol anononmo wamuzayta. Teq Krais in ago on mataw giyon nazaq emaqtamo. ³⁰ Na izaqgo i inmo ahol anaghan nog iyim ossaq in nazaq i gidimun tonaqta. ³¹ Daq alulin naqmo ago mat in anen amam huloseq in aweq aholib tisoqotdaq ham. Soqoteq in giger gihol amilikmo iyeq toqos daqay haqad in bilam ham. ³² Mat aweq inaq izaq tonim gihol amilikmo iyayta na alulin ulilemimmo diq usaq i a hiqulum kemamta. Teq ya gamuk na waqim Krais ago on mataw ginaq giholib emim ya in ginan bilaqaiq. ³³ Ari ne mataw amilik-amilikmo bunmo ne gihol anan ginad bilaqaqta nazaqmo ne giqonan ginan ginad bilaqan. Saq aw aduw wazinad ahenib iyeq osan.