1 Yaqmo Pol, ya Iyahta ago kabiy emaiqta na ago ya iqirquran osaiqta. Osad ya aturanmo kazaq ne gibilenaiq. God ne gililewunan ne in agota tiqiyim osayta haqaiq. Naza iyan ne anonon diqmo luw osad ne gigo daq bunmo in God ago liley na inaq rireneqmo usan. 2 Ne gihol wazid woqsaq daq kiskistaqmo giyogniz gigo hib emiy. Emsaq giyow araq ne gimiqin tonid ne gigem hidmo himeqniyan. Haiqgam. Ne an aluwan tonad an anan ginad bilaqsaq osiy. 3 Saq God ago Bugaw Dumunta anad dumunta negsaq ne gigem amilikmo iyeq osiy. Osad ne giholtuw bulad zib alowab osgo adaqan muziniy. Muzsaq daq na bilaqne am nog ne giqirqurid ne mataw en amilikmo iyeq osiy. 4 Krais anon amilikmo usaqta. Saq Bugaw Dumunta in amilikmo usaqtamo. Ad nazaqmo God ne gililewunan ne in ago on mataw bunmo ginaq wastonim ne bunmo araqibmo God teq gidimun tondaqta na amen emim osayta. 5 Ossaq i bunmo God ago gamuk helmota amilikmo wazad i bunmo daq amilikmo muzinim Krais abinib yuq huzauqtamo. 6 Teq God amilikmoqmo osad in i bunmo Gimamta. In ago on mataw inmo ahenib iysaq in giwamuzaqta. Giiwamuzsaq in gigo kabiy daq bunmo inmo anad muzinaqta. Saq in ago on mataw na bunmo gilikmanib in ginaq osaqtamo. 7 I bunmo God ahenib araqibmo iyim osauqta. Ta teq Krais in ago zaway araqibmo a hiqigaqta. Haiqgam. In anad emad zaway izaqta in igaqta naqmo in i amilik-amilikmo naw nog samanmo tiqig. 8 Na ago God ago marib gamuk araq kazaq bilam, In bab emim mataw kabemmo giqirqurim teq in giiqad ulilibmo tigalah ham. Galehim in ago walmataw naw amo amo tinag ham. 9 Teq gamuk nawa bilam, ''In galah'' hamta na alulin in kazaq. Danmeb in pisanmo ulilib osim ogib guwomta. 10 Teq mataw pisanmo guwomta naqmo mileqim galehad in kait uriyamim ulilibmo diq a ta galah. Nazaq iyan in og saw bunmo giqisihim osaqta. 11 Teq in ago on mataw naw amo amo kazaq nagta. Mataw asor in Aposel akabiyan nag. Saq asor in uliq-uliqgo luwad Yesus awagamun dumunta mataw on gibilengo akabiyan nag. Saq asor in God ago sipsip giwamuzgo akabiyan negad in mataw asor God ago gamuk asuleqin bilaqgo akabiyan nag. 12 In ago on mataw tawonta giwaz meqniyeq ago kabiy dumunmo tiqem daqayhaqad in naw amo amo na nagta. Negan in kabiy amo amo na emsaq Krais anon ayah iyaqta. 13 Ari i bunmo nazaq an ulumsihad kabiy amo amo na emad teq i bunmo ginad helta amilikmo ussaq i God atatin ago tuhurit kemam. Hurit kemeq nab i gihol tizilimdaq. Zilimad teq i Krais anon wolnet bugid in bilaqne mat ahol bunmo usaqta nog iyad in anon afiqin inaq tirirendaq. 14 I nazaq diq tiqiyeq teq i amun amikta os nog a ta hiqiyam. Saq mataw gimekeq miqinta nagan gigo suleq katiyta bilaqsaq i bilaqne muy kamisib lehsaq tim bolad sorsaq in haresmo lehsaq lehaqta nazaq i a hiqiyam. Mataw na gimeleq iyad yuw hunegsaq i huriteq a himuzam. 15 Haiqgam. I mataw ginan ginad bilaqsaq gamuk heltaqmo gibilenam. I nazaq toneq teq i Krais anon nog iyeq ayah tiqiy bigamta. Ayah iy bugeq i gifiqin Krais ago towubmo tigatiqeq inaq diq tisoqotamta. 16 Krais i gifiqin iyim osaq i in abensen ameqnagin teq in ahol anaghan bunmo iyim osauqta. Saq i gifiqin na zaway igsaq i kabiy anononmo emauqta. Emad i bunmo an soqotim araqibmo diq osad i an anan ginad bilaqsaq osauqta. I nazaq emad osaq Krais anon na ayah iyad in awaz diq timeqniyaq. 17 Ari i bunmo Iyahta ahenib iyim osad iyan ya gamuk ka aturanmo kazaq diq ne gibilenaiq. On mataw God abin a hihuritayta na gigo daq ne himuziniy haqaiq. On mataw na ginad agadanmo diq iysaq in daq hiqemnanta kabemmo emayta. 18 In ginad romriq iyan in ginad a hiqem hasayta. Ad in gigem soqotim ussaq in ginad dumunta araq a hiqusaqta Nazaq iyan in God ago maror asan ban osad in ago os dumuntab nab bo a higatiqayta. 19 In daq miqinta emim gihol a hiloyinad gimeqbay a hiwoqaqta. Saq ginad miqinta bolsaq in a hiwasihad adaqan emmo emayta. Mataw nazaqta in daq miqinta anumlan inaqta bunmo emnan ginad diq bilaqayta. 20 Ari ne Krais ago suleq waqiyta na in ne daq miqinta nazaq emgo a hibilamta. 21 Ne Krais ago tuhuritiyta. Ad ne in ago suleq bunmo tuwaqiyta. Suleq na ne daq helta Yesus i gisuhunta naqmo asuleqin ne waqiyta. 22 Waqan suleq na bilam, Ne gigo os kaziqta na gileh ugad ne ta himuziy ham. Na izaqgo ne gigem kaziqta na eraqad kat negsaq ne nagah haresmo utet yaqayta. Saq daq naqmo ne gihol miqin tonyaqta. Teq ne Krais ago suleq na huritim ne gigem kaziqta na muzan tilah. 23 Teq suleq na kazaq bilammo. Ne ginad biliyid muturta iyan ham. 24 Ne ginad muturta iyid teq ne mat muturta ago daq waqeq tubusan nog gihoib emiy ham. God-mo ne giqeman ne on mataw muturta gatiqiyta. Gatiqim ne gigo daq God ago daqmo nog iyaq. Nazaq iyan ne mutur iyim daq titnonta emad ne God ago on mataw tawon diqta iyim osayta. 25 Nazaq iyan ne gamuk katiyta ago adaqan hulosiy. Hulosad i gimaqbaban Krais aduganibta na ginaq gamuk emad i nan heltaqmo an bulonad osuq. Na izaqgo i bunmo mat amilik naqmo ahol asor iyim osauqta. 26 Teq ne gigem meqniysaq ne gihol waz naqmo hiqiyeq daq miqinta hiqemiy. Ad ne gigem meqniydaqta na hulosid sisaqmo hiqusanmo. Haiqgam. Zeq a hiquleh bugsaq ni hidmo leheq nimaqbab nog ni nigem miqinta ugaqta na inaq an anubun wastitayiy. 27 Luweq ne Stan ayon dan has ugid in ne gilikmanib gatiqeq ne gigo os timiqin tondaq. 28 Teq mataw rin tonad luwayta na in a ta hirin toniy. Haiqgam. In Krais anan helmo tihaqim in daq titnonta muzinad in gimo gibenab kabiy daq tiqem daqay. In nazaq emeq teq mataw nagah ago siqim iysaq in gimo gigo nagah amalib tigilumsih daqay. 29 Gamuk miqinta araq diq ne giqezab higatiqan. Haiqgam. Gamuk dumunta mataw gilumsihid in giwaz meqniyeq os daqayta naqmo ne bilaqiy. Bilaqsaq mataw ginad siqim iyayta na huritad in ginad tizilimdaq . 30 Teq ne God ago Bugaw Dumunta emid ahol afaqan hiqiyan. Bugaw na in God ne gizayan ne in ago on mataw tiqiyiyta na atuwun nog ne giholib usaqta. Tow na ne giholib ussaq le Yesus ta boldaqta akaman nab teq God ne giwazid ne in ago tiqiy has daqay haqad in nagta. 31 Teq ne nan miqinta bilaqayta na adaqan hulos tayiy. Ad ne gigem meqniyaqta na teq ne an wadad haresmo an mugad an bilawunayta na ne hulos bugiymo. Ad gigem meqniysaq an miqin tonayta adaqan na ne aban diq emad luwiy. 32 Ne an aluwan tonad an agem dumunta ugad osiy. Osad ne gimaqbaban daq miqinta negsaq ne walemad anadin ta hiqemiy. Ne Krais aholib soqotan God ne gigo daq miqinta walemim anadin a ta hiqemaqta nazaqmo ne emiy.