¹ Daq alulin nazaq iysaq iyan yaqmo Pol ya ne on mataw Juda a haiqta na gilumsihnan haqad Krais Yesus ago gamuk gibilenaiqta. Teq ya kabiy naqmo emsaq mataw ya iwazim iqirquran ya bit kab toqosaiq. ² Nabag ne yaqgo tuhuritiyta. God on mataw en ta asor Juda a haiqta nagan inaqmo gilumsihta agamukan na in ya yagan ya gamuk na wamuzad ne gibilenaiqta. ³ Gamuk na kaziqmo ulilemim usta. Teq God eman yaqgo hib ulal iyan ya ago tuhurit. Huritim ya gamuk na asitmo nawa ne gimen mar tonan ne ahol tuwaqiy. ⁴ Krais boleq on mataw en bunmo gilumsihdaqta na agamukan ulilemim usta.Teq ya ne gimen gamuk nawa mar tonta na ne ahol tuwaqeq teq ya Krais ago kabiy alulin hurit kemta nazaq ne ginad tiqem has daqaymo. ⁵ Kaziqmo God ago gamuk na ulilemim ussaq in mataw a higibilenyaq. Ari muran God ago Bugaw Dumunta in God ago Aposel tawonta na teq in ago nantut tawonta na gamuk ulilemabta natigibilan. ⁶ Gamuk na kazaq bilam, On mataw en ta asor Juda a haiqta nagan in Juda mataw ginaq araqibmo Yesus awagamun dumunta tuwaqim in bunmo araqibmo Gimam God atatniz tiqiyim osayta ham. Osad in bunmo mataw en amilikmo iyim in bunmo Krais anon amilikmo tiqiyiymo ham. Iyan God in Krais Yesus amalib on mataw gidimun tonnan haqad hel diqmo bilamta agamukan na in muran Krais ago on mataw bunmo gigota tiqiy ham. ⁷ God ya itowun emim agem dumunta yagad in ago zaway ya iholib tiqam. Eman zaway na amalib ya Yesus awagamun dumunta na akabiyan emaiqta. ⁸ God ago on mataw tawonta na bunmo gilikmanib ya ibin amik diq usaqta. Ta teq God kabiy dumunta na samanmo naw nog yag. Kabiy na ya on mataw en ta asor Juda a haiqta nagan gibilenid Krais in gilumsihta na ago in tuhurit daqayta. Teq Krais i gilumsihta na in nagah ayah diqmo iyan i a hiqulum kemamta. ⁹ God nagah bunmo giqeman osayta. Ad in on mataw en ta asor Juda a haiqta nagan gilumsihgo anad usta na in isihan kam sisaq diqmo ulilemim usta. Teq muran ya in anad ulilemim usta na ulilabmo bilaqsaq on mataw en bunmo tuhurit kemayta. ¹⁰ Nazaq iysaq iyan on mataw Yesus ago nan huritad abin sorsaq God anad dumdumunta amo amo na in gigo hib ulal tiqiyaq. Ulal iysaq Heven-ib angelo giwaz miqinta maror gan osayta na teq bugaw aseseqta gibin inaqta nagan bunmo in tuhurit kemaymo. ¹¹ Kaziq diqmo God daq nazaq emnan haqad anad emad osta. Osan muran i gigo Iyahta Yesus Krais gatiqim in God anad na tuwolnet bug. ¹² I Krais anan helmo haqad aholib soqotim inaq osad i God agerab loqnan a hirabauqta. Haiqgam. Muran i God anognib gatiqsaq nagah araq i gidanin a hiqwayaq. ¹³ Nazaq iyan muran ya ne gibilenaiq. Ya ne gilumsihad santitiy soraiqta ka luweq ne ya ibiyad ginad sosil iydaq haqaiq. Haiqgam. Ne ya inan ginad dimniyan. Ya ne gimen afaqan ka sorsaq God ago hib ne gibin inaq tiqiyay. Gibin inaq iyeq abeb teq ne le tigatiqeq dumunmo toqos daqay. ¹⁴ I Gimam Iyahta ne gilumsih naqmo hiqiyta na ya anadin emad ya in ayon ibakbakan ulum laquwaiqta. ¹⁵ In on mataw Heven-ib teq og kab osayta na bunmo Gimamta teq inmo bilaqan on mataw en bunmo in gimo gimaman og kabta gihenib osaytamo. ¹⁶ Ya in ayon ibakbakan ulum laquwim turad ya ne gimen kazaq God bulonaiqta. God haqaiq, ni nibin teq ningo zaway ayahmo usaqta nazaqmo i Efesus on mataw na ayahmo gilumsihmo haqaiq. Gilumsihad ni ningo Bugaw emid le in giduganib usad in ginad gigem inaq emid awaz meqniyan haqaiq. ¹⁷ Awaz meqniysaq on mataw na Krais anan helmo haqsaq Krais in gimuganib osanmo haqaiq. Saq Krais in ginan anad bilaqaqta na in loyinad giwaz meqniyeq turiy haqaiq. Bilaqne ay aninin og muganib ulehim og waz naqmo hiqiysaq ay na zaway iyim turaqta nazaq nog haqaiq. ¹⁸ Nazaq iyeq teq Krais agem dumunta negaqta na in loyin kemiy haqaiq, ningo on mataw tawonta bunmo loyinayta nazaq haqaiq. Loyinsaq Krais i ginan anad bilaqaqta na in nagah ayah diqmo iyim ago sisaq pisanmo lehaqta na ago in ginad emiy haqaiq. Teq nagah na ulilibmo diq galehim abeqar ogibmo diq wulehaqta na ago in tuhurit kemiymo haqaiq. ¹⁹ Hurit kemeq Krais ago daq na ayah diqmo iyim i ginad bunmo uriyamta nazaq in ginad emiymo haqaiq. Efesus on mataw na in nazaq diq iyid teq ningo daq teq ninad dumdumunta nagan bunmo in giholib ateq galeq usan haqaiq. ²⁰ Ari God ago zaway i gigemab kabiy emaqta na amalib in i gidimun diq tonaqta. Teq i ginad emad susumun ugauqta na in i igad in nagah asor i anadin a hiqemta inaqmo em igaqtamo. Igsaq i nulingo biyab a haiq. ²¹ Nazaq iyan kam bunmo tuteqmo on mataw Krais ago nan huritayta na in God abin uluwiy. Saq God in Krais Yesusago hib abin ayahta waqanmo. Waqsaq daq na muran useq le on mataw gidahuqan abeb teq gatiq daqay na gigo kamub iyeq in nazaqmo le tutan. Hel diqtamo.