¹ Kaziqmo ne God ago gunun itiyonad daq miqinta haresmo emsaq ne gigo daq miqinta naqmo ne gihol eman ne giwitan God ameb tumoqim us. ² Kam nab ne og ka ago gunun haresmo muzinad ne bugaw miqinta ulilib luwayta gigo gifiqin na anad muzin yaqaytamo. Bugaw miqinta danmebta na ago zaway awaz miqinta in mataw nan a hihuritayta na gigemab kabiy emad gibeh yahsaq in God aqez othasayta. ³ Kaziqmo i bunmo nan a hihuritad ginad miqinta gatiqsaq i muzmo muzinyauqta Muzinad i giholmo i ginad wamuzsaq i gigem kaziqta naqmo ago adaqan muzinyauqta. I nazaq diq iyim ginenan gigemab hitiqan iyan God i ginan agem meqniyyaqta, in on mataw nan othasayta bunmo ginan agem meqniyaqta nazaq. ⁴ Helmo i gigo daq miqinta naqmo i ginol eman i bilaqne mataw tawonta os nog iyauqta. Teq God i ginan anad bilaq naqmo hiqiysaq in i ginan anad ayahmo meqniyyaq. ⁵ Nazaq iyan in Krais eman kayeq iyta nab in i giqeman i Krais inaq kayeq tiqiymo. (Na God anadibmo agem dumunta negim in nazaq ne gilumsihim giwamta.) ⁶ Ari i Krais inaq agaribmo kayeq tiqiyan God in i Krais Yesus inaq giwazan teqeraw. Eraqan in i giqeman i Krais aholib soqotim inaq ulilib Heven-ib toqos nog iyauq. ⁷ God agem dumunta iyahmo igad in Krais Yesus ago kabiy naqmo amalib i giluwan diq tonta. In anad abeb kam muturta nab in ayahmo i gidimun tonta na in on mataw bunmo gisuhunnan haqad in nazaq amta. ⁸ Na in kazaq. God agem dumunta negan ne Krais anan helmo haqan in ne gilumsihim giwamta. Daq nawa na negmo gigo zawayib ne eman a higatimta. Haiqgam. God anadibmo samanmo ne gilumsihim giwamta. ⁹ Teq ne giholtuw bulad kabiy daq dumdumunta emiyta na ago amenin in ne gilumsihim giwamta nazaq a haiqmo. Nazaq iyan mat araq inmo ahol abin wazid eraqdaqta adanteqin haiq tiqiy. ¹⁰ God-mo i giqeman i mataw muturta iyim osauqta. In ago kabiy daq dumdumunta emad luwamta haqad in i giqeman i Krais Yesus aholib soqotim inaq toqosauq. God anad i in ago kabiy dumdumunta na emad osamta haqad in kaziqmo i gibinib kabiy na tuwastitayan usta. ¹¹ Ari ne on mataw Juda a haiqta na ne ginad emiy. Ne gisesan gilulib gatiqim ne in gigo maror ahenib osayta. Ari Juda matawta na nazaqmo in gisesan gigo maror ahenib osad in gihol abatan asan urotayta. Ad in ne gibin wazan woqsaq ginan bilaqay, Mataw gisan a hiqurotayta haqay. Teq daq na in gibenabmo eman gisanib gatiqaqta. ¹² Ad kaziqmo ne Krais abin a hihurit yaqayta na ne anadin emiymo. Kam nab ne Krais ago hib pesan diqmo os yaqayta. Osad ne Israel gigo maror aduganib a hiqos yaqay. Ad God in Israel gisesan nenaq an adugan wazad in giwamuzeq gidimun tonan hel diqmo gibilensaq ne asan ban os yaqay. Nazaq iyan God teq ne gilumsihdaqta nazaq ne ginad a hiqem yaqay. Saq God ne giholib hiqiyan ne og kab danteq haresmo samanta muzad luw yaqay. ¹³ Kaziqmo ne God ago hib pesanmo diq osiyta. Ari muran Krais moqan anedan womta na amalib God ne giqeman ne Krais Yesus inaq soqotim osad ne God agerabmo diq toqosayta. ¹⁴ Na in kazaq. Juda mataw in mataw en ta asor Juda a haiqta nagan bunmo ginaq an geg ugayta. An geg ugsaq daq na gigel tonan in gimo gimo iyim agarib a hiqosayta. Teq Krais inmo ahol anedan amalib gel na wolbiyayan mataw na gilikmanib bab usta na tihiqiy bug. Hiqiy bugan Krais in mataw na bunmo giwastonan in mataw en amilikmo tiqiyiy. ¹⁵ Krais i gimen ahol nog hulosta nab in God ago maror Moses bilamta na aduganib gunun amikmikta giqusta na gimuzan maror kaziqta na akaman tihiqiy. In nazaq emim in mataw en bunmo inmo aholib giwastonan in mataw en muturta amilikmo tiqiyim in bab hulosad araqibmo toqosay. ¹⁶ Na in kazaq. Krais inmo ahol amalib on mataw en bunmo giwastonim in gigo ban wam. Waqan mataw ayib dom wolan in moqim on mataw na bunmo gibinib God inaq an anubun tuwastitayiy. In daq nazaq emim in mataw en bunmo gilikmanib an geg usta na wolqeman tihiqiy. ¹⁷ Hiqiyan in ago kabibiy mataw giqeman in lehim bab tihiqiyta na agamukan ne mataw pesanmo osiyta na gibilenad in mataw sinsin osiyta na tigibileniymo. ¹⁸ Na izaqgo Krais in i on mataw bunmo gimen danteq wastitayan muran God ago Bugaw amilik naqmo i bunmo gilumsihsaq i araqibmo Gimam Iyah agerab loqauqta. ¹⁹ Nazaq iyan muran ne God ago maror asan ban iyim mataw begbegta og saw haresmo luw yaqayta nazaq ne a ta hiluway. Haiqgam. Ne God ago on mataw tawonta na bunmo nenaq araqibmo God ago maror aduganib tigatiqim ne in asenlulmo diq tiqiyim osayta. ²⁰ Ne bilaqne God aholyon bit amta nazaq nog. Saq God ago Aposel teq in ago nantut nagan in bilaqne tituq nog iysaq God in gimalib ago bit na wazan tiqeraqaq. Saq Krais Yesus in bit na ago tituq liqab diqta iyim in bit na anon bunmo tisoraq. ²¹ Sorsaq bit na aditin bunmo Krais aholib soqotim usaq Iyahta Krais-mo in bit na ulum tutsaq in ayah iyad God ago bit tawonta nog tiqiyaq. ²² Saq ne inaqmo Krais Yesus ago hib soqotan in ne giwaqim Juda on mataw na ginaq girom tonan ne bunmo God ago bit in ago Bugaw Dumunta bo osaqta na tiqiyiy.