¹ Onmin, ne ginenmaman nenaq araqibmo Iyahta aholib soqotim inaq osayta. Nazaq iyan ne ginenmaman gigo gamuk huritiy. Daq na God ameb dumun diqta. ² Na izaqgo God ago mar kazaq bilam, NI ninenmaman giqez hurit ham. Ari God in ago gunun asor tibilaqim teq in gunun nawa na bilaqim abatanib in gamuk araq i gidimun tondaqta na tutim in kazaq hel diqmo bilam, ³ Ni ninenmaman giqez huriteq teq ningo os dimniysaq ni og kab sisaqmo toqosdaq ham. ⁴ Ari onmin gimaman ne gigo onmin gimiqin tonsaq in gigem himeqniyiy. Haiqgam. Ne in giwamuzad gigo daq wastitayad Iyahta ago suleq dumunta amalib in gibileniy. ⁵ Ari ne kabibiy mataw samanta, ne ginambreniz og kabta na gihenib iyeq osad ne girabunad giqez hurit kemiy. Ad ne Krais ago gamuk muzinayta nazaq ne in aqez muzinad ne ginad giger hiqiyan. ⁶ Luweq na ginad em daqay, I gigo aseseqta kawa osay haqad ne kat negad in ne ginan ginad dimniy daqay. Haiqgam. ne krais ago kabibiy mataw iyim ne God anad muzinim matawna gigo kabiy emayta. Nazaq iyan ne gihol bunmo kabiy ugad ne hikatiyad anononmo emiy. ⁷ Ne giholtuw bulad gigem dimniysaq kabiy emiy. Na izaqgo ne matawmo gigo kabiya hiqemay. Haiqgam. Ne Iyahta ago kabiy emayta. ⁸ Ad ne ginad kazaq emiy. Mataw samanmo luw osayta na in gigo kabiy dumunmo emid Iyahta in amenin naw dumunta tinegdaq. Ad nazaqmo kabibiy mataw samanta na in gigo kabiy dumunmo emid Iyahta naw dumunta naqmo in tinegdaqmo. ⁹ Ari ne kabibiy mataw gigo aseseqta, ne gigo kabibiy mataw samanta gimen daq dumuntaqmo emiy. Ad ne tor negad ginolnan tonsaq in rabayta na ne hulosiy. Iyahta Heven-ib osaqta na in ne gigo Iyahta teq in kabibiy mataw samanta na gigo Iyahtamo. Ad in mataw gibin inaqta gigo a hilehaqta. Haiqgam. In mataw bunmo gimen daq amilikmo emaqta. ¹⁰ Ari yaqgo gamuk ta asor usaqta na in kazaq. Ne Iyahta inaq soqoteq ago zaway waqad ne giwaz meqniyeq osiy. ¹¹ God bab emgo abalawun negaqta na bunmo ne waqeq gihol siheniy . Gihol sihenid teq Satan ulilemeq ne gimen kilek amidon hunegsaq ne zaway iyeq titur daqay. ¹² Na izaqgo i matmo inaq bab a hiqemauqta. Haiqgam. I bugaw miqinta gigo aseseqta nag teq og ka ago bugaw marorta nagan teq nagah aseseqta giwaz miqin diqta kam aromriq inaq ka ago daq wamuzayta nag teq bugaw miqinta ulilib luwad mataw gimiqin tonayta nagan ginaq i an wolauqta. ¹³ Nazaq iyan God bab emgo abalawun bunmo negaqta na ne waqeq giholib emiy. Giholib emeq teq kam araq bab miqinta boldaqta nab ne zaway iyeq tursaq bab na bo ne ginolsaq ne a hiwoq daqay. Haiqgam. Ne gihol anononmo wastitayeq teq ne bab na inaq an wolad ne giwaz meqniyeq titur daqay. ¹⁴ Nazaq iyan ne gihol wastitayeq zaway iyeq turiy. Ne God ago gamuk helta waqeq let nog gihulib hureqid usan. Ad teq Krais ago daq titnonta ne emayta na in bilaqne giban isih ain-ibta na nog ne giholib usan. ¹⁵ Saq kam bunmo ne gihol wastitayeq God ago gamuk dumunta mataw gigem eman kuteh nemaqta na ne bilaqgomo iyeq osiy. Ad ne God ago gamuk bilaqgo iyim osayta na ne bilaqne gisendugan nog gisennab emeq turiy. ¹⁶ Nagah na bunmo ane giholib emeq teq ne ginad helmo haqayta na dareq nog ne wazeq turiy. Tursaq mat miqinta na ago kilek amidon faq oyaqta na ne gimen hunegsaq ne dareq na amalib toqot has daqay. ¹⁷ Ad God ne gilumsihim giwamta na agamukan in bilaqne hat ain-ibta ne gifiqin isiheq us nog iyan. Saq ne Bugaw Dumunta ago baqir wazeq turiy. Baqir na in God ago gamuk naqmo. ¹⁸ Bugaw Dumunta ne ginad wamuzsaq tuteqmo ne God inaq gamuk emad in ne gilumsihgo haqad ne buloniy. Ad tuteqmo ne gihol asawan woltayad osiy. Teq kam bunmo ne God ago on mataw tawonta na gimen God bulonad ne daq na hihulosiy. ¹⁹ Teq ne yaqmen God bulonsaq in ya ilumsihanmo. Ilumsihsaq teq ya iteb inmo ago gamuk gatiqsaq ya a hirabad Yesus awagamun dumunta alulin ulilemim usta na tibilaq sireqdaiq. ²⁰ Ya God abinib gamuk na bilaqad luwsaq iqirquriyta. Teq ya bit kab osad ya God ago nantut na bilaq tutaiqta. Nazaq iyan ne yaqmen God bulonsaq ya rab bayid woqsaq ya God-mo anad muzinad ago gamuk na tibilaqdaiq. ²¹ Ari ya kab izaq iyim osaiqta na teq ya nagah emad osaiqta na ago Tikikus tigibilenaq. Tikikus in i gimaqbab araq dumun diqta. Teq in Iyahta kabiy ugta na emad atuw a hiqiyaqta. ²² Ya in eman nawa lehim izaq diq osauqta na ago teq in ne gibilensaq ne gigem zaway tiqiydaq. ²³ Ari i Gimam God teq Iyahta Yesus Krais inaq in ne on mataw Krais abin wazinayta na bunmo gilumsihsaq ne gigem kuteh nemsaq osiy. Osad ne ginad helmota na waz naqmo hiqiyad ne an nan ginad bilaqsaq osiy. ²⁴ Ari on mataw tutimmo i gigo Iyahta Yesus Krais anan ginad bilaqaqta na bunmo God in agem dumunta negsaq in osiy. Nawaqmo.