¹ God ne Krais inaq hodhodab giwazan eraqiyta. Eraqim muran Krais ulilib galehim God aben aqabun ban toqos woqim osaq. Nazaq iyan ne nagah dumdumunta Krais ago hib usaqta naqmo ginagunad luwiy. ² Luwad kam bunmo ne nagah dumdumunta ulilib usaqta naqmo anadin emad ne og ka ago nagah nagan anadin diq hiqemiy. ³ Na izaqgo ne tumoqiyta. Moqim muran ne kayeqmo osayta alulin na in ulilemim Krais inaq God ago hib usaqta. ⁴ Krais-mo ne giqeman ne kayeqmo osayta. Abeb in ulilab bo gatiqsaq nab ne Krais inaq agaribmo mataw gimeb ulal tiqiy daqaymo. Ulal iyeq ne Krais ahol anuwanib dimniyeq ossaq on mataw bunmo ne tigibiy kem daqay. ⁵ Nazaq iyan ne og ka ago ginad miqinta gigemab usaqta na gileh ugad wolid moqan. Ne an haresmo hureqim inaq usayta na, teq ne daq anumlan inaq emayta na, teq ne gihol aturanmo eraqaqta na, teq ne daq miqinta haresmo emgo ginad bilaqaqta na, teq ne nagah haresmo utetayta na, daq nagan bunmo ne giholib muzid lehan. Mat nagah haresmo utetaqta na in bilaqne god katiyta tumuz nog iyaq. ⁶ Mataw God aqez othasad daq miqmiqinta nazaq emsaq iyan God ago agem meqniy nawa in gigo hib teq gatiqdaqata. ⁷ Kzaiqmo ne mataw miqinta na ginaq luw osad ne in gigo daq na em yaqaymo. ⁸ Teq muran ne daq miqinta nagan bunmo hulos bugiy. Ne gigem meqniyyaqta na, teq ne mataw aturanmo ginad yaqayta na, teq ne an agem miqinta ug yaqayta na, teq ne an aglehunan bilaq yaqayta na, teq ne gamuk miqinta amalib an wad yaqayta nagan bunmo ne hulos bugiy. Bilaqne mat araq tubusan miqinta hasim hunegan lehaqta nazaqmo ne daq nagan hulos tayiy. ⁹ Ne ginad kaziqta ago daq miqmiqinta inaq na ne gimuzan tilahta. Nazaq iyan ne an hikat ugiy. ¹⁰ Teq ne ginad muturta na waqim giholib eman in ne ginad kaziqta na ago ban tuwaq bug. Waq bugan ne God ago tuhurit kemsaq inmo ne ginad eman mutur iyad ne ginad in anad nog iyaqta. ¹¹ Nazaq iyan mataw ginad biliyim mutur iyayta na bunmo in araqibmo iyim osayta. In gilikmanib Grik mat haiq. Teq Juda mat haiq. Teq mat ahol abatan asan a hiqurotta na haiqmo. Mataw muturta na gilikmanib matasen kob bolta na haiqgam teq mat yabyabta haiqmo teq kabibiy mat samanta haiqgam teq mat anadibmo samanmo luwaqta na haiqmo. Krais amomo osad teq in ago on mataw bunmo giduganib osaqtamo. ¹² God ne gitowun emim in aholyon ne tigiwamta. Giwaqan ne in ago on mataw tawon diqta tiqiyim ossaq in ne ginan anad diq bilaqaqta. Nazaq iyan ne daq dumunta kazaqta waqeq giholib emiy. Ne mataw bunmo ginad dumunta negad giluwan toniy. Ad ne gihol wazid woqsaq ne mataw ginaq midemanmo osiy. Osad ne afaqan sorad gituw hi hiqiyan. ¹³ Ni nimaqbab araq in nimiqin tonid ni nigem hidmo himeqniysaq ni tok nemeq os. Osad ni nan ugdaqta na hulosad ni nimaqbab ago daq miqinta na walemad anadin ta hiqem. Iyahta ne gigo daq miqinta bunmo tigiwalem bugta. Nazaq iyan ne an ago daq miqinta walemad anadin a ta hiqem daqaymo. ¹⁴ Teq daq ameb diqta ne em daqayta na in kazaq. Ne an anan ginad bilaqsaq osiy. Daq na in bilaqne am nog ne gituq tonid ne araqibmo titnoneqmo ossaq ne gigo os tidimniydaq. ¹⁵ Saq Krais ne ginad wamuzsaq ne zib alowabmo osiy. Ne nazaqmo os daqay haqad God in ne gililewunim giqeman ne mat amilikmo anon nog iyim osayta. Kam bunmo ne God esey ugad osiy. ¹⁶ Osad ne Krais ago gamuk dumunta na aluwan tonsaq in ne giholib anon emeq usan. Usaq ne ginad em hasad suleq dumunta amo amo an bulonad teq ne an adek wazad osiy. Ad buk song-ib bar usaqta na teq lotu abarin amo amota na teq bar asor Bugaw Dumunta eman ne ginadib gatiqaqta nagan ne wazad gigemabmo diq God esey ugiy. ¹⁷ Ad ne gamuk bunmo bilaqayta na teq kabiy bunmo ne emayta na ne Iyahta Yesus-mo abin emid ayah iyan haqad ne emiy. Teq Yesus ayahmo gidimun tonta na ne anadin emad ne Gimam God esey ugad osiy. ¹⁸ Ari ne on mat tuwaqiyta na, ne gidugniz giqez huritad gihenib osiy. Ne Iyahta ago on tiqiyim iyan ne nazaqmo os daqayta. ¹⁹ Teq ne mataw aw tuwaqiyta na, ne giqonan ginan ginad bilaqsaq ne in ginadad aturanmo higibileniy. ²⁰ Ari ne onmin, ne ginenmaman giqez huritad ne in ginad muzin bugiy. Iyahta in daq dumunta nazaqta anan anad bilaqaqta. ²¹ Teq ne onmin gimaman, ne gigo onmin gigem emid himeqniyan. Luweq in gihol loyinsaq in kabiy araq dumunta emgo biyab a hiqiy daqay. ²² Ari ne kabibiy mataw samanta ne gigo mataw aseseqta og kabta na giqez huritad muzinad osiy. Luweq ne ginad em daqay, I gigo aseseqta kawa osay haqad ne kat negad in gimebmo kabiy emsaq in ne ginan ginad dimniy daqay. Haiqgam. Ne Iyahta amomo anan rabad ne ginad amilikmo iyeq kabiy anononmo emiy. ²³ Ne gigo aseseqta nagah kabiyan negid ne ginad bilaqsaq emmo emiy. Ne matmo ago kabiy a hiqemayta. Haiqgam. Ne Iyahta ago kabiy emayta. ²⁴ Teq ne Iyahta anad muzinad osayta na amenin in ago os dumunta tinegdaq. Na ago ne tuhuritiyta. Nazaq iyan ne ginad emiy. Krais amomo in Iyahta iyim ossaq ne in amen kabiy emayta. ²⁵ Teq mat daq miqinta emaqta na in nazaqmo Iyahta abenab in ago daq na amenin tuwaqdaqmo. Kam nab Iyahta in on mataw bunmo gimen daq amilikmo emad in mataw asor gigomo a hilehdaqta.