¹ Ari kabibiy mataw gigo aseseqta na, ne gigo kabibiy mataw samanta na gimen daq titnonta emad ne in giluwan toniy. Ne ginad emiy. Ne gigo Iyahta Heven-ib osad in ne gibiy muzaqtamo. ² Ne tuteqmo God iinaq gamuk emad ne daq na hihulosiy. Teq ne ginad em haseq God bulonad in ne giqez wazta na ago ne esey ugiy. ³ Ad ne i gimen God buloniymo. BUlonsaq in i gimen danteq em igid teq i Krais ago gamuk ulilemim usta na on mataw gibilen kemam. Gamuk naqmo ya bilaqsaq mataw ya iwazim iqirquran ya kawa osaiqta. ⁴ Ne yaqmen God bulonsaq ya in anad muzinad ago gamuk ulilemabta na ulilabmo bilaq sireqdaiq haqad ya kawa ne gibilenaiq. ⁵ Ne mataw God ago maror asan ban osayta na gimen anononmo luw osiy. Ad ne gigo kabiy dumdumunta em daqayta akaman na abuq ulumad samanmo hiqosiy. ⁶ Kam bunmo ne on mataw gamuk dumdumunta gibilenad luwsaq ne gigo gamuk akmolmolin inaq iyan, bilaqne kamis dadaq eman aneq dimniyaqta nazaq nog. Ne nazaq emad teq ne ginad em hasad on mataw bunmo giqez amenin tiqem daqay. ⁷ Tikikus teq ya ihol awagamun ne tigibilen kemdaq. Mat na in i gimaqbab dumun diqta. In Iyahta ago kabiy emad atuw a hihiqiyaqta. Teq i mat na inaq araqibmo Iyahta ago kabibiy mataw iyim osauqta. ⁸ In i giwagamun gibilenad teq in ne gigem emid awaz meqniydaq haqad ya eman in ne gigo hib nawa lah. ⁹ Saq ya negmo gigo mat araq Onesimus eman in tikikus inaq ne gigo hib lahmo. Onesimus in i gimaqbab dumun diqta. Teq in i gilumsihad atuw a hiqiyaqta. Mataw giger naqmo teq nagah bunmo i gigohib kab gatimta na ago in ne tigibilen bug daqay. ¹⁰ Ari Aristarkus in ago zeq dumun eman nawa ne gigo hib lehaq. Ya mat na inaq giqirquran bit kab osauqta. Saq Barnabas ayan Mak in ne gimen zeq dumun eman nawa lehaqmo. Ya ne gimen gamuk ka mar tonta nab ya mat na anan ne tigibilenta. In le ne gigo hib gatiqid teq ne waziniy. ¹¹ Saq mat anan Jisas haqayta na in ne gigo zeq dumun eman nawa lehaqmo. In anan araq Jastus haqaytamo. Juda gilikmanib mataw ezeqman naqmo in ya nenaq araqib God ago maror akabiyan emauqta. In ya ilumsihsaq ya igem dumun dikan iyaqta. ¹² Teq negmo gigo mat anan Epafras haqayta na in ne gimen zeq dumun eman nawa lehaqmo. Mat na in Krais Yesus ago kabibiy matta teq in aholtuw diq bulad ne gimen God tutimmo bulonaqta. In anad God ne gilumsihsaq ne gihol ginad bunmo zilimsaq ne God anan helmo diq haqad giwaz meqniyeq tur daqay haqad in ne gimen God bulonaqta. ¹³ Mat na in ne gimen kabiy aturanmo emad in mataw uliq Laodisiya-ibta na teq mataw uliq Herapolis-ibta na gimen kabiy ayahmo ammo. Ya in ago hurit kemta iyim ya ne gibilenaiq. ¹⁴ Saq ya iyow dumunta Luk, mat ihol wastitay akabiyan emaqta na, in ayow Demas inaq in ne gimen zeq dumun eman lehaqmo. ¹⁵ Ne yaqgo zeq dumun ka i giyogniz uliq Laodisiya-ib osayta na negiy. Ad ne aw anan Nimfa haqayta na teq Yesus ago on mataw in ago bitab humab wolayta na ginaq yaqgo zeq dumun ka in negiymo. ¹⁶ Ari ne sansandek ka ahol tuwaqeq teq ne Yesus ago on mataw Laodisiya-ib osayta na gimen emid lehan. In inaqmo sansandek ka ahol waq daqayta. Ad ya sansandek eman Laodisiya-ib lahta na in ne gigo hib em lehid teq na ne ahol waqiymo. ¹⁷ Teq ne mat anan Arkipus haqayta na kazaq buloniy, Ni Iyahta abenab kabiy wamta na anadin emad ni emid hiqiy bugan haqiy. ¹⁸ Ari yaqmo Pol yaqmo iholbenab yaqgo zeq dumun ka mar tonim ne giyon eman nawa lehaq. Ya bit kab iqirquran osaiqta ka ne anadin emiy. Ari God agem dumunta negsaq ne osiy. Nawaqmo.