¹ Ari ya ne gimen kabiy ayahmo emad ihol bebewunaiqta ka ago ne ginad em hasiy. Ya negmo teq on mataw Laodisiya-ibta na teq mataw en asor ya inubun ahol a hiwaqiyta na ginaqmo gilumsihnan iholtuw bulad luwaiqta. ² Ya inad God ago on mataw na bunmo gigem zaway iysaq in an anan ginad bilaqsaq osad in mataw en amilikmo iyeq osiy haqaiq. Teq in ginad helmo haqayta na ayahmo diq iysaq in ginad em hasiy haqaiq. Ginad em haseq God ago gamuk helta ulilemim usta na ago in hurit kemiy haqaiq. Teq gamuk ulilemim usta na alulin Krais-mo. ³ Krais amomo i ginad eman hastitayaqta. Hastitaysaq i gamuk ulilemabta na alulin hurit kemim i ginad awaz meqniysaq i God ago nagah kabemmo ago ginad em hasauqta. ⁴ Ezaq haqad ya kazaq ne gibilenaiq? Luweq mat araq suleq katiyta negad in ago gamuk amalib ne kat negdaq haqad ya ne gimen gamuk ka mar tonaiq. ⁵ Ya ne ginaq a hiqosaiqta teq ya ne ginadin tutimmo emad ya iwitan ne gigo hib os nog iyaiq. Nazaq iyan ne wastitayimmo osad Krais anan helmo diq haqsaq ya ne ginan inad tidimniyaq. ⁶ Ne bunmo Krais Yesus ahol waq hasim anan i gigo Iyahta haqad ahenib iyim osayta. Nazaq iyan ne aholib soqoteq inaq luw osiy. ⁷ Osad ne suleq waqiyta nazaqmo ne in ago hib zaway waqad ne ginad helmo haqayta na ayah iyan. Ay aninin ogib sisqmo ulehsaq ay na zaway waqim sisaqmo galaqta nazaq nog ne zaway iyeq turad tuteqmo ne God esey ugiy. ⁸ Ne gihol waz naqmo hiqiyeq osiy. Mataw asor eraqeq og ka ago suleq katiyta alulin haiqta amalib ne giqirqureq gihureqeq giqad lehnan tonsaq ne in gigo gamuk na hihuritiy. Mataw naqanta in gisesan gigo gamuk kaziqta naqmo in bilaqayta. Teq gamuk na in bugaw miqinta og ka ago daq wamuzayta naqmo gigo hib bolaqta. In gigo suleq na Krais ago hib a hibolaqta. ⁹ Na izaqgo God ago zaway teq in anad awaz miqinta teq in ago daq bun diqmo Krais-mo aholib giqus bugaqta. ¹⁰ Teq Krais abin ayah diqmo iyan angelo giwaz miqinta maror gan osayta na teq nagah aseseqta gibin inaqta nagan bunmo in ahenib iyim osayta. Nazaq iyan ne inmo amomo ago hib tisoqotim ne tidimniyim osad ne nagah araq ago siqim a hiqiyayta. ¹¹ Teq ne bunmo Krais holib soqotan in ne gigem kaziqta na ago zaway alulin urotim hunegan lehan ne gigem kaziqta anad a ta himuzinay. Bilaqne mataw gibenab gihol abatan asan urotim hunegan lehaqta nazaq nog. Teq Krais abenabmo i gigem kaziqta ago zaway a hiqurot. ¹² Haiqgam. Ne Krais abinin yuq huziyta nab ne Krais inaq moqim ne inaq hodhodab tuqus nog iyiy. Teq ne God ago zaway Krais wazan hodhodab eramta na anan helmo haqan God in ne Krais inaq giwazan ne araqibmo hodhodab ta eraq nog iyiymo. ¹³ Kaziqmo ne gigem kaziqta anad muzinad daq miqinta amo amo emsaq daq miqinta nagan in ne ginol eman ne giwitan tumoqim usiyta. Teq God in i gigo daq miqinta na bunmo giwalem bugim in i giqeman i Krais inaq kayeqmo osauqta. ¹⁴ I God ago gunun othasta na ago afaqan in i giwazan woqnan tonta. Na izaqgo nan na in i hazizirib giqemid i amenin miqin diq waqgota. Teq God in nan na ayib dom wolan nan na ago zaway tihiqiy bug. ¹⁵ Saq ay nabmo God in bugaw aseseqta zaway amo amo wazayta nagan teq nagah giwaz miqinta gibin inaq iyim maror gan osayta nagan bunmo gigo zaway wolan woqan nagah nagan in mataw bunmo gimeb mataw zaway haiqta nog tiqiyiy. ¹⁶ Nazaq iyan ne dadaq haresmo neqad yuq hresmo uluwsaq mat araq ne ginan miqin haqsaq ne in ago afaqan hiqiyiy. Teq in kam aseseqta gigo gunun teq kalam mutur gatiqaqta ago gunun teq lotu akaman amo amo gigo gunun nagan muzgo gibilensaq ne hi huritiy. ¹⁷ Nagah gunun emayta nagan helta abeb teq gatiqdaqta na ago adulan nogta. Teq nagah nagan ginon diq Karis-mo. ¹⁸ Mat araq sen qwayim nagah ahol wamta na agamukan bilaqad in ne gibeq yahad gibilendaq, Ne gihol wazid woqsaq angelo-mo giyon lotu emiy haqsaq ne in aholib hiqiysaq in ne gidanin hiqayan. Mat nazaqta in mataw og kabta ginad em nog iyad inmo ahol abin uluwad nazaq bilaqaqta. Teq in anad na saman diqta. ¹⁹ Mat naqanta in i gifiqin Krais ago hib soqotim a hiqosaqta. Ta teq i gifiqin naqmo in i giwamuzsaq i in anon nog iyim osauqta. Ossaq i gifiqin na in ahuliq teq abensen teq anaghan bunmo dadaq negsaq in alikalikin teq ahol anaghan bunmo araqibmo an wastonim usayta. Usad in anon na God-mo ago zawayib gatiqim ayah iyaqta. ²⁰ Ne bunmo Krais inaq moqim ne bugaw og ka ago daq wamuzayta na gigo maror ahenib a ta hiqosayta. Nazaq iyan doq tonnan ne og ka ago on mataw os nog iyad ne og ka ago gunun amikmikta nagan ahenib os tutay? ²¹ Gunun nagan bilaqay, Ni nagah na hiwaz haqayta teq dadaq na niteb hiqem haqayta teq nagah na nibenab hikidik mirirewun haqayta. ²² Teq gunun amo amo nagan in nagah tuteqmo usdaqta na ginan a hibilaqay. Haiqgam. Mataw in nagah gunun emayta na wazim neqsaq in hiqiyaqta. Gunun nazaqta na mataw in ginadibmo giqeman gatiqan teq in asuleqin i gibilenayta. ²³ Helmo i gunun nagan huritsaq in bilaqne gunun dumdumunta nog iyaqta. Na izaqgo gunun anambreniz na bilaqay, I giholyon gunun emta kagan muz naqmo hiqiyad i gihol wazan woqsaq i gigem kaziqta na a hikidik muzinauqta haqayta. Teq haiq. Gunun nawa in hiqemayta na in i gigemab ginad kaziqta nagah haresmo utetaqta na a hikidik wasihaqta.