¹ Ari yaqmo Pol.God-mo anad bilaqan ya Krais Yesus ago Aposel iyta.Ya imaqbab Timoti inaq i giger sansandek ka God ago on mataw tawonta uliq Kolosi-ib osayta na ne gimen martonan lehaq. ² I bunmo araqibmo Krais aholib soqotim inaq osad iyan ne i gimaqbabmo diq iyim osayta.Osad ne Krais ago gamuk muzinad gituw a hiqiyayta. I Gimam God agem dimunta negad in ne gigem emid midemeqmo usan. ³ Ari kwaziqmo mataw asor Yesus awagamun dimunta ne gigo hib a lehim gibilensa God ne gimen os dimun diqta wastitayan Heven-ib usaqta na ago ne tuhuritiy. ⁴ Nazaq iyan muran ne Krais Yesus anan helmo haqad ne God ago on mataw tawonta na bunmo gigem dumunta negayta. I ne giwagamun nazaq huritim kam bunmo i gigo Iyahta Yesus Krais Amam God inaq gamuk emad i esey ugauqta. ⁵ Og saw bunmo mataw Yesus awagamun dumunta bilaqsaq on mataw kabemmo huritad anan helmo haqsaq gamuk na in gigo hib anon kabemmo emaqta. An nazaqmo ne Yesus awagamun waqiyta nabmo gamuk na in ne gigo hib anon emim emim bo muran tiqiy. ⁶ Na izaqgo God agem dumunta ne nagta na ago agamukan ne huritim ne ginad em hasim anan helmo diq haqiyta na ago iyan. ⁷ Mat anan Epafras haqayta naqmo in God ago gamuk na ne gigo hib a lehan ne huritiyta. I Epafras inaq agaribmo God ago kabibiy mataw iyim osauqta. Teq Krais in mat na kabiy ugan in anononmo emad ne gilumsihad atuw a hiqiyaqta. ⁸ Mat na mileqim i gigo hib ta bolim in ne ginan kazaq i gibilan, God ago Bugaw Dumunta ne ginad wamuzsaq ne God ago on mataw bunmo ginan ginad bilaqaqta ham. ⁹ Epafras nazaq i gibilenan kam nab i ne gimen God bulonim bulonim bolim muran i ne gimen bulon tutad i daq na a hihulosauqta. I ne gimen God susumun ugad i kazaq bilaqauq, God haqauq, ningo Bugaw Dumunta Kolosi on mataw na giholib emid usad in mataw na ginad emid hastitay bugsaq in ginad na awaz miqin diq iyan haqauq. Ginad awaz meniysaq in ninmo ninad muzinad luw daqayta na ago i ginad em hasiy haqauq. ¹⁰ Ginad em hasad in Iyahta ago on matawmo diq iyeq luw osiy haqauq. Osad in ningo huritayta na in ginadib ayah iysaq in ningo hurit kemiy haqauq. Hurit kemad in kabiy dumdumunta emsaq kabiy na anon kabemmo gatiqsaq Iyahta in ginan agem dimniyan haqauq. ¹¹ Haqad i bulonauq, God haqauq ningo zaway ayah diqta mataw ahol waqad nibin uluwayta na in on mataw na gigemab kabiy emsaq in giwaz meqniyeq osiy haqauq. Ossaq afaqan amo amo giholib gatiqsaq in sorad gituw hiqiyan haqauq. ¹² In ginadmo dimniysaq osad Gimam Iyahta essey ugiy haqauq. Na izaqgo ninmo mataw na gimen danteq eman in teq leheq ningo on mataw tawonta na bunmo ginaq araqibmo ningo os dumunta tuwaq daqay haqauq. Waqeq in ningo saw nuwanib gatiqeq toqos daqay haqauq. ¹³ Kaziqmo romriq ago zaway awaz miqinta i ginad wamuzsaq i osyauqta. Ossaq God i gilumsihim giwaqim in atatin Yesus ago maror aduganib i giqam. God in atatin na anan anad diq bilaqaqta. ¹⁴ Teq God atatin naqmo in i gigo daq miqinta walemad in i gizayan i in agota tiqiy. ¹⁵ Ari God atatin na i God ahol a hiwaqauqta nog i in ahol waqauqta. In nagah bunmo God giqeman gatiqiyta na ago Iyahta iyim osaqta. ¹⁶ Na izaqgo God in atatin naqmo amalib nagah bunmo Heven-ib teq og kab giqusayta na inaqmo giqeman gatiqiyta. Nagah bunmo i gimeb ulal iyaqta na teq nagah bunmo i gimeb ulilemim usayta na teq angelo giwaz miqmiqinta maror nog iyim ulilib osayta nagan teq bugaw aseseqta zaway amo amo wazayta nagan bunmo God atatin inmo giqeman gatiqiyta. Gatiqim nagah na bunmo inmo anad muzingo osayta. ¹⁷ Teq nagah na bunmo a higatiqsaq inmo toqosta. Nazaq iyan nagah na inmo ago zawayib gatiqim giqusayta. ¹⁸ On mataw in ago nan huritayta na bunmo gigo gifaqin inmo.Saq on mataw na bilaqne in anon nog iyim osayta. In nagah bunmo gilulinta iyim in ameb hodhodab tiqeramta. Nazaq iyan God nagah bunmo giqamta na gilikmanib inmo danmeb diq iyim osaqta. ¹⁹ Na izaqgo in Amam anad bilaqan Amamgo zaway teq in anad awaz miqinta teq in ago daq bun diqmo atatin na aholib giqus bugaqta. ²⁰ Saq nagah bunmo Heven-ib teq og kab giqusayta na in God geg ugsaq God in atatin na eman ayib othenan turad in anedan tuwom. Woqan bab usta na tuhiqiy. Hiqiyan God in daq na amalib nagah nagan bunmo gihureqan in ago hib ta bol bugiy. ²¹ Kaziqmo ne gigem miqinta God ugad ne in aholib hiqiy yaqayta. Ad ne in anan ginad a hibilaqsaq ne daq miqmiqinta haresmo emad luw yaqay. ²² Luwsaq God in atatin eman bolim ne gimen ahol nog hulosim tumom. Moqim in ne gimen danteq eman ne God inaq an anubun tuwastitayim osayta. God ne giwastitayid ne in ago on mataw tawonta iyeq ne giholib daq araq ananin waq daqayta haiq iysaq ne in ameb titnoneqmo tur daqay haqad in daq na amta. ²³ Nazaq iyan in ne giwaz meqniyeq ne ginad God anan helmo haqayta na waz naqmo hiqiyeq osiy. Osad God teq ne gidimun tondaqta na ne anan helmo diq haqad ne ginad na hikidik biliyiy. Luweq mat araq gihureqid ne Yesus awagamun dumunta huritayta na hulos daqay. Mataw Yesus awagamun dumunta og saw bunmo alehim tibilaqiyta. Saq yaqmo Pol ya inaqmo wagam dumunta na ago kabibiy mat iyim osaiqtamo. ²⁴ Ya ne gilumsihad ne gimen asantitiy sorad ya inad dimniysaq kawa osaiq. Na izaqgo Krais in ago on mataw gilumsihnan haqad santitiy sorta na a hiqiy bugsaq ya santitiy na ya ihol ugim sorad ya tuwolne bugaiq. Wolnet bugad ya in ago on mataw in anon nog iyim osayta na tigilumsihaiqmo. ²⁵ God ya itowun emim kabiy yagan ya Krais ago on mataw gigo kabibiy mat iyim osaiqta. Ossaq in anad ya ne inaqmo gilumsihdaiq haqad in kabiy na ya ibenab eman ya in ago gamuk bunmo ne gibilenaiqta. ²⁶ Kam sisaq diqmo God ago gamuk alulin na ulilemim ussaq on mataw bunmo a hihurit yaqayta. Ari muran kam kab God in ago gamuk ulilemabta na eman inmo ago on mataw tawonta bunmo gimeb ulal tiqiy. ²⁷ God in anad in ago gamuk ulilemim usta na on mataw en ta asor Juda a haiqta nagan gigo hib anon kabemmo emsaq in ago on mataw bunmo ahol waqad abin uluw daqay haqad in nazaq amta. Teq gamuk ulilemabta na alulin kazaq. Krais in ne on mataw en ta asor Juda a haiqta nagan inaqmo gimuganib osad in teq ne giwaqeq giqad le in ago os dumuntab tigiqemdaq. ²⁸ I Krais awagamun naqmo on mataw en bunmo gibilenauqta. Gibilensaq God i ginad eman awaz meqniysaq i mataw bunmo gidek wazad God ago suleq negauqta. Ad i ginad emauq, I God ago on mataw bunmo gilumsihsaq in Krais aholib soqoteq inaq osad in gihol ginad tizilimsaq teq i giqad le God ameb tugatiqam. Haqad i kabiy na emauqta. ²⁹ In nazaq diq tugatiqdaq haqad ya iholtuw bulad Krais ago zaway ya iholib ayahmo usaqta na amalib ya iwaz meqniyim yaqgo kabiy na aturanmo emaiqta.