¹ پاشان ئەگریپا بە پۆڵسی گوت: «ئێمە ڕێگەت پێدەدەین بەرگری لە خۆت بکەیت». پاشان پۆڵس بە دەستی ئاماژەی کرد، و دەستی کرد بە بەرگریکردن و گوتی: ² «ئەی پاشا ئەگریپا، خۆشحاڵم کە لەبەردەم تۆدا بەرگری لە خۆم بکەم، و هەموو ئەو شتانە پووچەڵ دەکەمەوە کە یەهودییەکان منی پێ تۆمەتبارم دەکەن، ³ بە تایبەت لەبەر ئەوەی تۆ بە تەواوی ڕێوڕەسم و مشتومڕەکانیان دەزانیت. داواکارم بە سنگ فراوانییەوە گوێم لێ بگرە. ⁴ هەموو یەهودییەکان لە سەرەتاوە بنەچەی من دەزانن. من لە منداڵییەوە لە نێو گەلەکەمدا لە یورشەلایم ژیاوم. ⁵ بەو پێیەی هەر لە سەرەتاوە منیان دەناسی، ئەگەر بیانویستایە شایەتی ئەوەیان دەدا کە من فەریسیم، واتە پەیڕەوی توندترین رێبازی لە ئایینەکەمان. ⁶ ئەمڕۆ دادگایی دەکرێم چونکە هیوام هەیە خودا ئەوەی بەڵێنی بە باوباپیرانمان دابوو جێبەجێی بکات. ⁷ دوانزە هۆز گەلەکەمان شەو و ڕۆژ بەردەوامن لە پەرستن و هیوای بەدیهاتنی. لە پێناو ئەم هیوایە، ئەی پاشا، یەهودییەکان تۆمەتبارم دەکەن. ⁸ بۆ باوەڕ ناکەن خودا مردووەکان هەڵدەستێنێتەوە؟ ⁹ وە باوەڕم وابوو کە دەبێت هەموو کۆششێک بکەم بۆ بەرەنگاربوونەوەی ناوی یەشوای ناسیرەیی. ¹⁰ من کارم کرد بۆ جێبەجێکردنی پلانەکەم لە یورشەلایم بە ئەرکێکی تایبەت لەلایەن سەرۆک کاهینەکانەوە، ژمارەیەکی زۆر لە پیرۆزەکانم فڕێدایە زیندان. من دەنگی پەسەندکردنم دەدا کاتێک ئەنجومەن بڕیاری لەسێدارەدانیانی دەدا. ¹¹ زۆر جار لە کەنیشتەکاندا سزامان دەدان بۆ ئەوەی نەفرەت لە یەشوا بکەن. هێندە بە توندوتیژی دژی ئەوان بووم تەنانەت لە شارەکانی دەرەوەشدا ڕاوەدوویانم دەنا. ¹² بە مۆڵەت و دەسەڵاتی سەرۆک کاهینەکانەوە بەرەو شاری دیمەشق ڕۆیشتم، ¹³ پاشان ئەی پاشا، نیوەڕۆ لە ڕێگادا ڕووناکییەکم بینی، کە لە خۆر گەشاوەتر بوو بە دەوری خۆم و هاوەڵەکانمدا دەدرەوشایەوە. ¹⁴ هەموومان کەوتینە سەر زەوی. گوێم لە دەنگێک بوو بە زمانی عیبری پێی گوتم: شائۆل، شائۆل، بۆچی دەمچەوسێنیتەوە؟ ¹⁵ بۆیە پرسیم: تۆ کێیت ئەی گەورەم ؟ وەڵامی دایەوە: من یەشوام کە تۆدەیچەوسێیتەوە. ¹⁶ هەستە و لەسەر پێیەکانت بوەستە، چونکە من بۆت دەرکەوتم کە تۆ دەستنیشان بکەم وەک خزمەتکار و شایەتحاڵی ئەم بینینەی کە ئێستا دەمبینیت، و ئەو بینینانەی کە دواییش دەیبینیت. ¹⁷ وە من لە گەل و نەتەوانە ڕزگارت دەکەم کە ئێستا دەتنێرم بۆیان، ¹⁸ بۆ ئەوەی چاویان بکەیتەوە تا لە تاریکییەوە بگەڕێنەوە بۆ ڕووناکی، و لە دسەڵاتی شەیتانەوە بگەڕێنەوە بۆ لای خودا، بۆ ئەوەی لێخۆشبوونی گوناهه وەربگرن و بەشیان هەبێ لە نێو ئەوانەی کە بە باوەڕ بە من پیرۆز کراون. ¹⁹ لەو کاتەوە بەرەنگاری بینینی ئاسمانی نەبوومەوە، ئەی پاشا ئەگریپا. ²⁰ بۆیە سەرەتا مزگێنیم بە خەڵکی دیمەشق و پاشان گەلی یورشەلایم و هەموو ناوچەی یەهودیا، و پاشان بێگانەدا. بۆیە بانگەوازی هەمووانم کرد کە پاشگەز ببنەوە لە گوناهە و بگەڕێنەوە بۆ لای خودا، و کارێک بکەن کە شایەنی پاشگەز بوونەوەیە. ²¹ بەهۆی مزگێنی منەوە یەهودییەکان منیان لە پەرستگاکەدا گرت و هەوڵیاندا بمکوژن. ²² به‌ڵام له‌ خودا تاكو ئه‌مڕۆ پاراستومی ، بە یارمەتی ئەو لە بەردەم بۆ سادە و مەزن شایەتی دەدەم من لەو شتانە نکۆڵی ناکەم کە موشە و پێغەمبەران پێشبینیان کردووە، ²³ کە مەسیح ئازار دەچێژێت و یەکەم کەس دەبێت لە مردن هەستێتەوە، و مزگێنی بە ڕووناکی بە گەلەکەمان و گەلانیتریش بدات». ²⁴ هەر کە پۆڵس لە بەرگریکردندا گەیشتە ئەو ئاستە، فێستوس قسەکانی بڕی و بە دەنگێکی بەرز گوتی: تۆ شێتی پۆڵس! شارەزاییت لە زانستدا شێتی کردووی!» ²⁵ پۆڵس گوتی: «جەنابی فەرمانڕەوا فیستۆس من شێت نیم، چونکە قسەی ڕاستی و ڕاست دەڵێم. ²⁶ ئەو پاشایەی ئێستا بەڕاشکاوی قسەی لەگەڵ دەکەم ئەم بابەتانە دەزانێت کە باسی دەکەم، و دڵنیام هیچیان لێی شاراوە نین، چونکە لە گۆشەیەکی تاریکدا ڕوویان نەداوە! ²⁷ ئەی پاشا ئەگریپا باوەڕت بە قسەی پێغەمبەران هەیە؟ دەزانم باوەڕت پێی هەیە!» ²⁸ ئەگریپا وەڵامی دایەوە: «دوای کەمێکیتر، رازیم دەکەیت کە ببمە مەسیحی!» ²⁹ پاشان پۆڵس گوتی: «کەمێک بێت یان زۆر، دوعای من بۆ خودا لە پێناو تۆ و بۆ هەمووئامادەبوووان لێرە ئەوەیە وەک من ببن، بەڵام بێ ئەم زنجیرانە!» ³⁰ دوای ئەوە پاشا و فەرمانڕەوا و بێرنیخی و ئەوانەی ئامادەبوون هەستان و ³¹ هۆڵەکەیان بەجێهێشت، و بە یەکتریان گوت: «ئەم پیاوە هیچی نەکردووە کە شایەنی مردن یان زیندانی کردن بێت». ³² ئینجا ئەگریپا بە فێستۆسی گوت: «ئەگەر ئەم پیاوە داوای پێداچوونەوەی لە قەیسەر نەکردبایە، لەوانەیە ئازاد بکرایە!»