¹ ئەی برایان و باوکان، ئێستا گوێ لە بەرگریکردنەکەم بگرن». ² کاتێک بیستیان بە زمانی عیبری قسەیان لەگەڵ دەکات، هێمنتر بوون، گوتی: ³ «من پیاوێکی یەهودیم، لە تەرسوس لەدایک بووم کە دەکەوێتە هەرێمی کیلیکیا، بەڵام لەم شارە گەورە بووم و لە لای گەمالئیلی پێغەمبەردا پەروەردە بووم بە تەواوەتی بە پێی تەوڕاتی باوباپیرانمان. منیش بە پەرۆشم بۆ بابەتەکانی خودا، وەک چۆن ئەمڕۆ هەمووتان بەپەرۆشن. ⁴ بۆیە ئەم رێبازەم هەتا مردن چەوساندەوە، شوێنکەوتووانیم گرت لە پیاو و ژن، فڕێمدانە زیندانەکان. ⁵ سەرۆک کاهین و ئەنجومەنی پیران شایەتحاڵی راستی قسەکانمن. نامەم لێ وەرگرتن بۆ براکانیان لە دیمەشق بۆ ئەوەی یارمەتیم بدەن بۆ دەستگیرکردنی ئەوانەی لەوێ بوون، تا بیانبەم بۆ یورشەلایم تا سزاکەیان وەربگرن. ⁶ کاتێک گەیشتمە نزیکی دیمەشق و کاتەکە نزیکەی نیوەڕۆ بوو، لەناکاو ڕووناکییەکی بە دەوروبەرمدا درەوشاوە، ⁷ کەوتمە سەر زەوی، و گوێم لە دەنگێک بوو پێی گوتم: شائۆل، شائۆل، بۆچی دەمچەوسێنیتەوە؟ ⁸ وەڵامم دایەوە: تۆ کێیت ئەی گەورەم؟ پاشان گوتی: من یەشوای ناسیرەیم، کە تۆ ئەیچەوسێنیتەوە. ⁹ هاوڕێکانم ڕووناکییەکەیان بینی، بەڵام گوێیان لە دەنگەکەی قسەی لەگەڵم دەکرد نەبوو. ¹⁰ بۆیە پرسیم: پەروەردگار چی بکەم؟ پاشان پەروەردگار وەڵامی دامەوە: هەستە و بڕۆ ناو دیمەشق، لەوێ پێت دەگوترێت کە دەبێت چی بکەیت. ¹¹ هاوڕێکانم دەستیان گرتم تا گەیاندیانم بە دیمەشق، چونکە بەهۆی چڕی ئەو ڕووناکییە درەوشاوە نەمدەتوانی ببینم. ¹² لە دیمەشق پیاوێک هەبوو بە ناوی ئەنانیاس،خودا پەرەست بوووەک تەوڕات داوای دەکات، هەموو یەهودییەکانی دیمەشق شایەتی باشیان لەسەر دەدا. ¹³ هاتە لام و وەستا و گوتی: برام شائۆل، ببینە. دەستبەجێ بینینم بۆ گەڕایەوە، بەردەمی خۆمم دی، ¹⁴ پاشان گوتی: خودای باوباپیرانمان، پێشوەختە تۆی هەڵبژاردووە بۆ ئەوەی خواستی ئەو بزانی و ڕاستودروست بی و لە دەمی خۆیەوە دەنگی ببیسی. ¹⁵ چونکە تۆ شایەتحاڵ دەبی بۆ ئەو، لەبەردەم هەموو خەڵکدا، بەو شتانەی کە بینیوتە و بیستووتە. ¹⁶ ئێستا بۆ دوای دەخەی؟ هەستە، با لە ئاوهەڵکێشرێی و لە گوناهەکانت خۆت بشۆوە، بە ناوی پەروەردگارەوە بانگەواز بکە. ¹⁷ دوای ئەوە گەڕامەوە بۆ یورشەلایم. لە کاتێکدا لە پەرستگا نزام دەکرد لە هۆش خۆم چووم، ¹⁸ پەروەردگارم بینی پێی فەرمووم: پەلە بکە و بە خێرایی یورشەلایم بەجێبهێڵە، چونکە خەڵکەکەی ڕەتیدەکەنەوە شایەتیم بۆ بدەن. ¹⁹ گوتم: ئەی پەروەردگار، ئەوان دەزانن کە من لە کنیشتەکاندا دەگەڕێم بۆ ئەوانەی باوەڕیان بە تۆ هەیە، تا زیندانیان بکەم و قامچیان لێبەم. ²⁰ من ئامادە بووم کاتێک شایەتیدەرت ستیڤانۆس کوژرا، منیش بە کوشتنی ئەو ڕازی بووم، پاسەوانی جل و بەرگی بکوژەکانیم دەکرد. ²¹ بەڵام پێی گوتم: من دەتنێرم بۆ دوور بۆ نەتەوەکان!» ²² جەماوەرەکەش بەردەام بوون لە گوێ گرتن تا ناوی نەتەوەکانی هێنە، ئینجا هاواریان کرد بۆ فەرماندەکە: «له‌سه‌ر ڕووی زه‌وی مه‌یهێڵه‌! چونكه‌ ئه‌وه‌ شایانی ژیان نییه‌!» ²³ پاشان هاواریان كرد و جله‌كانەکانیان تۆزیان بە هەوادا دەکرد. ²⁴ فه‌رمانده‌كه‌ فه‌رمانی دا پۆڵس ببەنە ژوورەوە بۆ سه‌ربازگه‌کە و بە زەبری قامچی لێی بكۆڵنه‌وه‌، تاكو بزانێت هۆکاری ئەو دروشمانەی لە دژی دەیدەن چیە. ²⁵ كاتێ سەربازەکان به‌ستیانه‌وه‌ تاكو به‌ قامچی لێی بده‌ن پۆڵس به‌ سه‌رپه‌لی سەدەکە كه‌ له‌وێ وه‌ستا بوو گوتی: «ئایا رێگە پێدراوە بۆتان پێش دادگاییكردنی كه‌سێكی ڕۆمانی به‌ر قامچی بده‌ن؟» ²⁶ كاتێ سه‌رپه‌له‌كه‌ گوێی لێبوو، چووه‌ لای فه‌رمانده‌كه‌، هه‌واڵی بابەتەکەی پێدا، و گوتی: «دەزانن ئەگەر لەم پیاوە بدەین بە چ پێشێلکارییەک تاوانبار دەکرێین؟ ئەو بە ڕەگەزنامە ڕۆمانییە!» ²⁷ فه‌رمانده‌كه‌ش بۆ خۆی هات بۆ لای پۆڵس و پێی گوت: «ئایابە راستی تۆ ڕۆمانیت؟» وەڵامی دایەوە: «به‌ڵێ!» ²⁸ فه‌رمانده‌كه‌ گوتی: «من پارەیەکی زۆرم دا بۆ بە دەستهێنانی رەگەزنامەی رۆمانی». پۆڵس گوتی: «به‌ڵام من به‌ لەدایک بوون بە دەستم هێناوە!» ²⁹ ئەو سەربازانەی کە ڕاسپێردرابوون بە زەبری قامچیدا لێپرسینەوەی لێبکەن لێی دوورکەوتنەوە، و خۆدی فەرماندەکەش ترس دایگرت لە دەرئەنجامەکانی بەستنەوەی بە زنجیر، دوای ئەوەی دەرکەوت کە ڕۆمانیە. ³⁰ بۆ ڕۆژی دواتر فەرماندەکە ویستی لە ڕاستی ئەو تۆمەتە بکۆڵێتەوە کە یەهودییەکان ئاراستەی پۆڵسیان کردبوو، کۆت و بەندەکانی کردەوە، و فەرمانی کرد هەموو سەرۆکەکانی کنیشتەکە و ئەندامانی ئەنجومەنی یەهودییەکان ئامادە بن، و پۆڵسی بانگ کرد ولە بەردەمیان وەستاندی.