¹ دوای کۆتایی هاتنی پشێوییەکە، پۆڵس قوتابییەکانی بانگهێشت کرد و هانیدان، پاشان ماڵئاوایی لێکردن و گەشتی کرد بۆ هەرێمی مەکەدۆنیا، ² لەوێ گەشتی دەکرد و لە هەموو شوێنێک بانگەشەی ئامۆژگاری دەکرد و هانی خوێندکارانی دەدا. لە کۆتاییدا گەیشتە یۆنان، ³ سێ مانگ لەوێ بوو، لەکاتێکدا خۆی ئامادە دەکرد بە دەریادا بۆ سوریا گەشت بکات، زانی کە یەهودییەکان پیلانێک داڕشتووە بۆ کوشتنی. بۆیە بڕیاریدا بە ڕێگای مەکەدۆنیا بگەڕێتەوە. ⁴ لە گەشتەکەدا سۆپاتریس کوڕی پێرێس خەڵکی بێریا؛ ئەریستارخۆس و سێکۆندۆس لە تەسالۆنیکی؛ گایۆس و تیمۆساوس لە دێربی، و تیخیکۆس و ترۆفیمۆس لە هەرێمی ئاسیا هاونڵی بوون. ⁵ ئەمانە پێش ئێمە لەگەڵ پۆڵس ڕۆیشتن و لە ترۆئاس چاوەڕێمان بوون. ⁶ دوای جەژنی فەتیرە یەهودییەکان، لە فیلیپیەوە، بە دەریادا گەشتمان کرد، دوای پێنج ڕۆژ گەیشتینە ترۆئاس، پەیوەندیمان پێوە کردن، وحەوت رۆژ لەێ ماینەوە. ⁷ لە یەکەم ڕۆژی هەفتەدا، کاتێک کۆببووینەوە بۆ شکاندنی نان، پۆڵس وتاری بۆ ئەوانە دا کۆببوونەوە. چونکە بە نیاز بوو ڕۆژی دواتر گەشت بکات، وتاری تا نیوەشەو درێژ کردەوە. ⁸ کۆبوونەوەکەمان لە ژوورێکدا لە نهۆمی سەرەوە بوو، و چرایەکی زۆر لەوێ داگیرسێندرابوو. ⁹ گەنجێک بە ناوی ئەفیتیخۆس لە سەر پەنجەرەکە دانیشتبوو، و خەوێکی قووڵ دایگرتبوو، لە کاتێکدا پۆڵس بەردەوام بوو لە وتارە دوور و درێژەکەی، لە نهۆمی سێیەمەوە کەوتە خوارەوە و ، بە مردوویی هەڵگیرا. ¹⁰ پاشان پۆڵس رۆیشتە خوارەوە و خۆی دا بە سەریا و باوەشی پێدا کرد و گوتی: «نیگەران مەبن! دەژی!» ¹¹ دوای ئەوە پۆڵس سەرکەوتەوە و نانەکەی شکاند و خواردنی خوارد، پاش ئەوەی تا بەرەبەیان بەردەوام بوو لە قسەکانی، بە وشکانیدا ڕۆیشت (بۆ ئەسۆس). ¹² سەبارەت بە گەنجەکەش بە زیندووی هێنایان، و ئەوە دڵنەوایییەکی مەزن بوو بۆ ئەوان. ¹³ سەبارەت بە ئێمەش پێش پۆڵس بە دەریادا بەرەو ئەسۆس ڕۆیشتین، لەوێ چاوەڕێی هاتنی بووین بەپێی ئەو پلانەی کە داینابوو چونکە بە نیاز بوو به‌ پێ بێت. ¹⁴ کاتێک گەیشتنە ئێمە، سواری کەشتییەک بووین، و بە دەریادا بەرەو بەندەری میتیلین ڕۆیشتین. ¹⁵ بەردەوام بووین لە گەشتەکە و ڕۆژی دواتر گەیشتینە بەردەم دوورگەی خیۆس. لە ڕۆژی سێیەمدا لە نزیک دوورگەی سامۆس تێپەڕین، ڕۆژی چوارەم گەیشتینە میلیتۆس. ¹⁶ پۆڵس بڕیاری دابوو بە دەریا بە ئەفسوسدا تێپەڕێت بۆ ئەوەی دوا نەکەوێت لە هەرێمی ئاسیا، دەویست تا بتوانێت بە خێرایی لە ڕۆژی پەنجاهەمین بگاتە یورشەلایم. ¹⁷ لە میلیتۆسەوە پۆڵس ناردی بە شوێن بانگهێشتی پیرانی کڵێسای لە ئەفەسۆس. ¹⁸ کاتێک هاتنە لای، پێی گوتن: «دەزانن بە درێژایی ئەو ماوەی کە لە نێوانتاندا بەسەرم برد، هەر لە یەکەم ڕۆژی هاتنم بۆ هەرێمی ئاسیا چۆن ڕەفتارم لەگەڵ ئێوەدا کردووە. ¹⁹ من بە هەموو بێ فیزی، و بە فرمێسکێکی زۆرەوە، خزمەتم بە پەروەردگار کرد، من بەدەست ئەو تەنگانە دەناڵێنم کە بە پیلانی یەهوودییەکان بەسەرمدا هاتووە. ²⁰ هەرگیز هیچم له‌و شتانه‌ پشت گوێ نەخستووە كه‌ سوودبه‌خشن و پێم ڕاگه‌یاندوون، به‌ ئاشكرا و ماڵه‌ بە ماڵ فێرم كردوون. ²¹ بۆیە داوام لە یەهودی و یۆنانییەکان کرد کە پاشگەز ببنە لە گوناهەکانیان و بەرەو لای خودا و باوەڕ بهێنن بە پەروەردگارمان یەشوا. ²² من ئەمڕۆ دەچمە یورشەلایم، بە پاڵنەری گیانەکە، نازانم لەوێ چی چاوەڕێم دەکات. ²³ به‌ڵام گیانە پیرۆزەکە له‌ هه‌موو شارێک کە دەڕۆم پێم رادەگەیەنێت كه‌ زیندان و ته‌نگانه‌ چاوه‌ڕێم ده‌كات. ²⁴ بەڵام ژیانی من هیچ بەهایەکی نیە، تا ئەو کاتەی هەوڵ دەدەم بۆ پێگەیشتووی ئامانجەکەم و تەواوکردنی ئەو خزمەتەی کەپەروەردگار یەشوا پێی سپاردووم: شایەتی دەدەم بە مزگێنی بەخششی خودا. ²⁵ دەزانم لە ئەمڕۆ بە دواوە ڕووخساری من نابینن، ئێوە هەموو ئەوانەی کە من لە نێوانیاندا دەگەڕام و مزگێنی شانشینی خودام دەدا. ²⁶ بۆیە ئەمڕۆ شایەتیتان بۆ دەدەم کە لە خوێنی هەمووتان بێبەریم، ²⁷ چونکە خۆم لە گەیاندنی هەموو مەبەستەکانی خودا بە ئێوە بە دوور نەگرتووە. ²⁸ كه‌واته‌ ئاگاتان له‌ خۆتان و له‌ هه‌موو مێگه‌له‌كه‌ بێت، ئه‌وه‌ی گیانە پیرۆزەکە به‌ چاودێری داناون بۆی، بۆ شوانی کڵێسای خودا کە بە خوێنی خۆی کڕیویەتیەوە. ²⁹ چونكه‌ ده‌زانم پاش ڕۆیشتنم گورگی ڕفێنه‌ر دێنه‌ نێوتان، به‌زه‌یی به‌ مێگه‌له‌كه‌ نایه‌ته‌وه‌. ³⁰ بەڵکوو له‌نێو خۆتاندا کەسانێک سەرهەڵدەدەن فێرکاری لاڕێتان فێر دەکەن، تاكو قوتابییه‌كان به‌دوای خۆیاندا ڕابكێشن. ³¹ بۆیە وریا بن، و لەبیرتان بێت کە، بۆ ماوەی سێ ساڵ، شەو و ڕۆژ نەوەستام لە ئامۆژگاریکردنی هەریەکێکتان بە فرمێسکەوە. ³² ئێستاش ڕادەستی خودا و وشەی بەخششە توانادارەکەیتان دەکەم بۆ ئەوەی بنیاتتان بنێت و میراتێکتان پێبدات بە هاوبەشی لەگەڵ سەرجەم پیرۆزکراوان بۆ خودا. ³³ من هەرگیز ئارەزووی زیو و زێڕ و جل و بەرگی کەسم نەکردووە. ³⁴ دەزانن من بە دەستی خۆم کارم کردووە بۆ دابینکردنی پێداویستییەکانی خۆم و هاوەڵەکانم. ³⁵ بە ڕوونی نیشانم داون کە چۆن دەبێت کۆشش بکەین لە یارمەتیدانی نیازمەندان، وشەکانی پەروەردگار یەشوا، بە بیر بهێنینەوە، کاتێک فەرمووی: خۆشیەک کە لە بەخشیندایە زیاتر لەوەی کە لە وەرگرتندایە!» ³⁶ دوای ئەم قسانە، پۆڵس لەگەڵ هەموویان چۆکی دادا و نزای کرد. ³⁷ هەمووان زۆر گریان، و پۆڵسیان لە باوەش گرت و بە گەرمی ماچیان کرد، ³⁸ زۆر دڵتەنگ بوون، بە تایبەت لەبەر ئەوەی پێی وتبوون کە جارێکی تر ڕووخساری نابیننەوە. پاشان لەگەڵیدا ڕۆیشتن بۆ لای کەشتییەکە و ماڵئاوایییان لێکرد.