¹ هەندێک لە یەهودییەکان کە باوەڕیان بە مەسیح هەبوو لە ناوچەی یەهودیاوە هاتنە ئەنتاکیە، و دەستیان کرد بە فێرکردنی براکان و گوتیان: «ناتوانن ڕزگارتان بێت ئەگەر بەپێی تەوڕاتی موشە خەتەنە نەکرێن» ² پاشان پۆڵس و بەرنابا بە مشتومڕێکی توندیان لەگەلدا کردن. دوای مشتومرەکە، باوەڕدارانی ئەنتاکیە بڕیاریان دا کە پۆڵس و بەرنابا لەگەڵ هەندێک باوەڕداردا بچن بۆ ئەوەی لە یورشەلایم چاویان بە نێردراوان و پیرەکان بکەوێت، بە دوادا چوون بۆ ئەم بابەتە بکەن. ³ دوای ئەوەی کڵێسا ماڵئاواییان لێکردن، گەشتیان کرد بۆ یورشەلایم بە شارەکانی فینقیا و سامریدا تێپەڕین، برایانی ئەوێیان ئاگادار کردەوە کە نەتەوەکانیش بەرەو مەسیح رێنمایی کراون، بەم شێوەیەش خۆشییەکی زۆر لەنێو هەموو برایاندا بڵاو بۆوە. ⁴ کاتێک گەیشتنە یورشەلایم، کڵێسا پێشوازیان لێکردن بە نێردراوان و پیرانییەوە، لە هەموو ئەو شتانە ئاگاداریان کردنەوە کە خودا لە ڕێگەی ئەوانەوە کردبووی. ⁵ بەڵام هەندێک لەوانەی کە لە سەر رێبازی فەریسییەکان بوون، پاشان باوەڕیان هێنابوو، هەستان و گوتیان: «ئەو باوەڕدارانەی کە یەهوودی نین دەبێ خەتەنە بکرێن و پابەندیان بکەن بە تەوڕاتی موشە کار بکەن». ⁶ نێردراوان و پیران کۆبوونەوەیەکیان ئەنجامدا بۆ لێکۆڵینەوەی ئەم بابەتە. ⁷ دوای مشتومڕێکی زۆر، پەترۆ هەستا و گوتی: « ئەی برایان، دەزانن کە زۆر لەمەوبەر خودا ویستی نەتەوەکان وشەی مزگێنییەکە لە زمانی منەوە ببیسن و باوەڕیان هێنا. ⁸ خودای زانا بەوەی لە دڵەکاندایە شایەتیدا لە سەر وەرگرتنی ئەوان، کاتێک گیانی پیرۆزی پێبەخشین وەک چۆن بە ئێمەی بەخشی. ⁹ کەواتە ئەو لە هیچ شتێکدا جیاوازی لە نێوان ئێمە و ئەواندا نەکرد، کاتێک دڵی ئەوانی بە باوەڕ پاک کردەوە. ¹⁰ کەواتە بۆچی دژایەتی خودا دەکەن بارێکی قورس بە قوتابییەکانی پەروەردگار هەڵدەگرن کە باوکان ناتوانا بوون و ئێمە ناتواناینلە هەڵگرتنی؟ ¹¹ ئێمە باوەڕمان وایە کە ڕزگارمان دەبێت، وەک چۆن ئەوان ڕزگاریان دەبێت، بە بەخششی پەروەردگار یەشوا». ¹² پاش ئەوەی مشتومڕەکانی نێوان ئامادەبووان وەستا، و گوێیان لە بەرنابا و پۆڵس گرت باسی ئەو نیشانە و سەرسوڕهێنەرانەیان بۆ کردن کە خودا لە ڕێگەی ئەوانەوە لەناو نەتەوەکاندا کردوویەتی. ¹³ دوای ئەوەی قسەکەیان تەواو کرد، یاکۆڤ وتی: ¹⁴ «ئەی برایان گوێ بگرن: شیمۆن ئاگاداری کردنەوە کە چۆن خودا لە سەرەتاوە بەدوای نەتەوەکاندا گەڕا بۆ ئەوەی لە نێویاندا گەلێک وەربگرێت کە ناوی ئەو هەڵبگرێت؛ ¹⁵ ئەمەش لەگەڵ قسەی پێغەمبەراندا یەکدەگرێتەوە، وەک لە پەرتووکەکەدا هاتووە. ¹⁶ دوای ئەمە دەگەڕێمەوە و چادرە رووخاوەکەی داڤید ئاوەدان دەکەمەوە پاشان وێرانەکانی هەڵدەستێنمەوە و سەرلەنوێ بنیاتی دەنێم، ¹⁷ بۆ ئەوەی خەڵکیتر و هەموو ئەو گەلانەی کە ناوی منیان هەڵگرتووە، بەدوای پەروەردگاردا بگەڕێن، پەروەردگار دەفەرموێت، ئەوەی ئەم کارانە دەکات ¹⁸ لە سەرەتاوە ناسراوە. ¹⁹ بۆیە من پێم وایە نابێت بارگرانی بخەینە سەر ئەو کەسانەی کە لە ناو نەتەوەکان بەرەو خودا رێنوێنی کراون، ²⁰ بەڵکو نامەیەکیان بۆ دەنووسین کە تیایدا رایاندەسپێرن خۆیان بە دوور بگرن لە خواردنی قوربانی ناپاکی پێشکەشکراو بە بتەکان، و داوێنپیسی، و گۆشتی ئاژەڵە خنکێنراوەکان، و خوێن. ²¹ چونکە موشە، هەر لە کۆنەوە، شوێنکەوتووانی لە هەموو شارێکدا، هەموو شەباتێک تەوڕاتەکەی دەخوێننەوە و لە کەنیشتەکاندا بانگەشەی بۆ دەکەن». ²² ئینجا نێردراوان و پیران و هەموو کۆمەڵگاکە ڕێککەوتن لەسەر ئەوەی لەنێو برایان دوو پیاو هەڵبژێرن بۆ ئەوەی لەگەڵ پۆڵس و بەرنابادا بیاننێرن بۆ ئەنتاکیە. بۆیە یەهودایان هەڵبژارد، کە پێی دەگوترا بارسابا، و سیلاس، کە پێگەیەکی باڵای هەبوو لە نێو برایاندا. ²³ وە ئەم نامەیان رادەست کردن: «لە نێردراوان و پیران و برایانەوە، بۆ برایان باوەڕدار لە نەتەوەکان لە هەرێمەکانی ئەنتاکیە و سوریا و کیلیکیا: سڵاو! ²⁴ زانیومانە کە هەندێک کەس لە ئێمەوە هاتوون بۆ لای ئێوە، بەبێ مۆڵەتی ئێمە بە قسەکانیان پشێویان لە نێوانتاندا دروست کردووە و بیرکردنەوەکانتانیان تێکداوە. ²⁵ بۆیە ئێمە بە یەک بۆچوون ڕێککەوتین کە دوو پیاو هەڵبژێرین کە ژیانی خۆیان تەرخان کردووە بۆ ناوی پەروەردگارمان یەشوای مەسیح، لەگەڵ برا خۆشەویستەکانمان بەرنابا و پۆڵس دەیاننێرین بۆلاتان. ²⁷ بۆیە یەهودا و سیلاسمان نارد، بۆ ئەوەی پەیامەکە بە زارەکی پێتان بگەیەنن. ²⁸ گیانی پیرۆز و ئێمە بە باشمان زانی کە ئێمە هیچ باریک لە سەرووی ئەوەی کە لەسەرتانە، نەخەینە سەرتان. ²⁹ بەڵکو لەسەرتانە خۆتان بەدوور بگرن لە خواردنی قوربانی پێشکەشکراو بە بتەکان ، لە خواردنی خوێن و گۆشتی ئاژەڵە خنکێنراوەکان، و لە داوێنپیسی. کارێکی باشە بۆتان ئەگەر خۆتان لەم بابەتانە بپارێزن. خوا لێتان خۆشبێت!» ³⁰ بۆیە هەڵگرانی نامەکە بەڕێکەوتن، و گەشتیان کرد بۆ ئەنتاکیە، لەوێ کۆمەڵەکەیان بانگهێشت کرد بۆ کۆبوونەوە، ³¹ و نامەکەیان پێشکەش کردن. کاتێک خوێندیانەوە، شاد بوون بەو هاندانەی کە تێیدا بوو. ³² یەهودا و سیلاش پێغەمبەر بوون، بۆیە زۆر ئامۆژگاری براکانیان کرد، ورەیان بەهێزتر کردن. ³³ دوای ماوەیەک برایانی ئەنتاکیە بە ئاشتی ڕەوانەی ئەو کەسانەیان کردن کە ناردبوویانن. ³⁴ بەڵام سیلاس پێی باش بوو لە ئەنتاکیە بمێنێتەوە، بۆیە یەهودا بە تەنیا گەڕایەوە. ³⁵ هەروەها پۆڵس و بەرناباش لەوێ مانەوە و بە وشەی پەروەردگار، فێرکاریان دەکرد و مزگێنیان دەدا.زۆر کەسی دیکەش هاوکاریان دەکردن. ³⁶ دوای چەند ڕۆژێک پۆڵس بە بەرنابای گوت: «با بگەڕێینەوە و بزانین بارودۆخی ئەو شارانە چۆنە کە بە وشەی پەروەردگار مزگێنیمان تیا داوە». ³⁷ بەرنابا پێشنیاری کرد یۆخەنا کە نازناوی مارکۆس بوو لەگەڵ خۆیان ببەن. ³⁸ بەڵام پۆڵس ڕەتیکردەوە لەگەڵ خۆیان بیبات، چونکە لە پامفیلیا لێیان جیا ببۆوەو، لە خزمەتدا یاوەری نەدەکردبوون. ³⁹ ناکۆکییەک وا کەوتە نێوانیان کە لەیەکتر جیابوونەوە. بەرنابا مارکۆسی هەڵگرت و بە کەشتی گەشتیان کرد بەرەو قوبرس. ⁴⁰ پۆڵس سیلاسی هەڵیبژارد کە لەگەڵیدا بێت. جا برایانی بە بەخششی خودا سپارد، ⁴¹ بە هەرێمەکانی سوریا و کیلیکیادا گەشتی دەکرد و کڵێساکانی بەهێز دەکرد.