¹ هەندێک پێغەمبەران و مامۆستایانی کڵێسای ئەنتاکیە؛ لەوانە بەرنابا؛ شیمۆن کە پێی دەگوترا ڕەشەکە؛ لوسیۆس خەڵکی قیرەوان؛ مەنائین کە بە منداڵی لەگەڵ هیرۆد فەرمانڕەوای تێترارک پەروەردە ببوو؛ و شائۆلیش. ² ڕۆژێک، کە بەرۆژووەوە پەروەردگاریان پەرستش دەکرد، گیانی پیرۆز پێی فەرموون: «بەرنابا و شائولم بۆ دیاری بکەن بۆ ئەو کارەی کە بانگم کردوون.». ³ بۆیە دوای ئەوەی بە رۆژوو بوون و نزایان کرد دەستیان لە سەر دانان و ڕەوانەیان کردن. ⁴ کاتێک گیانە پیرۆزەکە بەرنابا و شائۆلی نارد، چوون بۆ بەندەری دەریایی سۆلۆکیا، و پاشان بە کەشتی بەرەو دوورگەی قوبرس ڕۆیشتن. ⁵ کە گەیشتنە دوورگەکە لە شارۆچکەی سالامیس دابەزین، لە کەنیشتەی یەهودییەکان بانگەشەی وشەی خودایان کرد، و یۆخەنا مارکۆسیش وەک یاریدەدەر لەگەڵیان ڕۆیشت. ⁶ هەموو دوورگەکەیان تێپەڕاند تا گەیشتنە پافۆس. لەوێ چاویان بە جادووگەرێکی یەهودی و پێغەمبەرێکی درۆزن کەوت کە ناوی باریەشوع بوو، ⁷ لە سێرگیۆس پاوڵۆس، فەرمانڕەوای قوبرس نزیک بوو. فەرمانڕەوا زیرەک بوو، بۆیە بەرنابا و شائۆلی بانگ کرد، داوای لێکردن بە وشەی خودا قسەی لەگەڵ بکەن. ⁸ جادووگەرە زاناکە، و ئەمە مانای ناوەکەیەتی، دژایەتی کردن، هەوڵیدا فەرمانڕەوا لە باوەڕ لابدات. ⁹ بەڵام شائۆل کە ناوی پۆڵس بوو، پڕ بوو لە گیانی پیرۆز، سەیری جادووگەرەکەی کرد و گوتی: ¹⁰ «ئەی پڕ لە فێڵ و خراپەکاری! ئەی کوڕی شەیتان! ئەی دوژمنی هەموو ڕاستودروستییەک! ئایا واز لە بەلارێدا بردنی ڕێگا ڕاستەکانی پەروەردگار ناهێنی ؟ ¹¹ ئێستا دەستی پەروەردگار بۆت درێژ دەکرێتەوە و کوێر دەبیت و بۆ ماوەیەک ڕووناکی نابینیت». دەستبەجێ هەورێکی ڕەش بەسەر چاوەکانیدا کەوت، و بەدوای کەسێکدا دەگەڕا دەستی بگرێ و بە ڕێی بکات! ¹² کاتێک فەرمانڕەوا بینی چی ڕوویدا، باوەڕی هێنا و سەرسام بوو بە فێرکارییەکانی پەروەردگار. ¹³ پۆڵس و هاوڕێکانی لە پافۆسەوە بە کەشتی بەرەو پێرگا لە پامفیلیا ڕۆیشتن. لەوێ یۆخەنا لە پۆڵس و بەرنابا جیا بۆوە و گەڕایەوە یۆرشەلایم. ¹⁴ ئەوانیش لە پێرگاوە رۆیشتن بۆ ئەنتاکیە کە سەر بە پارێزگای پیسیدیایە. لە ڕۆژی شەباتدا چوونە ناو کەنیشتەیەکی یەهودی و دانیشتن. ¹⁵ دوای خوێندنەوەی تەوڕات و نووسراوەکانی پێغەمبەران، سەرۆکانی کەنیشتەکە داوایان لێکردن و گوتیان: «برایان، ئەگەر شتێکتان هەیە بانگەشەی بۆ کۆبووەکان بکەن ،بیڵێن». ¹⁶ پۆڵس هەستا، بە دەست ئاماژەی کرد، و گوتی: «گوێ بگرن ئەی نەوەی یەسرائیل، وئەی لەخواترسەکان: ¹⁷ خودای ئەم گەلەی یەسرائیل باوباپیرانی ئێمەی هەڵبژارد، و بە درێژایی مانەوەیان لە میسر پێگەی گەلەکەمانی بەرزکردەوە، پاشان بە بەهێزی بازووی خۆی هێنانیە دەرەوە. ¹⁸ نزیکەی چل ساڵ لە بیاباندا بەخێوی کردن، ¹⁹ پاشان حەوت گەلی لە خاکی کەنعان دوورخستەوە، و خاکەکەی بە میرات پێدان، ²⁰ بۆ ماوەی نزیکەی چوار سەد و پەنجا ساڵ. پاشان داوەری بۆ دانان کە دواهەمینیان پێغەمبەر شمۆئیل بوو. ²¹ جا نەوەی ئیسرائیل داوایان لێکرد پاشایەکیان بۆ دابنێت، بۆیە خودا شائۆلی کوڕی کیشی، دانا بەسەریاندا، لە هۆزی بنیامین، و چل ساڵ فەرمانڕەوایی بەسەردیاندا کرد. ²² پاشان خودا دووری خستەوە، و داڤیدی لە جێی ئەو دانا، کە شایەتی بۆ دا و فەرمووی: بەڕاستی من داودی کوڕی یسام دۆزیەوە پیاوێکە دڵمە، هەموو ئەوەی من دەمەوێت دەیکات. ²³ خودا بۆ یەسرائیل لە نەوەی داڤید رزگاریدەرێکی نارد ئەویش یەشوایە، بۆ جێبەجێکردنی بەڵێنەکەی. ²⁴ یۆخەنان پێش یەشوا هات، بۆ ئەوەی هەموو گەلی یەسرائیل بانگهێشت بکات بۆ لە ئاوهەڵکێشانی پاشگەز بوونەوە. ²⁵ کاتێک یۆخەنان ئەرکەکەی تەواو دەکرد، گوتی: پێتان وایە من کێم؟ من ئەو نیم (رزگاریدەرەکە)، بەڵکو ئەو دوای من دێت. وە من شایەنی ئەوە نیم قەیتانی پێڵاوەکانی بکەمەوە! ²⁶ ئەی برایان، ئەی نەوەکانی رەگەزی ئەڤراهام، و هەموو ئەوانەی لە خوداترسن و لێرە ئامادەن: خودا وشەی ئەم ڕزگارییەی بۆ ئێمە ناردووە! ²⁷ چونکە خەڵکی یورشەلایم و سەرۆکەکانیان کاریان کرد بۆ جێبەجێکردنی ئەو پێشبینیانەی کە هەموو ڕۆژێکی شەبات بۆتان دەخوێندرێتەوە، بەڵام نەیاندەزانی. کاتێک بڕیاریان لە سەر یەشوا دا بە مردنیان ، ²⁸ هەرچەندە هیچ تاوانێکیان لە دژی نەدۆزیەوە کە شایەنی مردن بێت، بەڵام داوایان لە پیلاتۆس کرد بیکوژێت. ²⁹ دوای ئەوەی هەموو ئەو شتانەی لەسەری نووسرابوو، لە ئەودا جێبەجێ کران، لە خاچ دایانبەزاند، و لە گۆڕێکدا ناشتیان. ³⁰ بەڵام خودا لە مردن هەڵیساندەوە، ³¹ چەند ڕۆژێک بۆ ئەوانەی لە گەلیلیەوە بۆ یورشەلایم لەگەڵیدا بوون دەرکەوت. ئێستاش لەبەردەم خەڵکدا شایەتی بۆ ئەو دەدەن. ³² ئەوەتا ئێمەیش مژدەتان ئەو بەڵێنەتان پێدەدەن خودا بە باوباپیرانمان دابوو، ³³ و بۆ ئێمەی رۆڵەکانیان بەدیهێنا بە هەستانەوەی یەشوا لە مردن بەپێی ئەوەی لە زەبوری دووهەمدا نووسراوە: تۆ کوڕی منیت؛ ئەمڕۆ بووم بە باوکت. ³⁴ سەبارەت بەو ڕاستییەی کە خودا یەشوای لە مردن هەستاندەوە و ڕێگە نادات ئیتر لەناوچوون دەستی بەسەردا بگرێت، ئەمە لە فەرموودەکەیدا هاتووە: بەخششە پیرۆزە ڕاستەقینەکانتان پێ دەبەخشم، کە بەڵێنم بە داڤید دا. ³⁵ داڤید لە زەبورێکی تردا دەڵێت: ڕێگە نادەیت تاکە پیرۆزەکەت لەناوچوون ببینێت. ³⁶ داڤید دوای خزمەتکردنی گەلەکەی لە سەردەمی خۆیدا بەپێی خواستی خودا مرد، و بە خاک سپێردرا، پەیوەست بوو بە باووباپیرانییەوە، و لە ناوچوون بە سەریدا هات. ³⁷ بەڵام ئەو کەسەی کە خودا هەڵیستاندەوە، هەرگیز تووشی لەناوچوون نەبووە. ³⁸ ئەی برایان، بزانن بە یەشوا مزگێنی لێخۆشبوونی گوناهەکانتان پێدەدرێت، ³⁹ هەرکەسێک باوەڕ بهێنێت بە ئەو بێتاوان دەکرێت لە هەموو شتێک کە تەوڕاتی موشە نەیتوانیوە بێتاوانی بکات. ⁴⁰ ئاگادار بن با ئەوەی لە پەرتووکی پێغەمبەراندا هاتووە بەسەرتاندا نەیەت: ⁴¹ ببینن، ئێوەی گاڵتەجاڕەکان، سەرسام بن و لەناو بچن! چونکە من لە ڕۆژگاری ئێوەدا کارێک دەکەم کە ئەگەر کەسێک پێی بگووتنایەت باوەڕتان پێی نەدەکرد!» ⁴² لە کاتێکدا ئامادەبووان دەڕۆیشتن، داوایان لە پۆڵس و بەرنابا کرد کە ڕۆژی شەباتی دواتر بێنەوە و باسی ئەم بابەتەیان بۆ بکەن. ⁴³ دوای کۆبوونەوەکە زۆرێک لە یەهودییەکان و ئەوانەی گۆڕابوون بە یەهودی دوایان کەوتن، ئەوانیش بە قسەیان لەگەڵ کردن و هانیان دان لە بەخششی خودادا چەسپاو بن. ⁴⁴ لە شەباتی دواتر، نزیکەی هەموو خەڵکی شارەکە کۆبوونەوە بۆ گوێگرتن لە وشەی خودا. ⁴⁵ کاتێک یەهودییەکان خەڵکەکەیان بینی، پڕ بوون لە ئیرەیی و دەستیان کرد بە کوفر کردن دژایەتی قسەکانی پۆڵسیان دەکرد. ⁴⁶ پاشان پۆڵس و بەرنابا بە بوێرییەوە گوتیان: «پێویست بوو سەرەتا وشەی خوداتان پێ بگەیەنینم، بەڵام ئێوە ڕەتتان کردەوە و دەرتانخست کە شایەنی ژیانی هەتاهەتایی نین. ئەوا ئێمە ڕوو لە نەتەوەکان دەکەین! ⁴⁷ چونکە پەروەردگار رایسپاردین و فەرمووی : تۆم کردوومە ڕووناکییەک بۆ گەلان، تا ببیتە ڕێگای ڕزگاربوون تا ئەوپەڕی زەوی!» ⁴⁸ کاتێک نەتەوەکان ئەمەیان بیست، زۆر دڵخۆش بوون و وشەی پەروەردگاریان شکۆمەند کرد. هەموو ئەوانەی خودا بۆ ژیانی هەتاهەتایی ئامادەی کردبوون باوەڕیان هێنا. ⁴⁹ بەم شێوەیە وشەی پەروەردگار بەسەر هەموو ناوچەکەدا بڵاوبووەوە. ⁵⁰ بەڵام یەهودییەکان ژنە ناوداران و ئاینییەکان و کەسایەتییە دیارەکانی شارەکەیان هاندا بۆ چەوساندنەوەی پۆڵس و بەرنەبایان ، تا لە وڵاتەکەیان دەریان بکەن، ⁵¹ بۆیە تۆز و خۆڵی ئەوێیان لە پێیەکانی خۆیان تەکاند و بەرەو شاری کۆنیا ڕۆیشتن. ⁵² سەبارەت بە قوتابییەکان، پڕ بوون لە خۆشی و گیانی پیرۆز.