¹ نێردراوان و براکانی سەرتاسەری یەهودا بیستیان کە نەتەوەکانیش وشەی خودایان وەرگرتووە، ² بۆیە کاتێک پەترۆ گەڕایەوە بۆ یورشەلایم، باوەڕدارە خەتەنەکراوەکان ڕەخنەیان لێ گرت و گوتیان: ³ «چۆن چووی بۆ ماڵی پیاوێکی خەتەنەنەکراو، و لەگەڵیان خواردنت خوارد؟» ⁴ پەترۆ لە سەرەتاوە ئەوەی رووی دابوو بۆی گێڕانەوە، و گوتی: ⁵ «لە شاری یافا بووم نزام دەکرد، خەو دایگرتم، بینینێکم بینی و شتێکی وەک پارچە قوماشێکی گەورەم بینی کە لە ئاسمانەوە بە چوار لاکەیەوە بەسترابۆوە دادەبەزێت، و هاتە خوارەوە بۆلام. ⁶ کە وردبوومەوە ئاژەڵی چوار پێی زەوی و دڕندە و خشۆکە و باڵندەی ئاسمانم بینی، ⁷ پاشان گوێم لە دەنگێک بوو کە پێی گوتم: پەترۆ، هەستە سەربڕە و بخۆ! ⁸ وەڵامم دایەوە: نەخێر پەروەردگار، هیچ شتێکی ناپاک و رێگەپێنەدراو ناخۆم. ⁹ دەنگە ئاسمانییەکە دیسان گوتی: شتێک کە خودا پاکی کردۆتەوە بە ناپاکی مەزانە. ¹⁰ ئەمە سێ جار ڕوویدا، پاشان هەمووی هەڵکێشرایەوە بۆ ئاسمان. ¹¹ هەر لەو کاتەدا سێ پیاو کە لە قەیسەرەوە نێردرابوون گەیشتنە ئەو ماڵەی کە من لێی دەمامەوە، ¹² گیانەکە فەرمانی پێکردم هیچ دوودڵ مەبە بۆ چوون لەگەڵیان، رێکەوتم، و ئەم شەش برایەش لەگەڵمدا هاتن. کاتێک چووینە ماڵی پیاوەکە، ¹³ باسی ئەوەی بۆ کردین کە چۆن بینیویەتی فریشتەیەک لە ماڵەکەیدا دەرکەوتووە و فەرمانی پێکردووە: پیاوەکانت بنێرە بۆ یافا، بە دوای شیمۆن کە پێی دەوترێت پەترۆ، ¹⁴ ئەو پەیامێکتان بۆ دەهێنێت کە لە ڕێگەیەوە تۆ و هەموو بنەماڵەکەت ڕزگارتان دەبێت. ¹⁵ کاتێک دەستم کرد بە قسەکردن، گیانی پیرۆز هاتە سەریان وەک چۆن لە سەرەتاوە هاتبووە سەر ئێمە ¹⁶ پاشان بیرم هاتەوە کە پەروەردگار چی پێمان فەرموو: یۆخەنان خەڵکی لە ئاوهەڵدەکێشا، بەڵام ئێوە لە گیانی پیرۆزیان هەڵدەکێشن. ¹⁷ بۆیە ئەگەر خودا هەمان ئەو دیارییەی پێدابن کە بە ئێمەی بەخشی، کە باوەڕمان بە پرودرگار یەشوای مەسیحە، من کێم کە رێگری لە خودا بکەم؟» ¹⁸ کاتێک ناڕازییەکان ئەمەیان بیست، بێدەنگ بوون، و ستایشی خودایان کرد و گوتیان: «کەواتە، تەنانەت خودا پاشگەزبوونەوەی لە گوناهە بە نەتەوەکانیش بەخشی کە دەبێتە هۆی ژیان». ¹⁹ ئەوانەی بەهۆی ئەو ئازارەوە کە لە کاتی کوژرانی ستیڤانۆسدا سەریهەڵدا، پەرتەوازە ببوون، تا فینیقی و قوبرس و ئەنتاکیە ڕۆیشتن، و تەنها لەناو یەهودییەکاندا بانگەشەیان بۆ وشەکە دەکرد. ²⁰ بەڵام هەندێکیان، خەڵکی قوبرس و قیرەوان بوون، چوون بۆ ئەنتاکیە، و مزگێنی یەشوای پەروەردگاریان بە یۆنانیەکان راگەیاند. ²¹ دەستی پەروەردگار لەگەڵیان بوو، ژمارەیەکی زۆر لە خەڵک باوەڕیان هێنا و ڕوویان لە پەروەردگار کرد. ²² هەواڵی ئەمە گەیشتە کڵێسای یورشەلایم و بەرناباشیان نارد بۆ ئەنتاکیە. ²³ کاتێک گەیشتە لای و بینی بەخششی خودا چی کردووە، دڵخۆش بوو، و هەمووانی هاندا کە بە هەموو دڵەوە لە پەروەردگاردا چەسپاو بن. ²⁴ بەرنابا پیاوێکی باش بوو پڕ بوو لە گیانی پیرۆز و باوەڕ. و ژمارەیەکی زۆر خەڵکی پەیوەست کرد بە پەروەرگار. ²⁵ پاشان بەرناباش چووە تەرسۆس بۆ ئەوەی بەدوای شائۆلدا بگەڕێت. ²⁶ کاتێک دۆزییەوە هێنای بۆ ئەنتاکیە، بۆ ماوەی ساڵێکی تەواو بەرنابا و شاول لەگەڵ کڵێساکان کۆدەبوونەوە، و ژمارەیەکی زۆر خەڵکیان فێرکرد. بۆ یەکەم جار لە ئەنتاکیە قوتابییەکانی پەرووەردگار ناویان لێنرا مەسیحییەکان. ²⁷ لەم ماوەیەدا هەندێک پێغەمبەر لە یورشەلایمەوە هاتن بۆ ئەنتاکیە، ²⁸ یەکێکیان کە ناوی ئەگابوس بوو، لە ڕێگەی گیانەکەوە پێشبینی کرد کە برسێتییەکی قورس بەسەر هەموو وڵاتدا بڵاوبێتەوە. ئەم برسێتیە لە سەردەمی کلۆدیۆسی قەیسەردا ڕوویدا. ²⁹ قوتابییەکان بە پێی توانایان بڕیاریان دا، یارمەتی بۆ ئەو خوشک و برایانە بنێرن کە لە یەهودیا دەژیان. ³⁰ ئەمەیان کرد، و یارمەتییەکانیان بە بەرنابا و شائۆل بۆ پیران نارد.