¹ لە کەیسەریە سەرپەلێک هەبوو بە ناوی کۆرنێلیۆس، سەر بە یەکەیەک ئیتالیا ناسرابوو. ² ئەو و هەموو خێزانەکەی لە خوداترس بوون، لەگەڵ خەڵک زۆر بەخشندە بوو، و بە بەردەوامی بۆ خودا نزای دەکرد. ³ ڕۆژێک نزیکەی کاتژمێر سێی پاش نیوەڕۆ بینینێکی هەبوو، بە ڕوونی فریشتەیەکی خودای بینی کە هاتە لای و فەرمووی: «کۆرنێلیۆس!» ⁴ کۆرنێلیۆس بە ترسەوە سەیری دەکرد، پرسی، «بفەرموو گەورەم» فریشتەکە وەڵامی دایەوە: «نزا و بەخششەکانت بۆ هەژاران وەک قوربانییەکی یادگاری هاتنە بەردەم خودا. ⁵ ئێستا کەسێک بنێرە بۆ یافا تا پیاوێک به ناوی شیمۆن کە بە پەترۆ ناسراوە بهێنن بۆ ئێرە. ⁶ لای شیمۆنی چەرمساز دەمێنێتەوە، کە ماڵەکەی لە کەنار دەریایە.» ⁷ کاتێک فریشتەکە ڕۆیشت، کۆرنێلیۆس دوو لە خزمەتکارەکانی و سەربازێکی دڵسۆزی بانگ کرد، کە یەکێک بوو لە بەردەستەکانی، ⁸ هەموو ئەو شتانەی بۆ گێڕانەوە، کە ڕوویدا و ناردنی بۆ یافا. ⁹ نزیکەی نیوەڕۆی ڕۆژی دواتر، کاتێک لە گەشتەکەیاندا بوون و لە یافا نزیک دەبوونەوە، پەترۆ چووە سەربان بۆ ئەوەی نزا بکات. ¹⁰ زۆری برسی بوو، و حەزی لێبوو شتێک بیخوات، و لە کاتێکدا ژەمەکە ئامادە دەکرا، خەوی لێکەوت، ¹¹ بینینێکی دی: ئاسمانی بینی کە کرایەوە، و شتێکی وەک پارچەیەکی گەورەی قوماش بە چوار گۆشەکەیەوە دەخرێتە خوارەوە بۆ سەر زەوی، ¹² پڕ بوو لە هەموو جۆرە ئاژەڵێکی سەرزەوی چوار پێ، و هەروەها خشۆکە و باڵندەی ئاسمان. ¹³ پاشان دەنگێک پێی گوت: «پەترۆ هەستە، سەربڕە و بخۆ!» ¹⁴ پیتەر وەڵامی دایەوە :«بە دڵنیاییەوە نەخێر، پەروەردگار، من هەرگیز شتێکی رێگەێنەدراو یا ناپاکم نەخواردووە». ¹⁵ دەنگەکە دیسان پێی گوت: «بە شتێک کە خودا پاکی کردۆتەوە با ناپاکی مەزانە!» ¹⁶ ئەمە سێ جار ڕوویدا، و پاشان پارچە قوماشەکە بەرزکرایەوە بۆ ئاسمان. ¹⁷ لە کاتێکدا کە پەترۆ بیری لە مانای بینینەکەی دەکرد، ئەو پیاوانەی کە کۆرنێلیۆس ناردبووی بۆ ماڵی شیمۆنی چەرمسازیان دەپرسی و لە بەر دەروازەکە وەستان ¹⁸ پرسیاریان کرد: «ئایا شیمۆنی ناسراو بە پەترۆ لەوێ دەمێنێتەوە؟» ¹⁹ پەترۆ هێشتا بیری لە مانای بینینەکە دەکردەوە، گیانەکە پێی گوت: «شیمۆن، سێ پیاو بەدوای تۆدا دەگەڕێن ²⁰ بچۆ خوارەوە بێ دوودڵی لەگەڵیان بڕۆ، چونکە من ئەوانم ناردووە». ²¹ پەترۆ رۆیشتە خوارەوە و بە پیاوەکانی گوت: «من ئەو کەسەم کە ئێوە بەدوایدا دەگەڕێن. بۆچی هاتوون؟» ²² پیاوەکان وەڵامیان دایەوە: «ئێمە لە لایەن کۆرنێلیۆسی سەرۆک سەدەوە هاتووین پیاوێکی ڕاستودروست و لەخوداترسە، هەموو گەلی یەهوود شایەتی لە سەر دەدەن. خودا لە رێی فریشتەیەکی پیرۆز پێی فەرموو داوات لێبکات بێیتە ماڵەکەی بۆ ئەوەی قسەکانت ببیستێت». ²³ پاشان پەترۆ پیاوەکانی بانگهێشت کرد بۆ ماڵەوە تا ببنە میوانی. ڕۆژی دواتر پەترۆ لەگەڵیان بەڕێ کەوت و هەندێک لە باوەڕدارانی یافاش لەگەڵیاندا ڕۆیشتن، ²⁴ ڕۆژێک دواتر گەیشتنە قەیسەرە. کۆرنێلیۆس چاوەڕوانی ئەوان بوو، و خزم و هاوڕێ نزیکەکانی کۆکردبۆوە. ²⁵ کاتێک پەترۆ هاتە ناو ماڵەکەوە، کۆرنێلیۆس کڕنوشی بۆ برد. ²⁶ بەڵام پەترۆ هەڵیستاندەوە و گوتی: «هەستە! منیش مرۆڤێکم وەک تۆ!» ²⁷ بە دەم قسەکردنەوە پەترۆ لەگەڵیدا چووە ژوورەوە، و جەماوەرێکی گەورەی خەڵکی بینی، ²⁸ پێی گوتن: «ئێوە باش دەزانن کە پێچەوانەی یاسای ئێمەیە کە یەهودییەک هاونشینی لەگەڵ نەتەوەکان بکات یان بچێتە ماڵیان. بەڵام خودا نیشانی دام کە نابێت کەس بە ناپاک بزانم. ²⁹ بۆیە کاتێک بانگم کرا بەبێ ئەوەی هیچ ناڕەزایەتییەکم هەبێت، وەڵامی بانگهێشتەکەتم داوە. کەواتە دەتوانم بپرسم بۆچی ناردووتە بەدواما؟» ³⁰ کۆرنێلیۆس وەڵامی دایەوە: «چوار ڕۆژ لەمەوبەر، لە کاتژمێرە سێی پاش نیوەڕۆدا لە ماڵەکەمدا نزام دەکرد لەناکاو پیاوێک بە جلی درەوشاوە لەبەردەممدا دەرکەوت و ³¹ پێی گوتم : کۆرنێلیۆس، خودا نزاکانی تۆی بیستووە و بەخششەکانتی بۆ هەژاران لە لە یادە. ³² ئێستا پیاوەکانت بنێرە بۆ یافا، بانگهێشتی شیمۆن بکە پێی دەوترێت پەترۆ. ئەو میوانە لە ماڵی شیمۆنی چەرمساز کە لە کەناری دەریا دەژی. ³³ بۆیە دەستبەجێ ناردم بە دواتا. ئەوە لە چاکەت بوو کە هاتی. ئێستا هەموومان لێرەین لەبەردەم خودادا بۆ ئەوەی گوێ لە هەموو ئەو شتانە بگرین کە پەروردگار فەرمانی پێکردوویت پێمان بڵێیت». ³⁴ پەترۆ دەستی کرد بە قسەکردن: «ئێستا تێدەگەم کە لای خودا کەس لەویتر مەزنتر نیە، ³⁵ بەڵکو ئەو کەسە وەردەگرێت کە چاکەکار و لەخواترسە بە بێ ئەوەی گرینگی بە رەگەزی بدات. ³⁶ ئینجا وشەی خۆی بۆ گەلی یەسرائیل نارد، مزگێنی ئاشتی لە ڕێگەی یەشوای مەسیحەوە ڕاگەیاند کە پەروەردگاری هەمووانە. ³⁷ دەزانن چی ڕوویداوە لە سەرانسەری پارێزگای یەهودا، کە لە گەلیلییەوە دەستی پێکردووە دوای ئەو یۆخەنا بانگەشەی بۆ لە ئاوهەڵکێشان دەکرد. ³⁸ خودا یەشوای ناسیرەیی بە گیانی پیرۆز و هێزەوە دەستنیشان کرد،پاشان لە شوێنێکەوە بۆ شوێنێکیتر دەرۆیشت چاکەی دەکرد، و هەموو ئەوانەی چاک دەکردەوە کە لە ژێر دەسەڵاتی شەیتان بوون، چونکە خودا لەگەڵیدا بوو. ³⁹ ئێمە شایەتحاڵی هەموو ئەو کارانەین کە لە ناوچەی یەهودیا و لە یورشەلایم کردوویەتی، بەڕاستی لەسە خاچەکە کوشتیان. ⁴⁰ بەڵام لە ڕۆژی سێیەمدا لە هەستایەوە، و دەرکەوت ⁴¹ نە بۆ هەموو گەل، بەڵکو بۆ شایەتحاڵەکانی کە خودا پێشتر هەڵیبژاردبوون، بۆ ئێمە کە دوای هەستانەوەی لە مردن لەگەڵیدا خواردمان و خواردمانەوە. ⁴² فەرمانی پێکردین مزگێنی بەخەڵک بدەین، و شایەتحاڵی ئەوە بدەین ئەو هەمان کەسە کە خودا وەک دادوەری زیندوو و مردوو دەستنیشانی کردووە. ⁴³ هەموو پێغەمبەران لەسەری شایەتی دەدەن کە هەرکەسێک باوەڕی پێی بێت لەڕێگەی ناوی ئەوەوە لێخۆشبوونی گوناهەکانی وەردەگرێت». ⁴⁴ لە کاتێکدا پەترۆ هێشتا ئەم قسانەی دەکرد، گیانی پیرۆز هاتە سەر هەموو ئەوانەی گوێیان لە پەیامەکە بوو. ⁴⁵ ئەو باوەڕدارە یەهودییانەی لەگەڵ پەترۆ هاتبوون، سەریان سوڕما کە بەخششی گیانی پیرۆز تەنانەت بەسەر نەتەوەکانیشدا ڕژاوە، ⁴⁶ چونکە گوێیان لێ بوو کە بە زمانەکان قسەیان دەکرد، و ستایشی خودایان دەکرد. پاشان پەترۆ گوتی: ⁴⁷ «ئایا کەسێک دەتوانێت ڕێگا لە ئاوهەڵکێشانیان بگرێت لە کاتێکدا ئەوانیش وەک ئێمە گیانی پیرۆزیان وەرگرتووە؟» ⁴⁸ بۆیە فەرمانی دا کە بە ناوی یەشوای مەسیح لە ئاو هەڵکێشرێن. پاشان داوایان لە پەترۆ کرد کە چەند ڕۆژێک لەگەڵیان بمێنێتەوە.