1 وَفِي الْيُومْ الأَوَّلْ مِْن الأَسْبُوعْ، جَاتْ بَكِّيرْ مَرْيَمْ الْمَجْدَلِيَّةْ لِلْجَبْرْ يَسُوعْ، الْعَتْمَةْ لَسَّةْ مَوْجُودَةْ، وِشَافَتْ الْحَجَرْ إتْرَفَعِتْ عَنْ بَابْ الْجَبْرْ. 2 فَجَرَتْ بِسُرْعَةْ وِجَاتْ لِلْسِّمْعَانْ بُطْرُسْ وِالْتِلْمِيذْ إِلْلِّي كَانْ يَسُوعْ بِحِبَّهْ وِجَالَتْ لِيهُمْ: "خَدُو الْرَّبْ مِنْ الْجَبْرْ، وِمِشْ عَارْفِينْ وَضَعُوهْ فِيْنْ!" 3 فَخَرَجْ بُطْرُسْ وِالْتِلْمِيذْ إِلْلِّي كَانْ يَسُوعْ يِحِبَّهْ وِرَاحُو لِلْجَبْرْ. 4 وِكَانُو بِيِجْرُو مَعْ بَعَضْ. وَلَكِنْ الْتِّلْمِيذْ الْتَانِي سَبَجْ بُطْرُسْ فَوَصَلْ الْجَبْرْ جَبْلَهْ، 5 وِانْحَنَى فَشَافْ الأَكْفَانْ مَوْجُودْ عَلَى الأَرْضْ، وَلَكِنَّهْ مَا دَخَلْ. 6 وِبَعْدَاً وَصَلْ سِمْعَانْ بُطْرُسْ وِرَآهْ لِلْجَبْرْ وِدَخَلَهْ، وِشَافْ كَمَانْ الأَكْفَانْ مَوْجُودْ عَلَى الأَرْضْ. 7 وِالْمَنْدِيلْ إِلْلِّي كَانْ عَلَى رَاسْ يَسُوعْ لَجَاهْ مَلْفُوفْ وَحْدَهْ فِي مَكَانْ مِنْفِصِلْ عَنْ الأَكْفانْ. 8 وِعِنْدْ إِكْدِهْ دَخَلْ الْتِّلْمِيذْ الْتَانِي، إِلْلِّي كَانْ وَصَلْ لِلْجَبْرْ فِي الأَوَّلْ، وِشَافْ فَآمَنْ. 9 عَلَشَانْ الْتَّلامِيذْ مَا فِهْمُو لِحَدْ الوكْتْ دِهْ أنَّ الكِتَاب إِتْنَبَّأْ إِنَّهْ لَازِمْ يِجُومْ مِنْ بَيْنْ الأَمْوَاتْ. 10 بَعْدَاً رِجِعْ الْتِّلْمِيذِيْنْ لِبِيْتْهُمْ. 11 وَلَكِنْ مَرْيَمْ فَضَلِّتْ وَاجْفَةْ فِي الْخَارِجْ تِبْكِي عِنْدْ الْجَبْرْ. وِأَثْنَاءْ مَا هِيَّ إِبْتِبْكِي، إِنْحَنَتْ لِلْجَبْرْ. 12 وِشَافَتْ مَلاكِيْنْ بِتِيَابْ بِيضْ، جَاعْدِينْ حِيثْ كَانْ جِثْمانْ يَسُوعْ مَوْضُوعْ، وَاحِدْ عِنْدْ الْرَاسْ وِالآخَرْ عِنْدْ الْجَدَمِيْنْ. 13 فَسَأَلاهَا: "يَا إِمْرَأَهْ، لِيهْ إبْتِبْكِي؟" "جَاوْبَتْ وِجَالَتْ: "أَخَدُو سِيدِي، وِمِشْ عَارْفَةْ وِيْنْ وَضَعُوهْ". 14 جَالَتْ دَايْتِي وِبَصِّتْ لِوَرَا، فَشَافِتْ يَسُوعْ وَاجِفْ، وَلَكِنَّهْ مَا عَرْفِتْ أَنَّهْ يَسُوعْ. 15 فَسَأَلَهَا: "يَا إِمْرَأَةْ، لِيْهْ إِبْتِبْكِي؟ بِتْدَوَّرِي عَلَى مِينْ؟" وِخَمَّنِتْ أَنَّهْ الْبُسْتَانِي، فَجَالَتْ لَهْ: "يَا سِِيدِي، إِنْ كُنْتْ أَنْتْ اخَدْتَهْ فَجُلْ لِي وِيْنْ وَضَعْتَهْ عَلَشَانْ آخْدَهْ". 16 وِنَادَاهَا يَسُوعْ: "يَا مَرْيَمْ!" فَالْتَفَتَتْ وِهَتَفَتْ بِالْعِبْرِيَّةْ: "رَبُّونِي"، أَيْ: يَا مُعَلِّمْ. 17 فَجَالْ لَهَا: "مَا تِمْسِكِي بِي! عَلَشَانْ آنِي مَا صَعَدْتْ بَعَدْ لِلْآبْ، لَكِنْ رُوحِي لإِخْوَتِي وَجُولِيلْهُمْ: إِنِّي هَأصْعَدْ لِأَبُويْ وِأَبُوكُمْ، وِإلَهِي وِإِلَهْكُمْ!" 18 فَرِجْعَتْ مَرْيَمْ الْمَجْدَلِيَّةْ وِبَشَّرَتْ الْتَّلامِيذْ وِجَالَتْ: "آنِي شُفْتْ الْرَّبْ!" وِأَخْبَرَتْهُمْ بِكُلْ مَا جَالْ لَهْ. 19 وِلَمَّا حَلْ الْمَسَا الْيُومْ دَايْتِي، وَهُوَّ الْيُومْ الأَوَّلْ مِنْ الأَسْبُوعْ، كَانْ الْتَّلامِيذْ مِجْتِمْعِينْ فِي بِيْتْ وِجَفَّلُو أَبْوابُهْ لأَنَّهُمْ كَانُو خَايْفِينْ مِنْ الْيَهُودْ، وِيَسُوعْ ظَهَرْ وِسْطِيهُمْ وِجَالْ: "سَلامْ لِيْكُمْ!" 20 وِلَمَّا جَالْ الْكَلامْ دَايْتِي، وَرَّاهُمْ يِدِيْهْ وِجَنْبَهْ، وِفِرِحْ الْتَّلامِيذْ لأَنَّهُمْ شَافُو الْرَّبْ. 21 وِجَالْ لَهُمْ يَسُوعْ: "سَلامْ لِيكُمْ. كَمَا أَنَّ الآبْ أَرْسَلْنِي، آنِي كَمَانْ أَرْسِلْكُمْ". 22 جَالْ دَايْتِي وِنَفَخْ فِيهُمْ وِجَالْ لِيهُمْ: "إِجْبَلُو الْرُوحْ الْجُدُسْ. 23 مَنْ غَفَرْتُمْ خَطَايَاهُمْ غُفِرَتْ لِيهُمْ، وِمَنْ أَمْسَكْتُمْ خَطايَاهُمْ، أَمْسِكَتْ عَلِيْهُمْ!" 24 وَلَكِنْ تومَا، وَاحِدْ مِنْ الْتَّلامِيذْ الأَتْنَعْشَرْ، وَهُوَّ مَعْرُوفْ بِالْتَّوْأَمْ، مَا كَانْ مع الْتَّلامِيذْ، لمَّا حَضَرْ يَسُوعْ. 25 فَجَالْ لَهْ الْتَّلامِيذْ : "إِحْنَا شُفْنَا الْرَّبْ!" فَجَوابْهُمْ تُومَا وِجَالْ: "إِنْ كُنْتْ مَا بَشُوفْ أَثَرْ الْمَسَامِيرْ فِي يَدِيْهْ، وِأَحُطْ إِصْبَعِي فِي مَكَانْ الْمَسَامِيرْ، وِأَحُطْ يدِّي فِي جَنْبَهْ، مَا بِآمِنْ". 26 وِبَعَدْ تَمَانْيَةْ أَيَّامْ، وِكَانْ الْتَّلامِيذْ مِجْتِمْعِينْ تَانِي جُوَّا الْبِيْتْ وِتُومَا مَعَاهُمْ، حَضَرْ يَسُوعْ وِالأَبْوابْ مِغَلَّجَةْ، وِوَجَفْ فِي الْوَسَطْ وِجَالْ: "سَلامْ لِيكُمْ!" 27 وِبَعْدَاً جَالْ لِتُومَا: "هَاتْ إِصْبَعَكْ لِهْنِهْ، وِشُوفْ يَدَي، وِهَاتْ يَدَّكْ وِحُطَّهَا فِي جَنْبِي. وِمَا إِتْكُونْ غَيْرْ مِآمِنْ لكِنْ كُونْ مِآمِنْ!" 28 وِهَتَفْ تُومَا: "رَبِّي وَإِلَهِي". 29 فَجَالْ لَهْ يَسُوعْ: "عَلَشَانْ أَنْتَ شُفْتِينِي آمَنْتْ؟ يا بَخْتْ كُلْ إِلْلِّي يِآمْنُو مِنْ غِيْرْ مَا يِشُوفْنِي!". 30 وِعَمَلْ يَسُوعْ جِدَّامْ تِلامِيذَهْ آيَاتْ كَتِيرَةْ مَا إِتْكَتَبَتْ فِي الْكِتَابْ. 31 وَلَكِنْ الآيَاتْ دَايْتِي إِتْكَتَبَتْ عَلَشَانْ إِتْآمْنُو بِأَنَّ يَسُوعْ هُوَّ الْمَسِيحْ إِبْنْ اللهْ، وِعَلَشَانْ إِتْكُونْ لِيكُمْ حَيَاةْ بِإِسْمِهْ لَمَّا إِتْآمْنُو.