1 وَفِي الْوَكْتْ دَايْتِي أَمَرْ بِيلاطُسْ عَلَشَانْ يَاخْدُو يَسُوعْ وِيِجْلِدُوهْ. 2 وِجَدَلْ الْجِنُودْ تَاجْ مِنْ الْشُّوكْ وَضَعُوهْ عَلَى رَاسِهْ، وِلَبَّسُوهْ جَلَبِيِّةْ أُرْجُوَانْ. 3 وِجَعَدُو يِتْجَدَّمُو لِيهْ وِيِجُولُو: "سَلامْ يَا مَلِكْ الْيَهُودْ!" وِيِلْطِمُوهْ. 4 وِخَرَجْ بِيلاطُوسْ مَرَّةْ كَمَانْ لِلْجِمْهُورْ وِجَالْ لِيهُمْ: "آنِي هَاطَلْعُو لِيكُمْ عَلشَانْ إتْشُوفُو آنِي مَا إِلْجِيتْ فِيهْ ذَنْبْ!" 5 وِخَرَجْ يَسُوعْ وِعَلِيهْ إكْلِيلْ الْشُّوكْ وِجِلَبِيِّةْ الأُرْجْوَانْ. فَجَالْ لِيهُمْ بِيلاطُوسْ: "الإِنْسَانْ دَايْتِي جُدَّامْكُمْ!" 6 فَلَمَّا شَافَهْ رُؤَسَاءْ الْكَهَنَةْ وِالْحَرَسْ صَرَخُو بِصُوتْ عَالِي: "إِصْلِبُوهْ! إِصْلِبُوهْ!" فَجَالْ لَهُمْ بِيلاطُوسْ: "خُدُو أَنْتُمْ وِإِصْلِبُوهْ، فَآنِي مَا لَجِيتْ فَيهْ ذَنْبْ!" 7 فَجَاوْبَهْ الْيَهُودْ: "لِينَا شَرِيعَةْ. وِبِحَسَبْ شَرِيعِتْنَا يِتْحَتَّمْ عَلِيْهْ الْمُوْتْ، عَلَشَانْ جَعَلْ نَفْسُهْ إِبنْ اللهْ". 8 وِلَمَّا سِمِعْ بِيلاطُسْ الْكَلامْ دَايْتِي، خَافْ جَوِيْ، 9 وِدَخَلْ لِجَصْرَهْ وِسَأَلْ يَسُوعْ: "مِنْ آيْنْ أَنْتَ؟" وِمَا جَوْبَهْ يَسُوعْ بِشَيْ. 10 وَجَالْ لَهْ بِيلاطُسْ: "أَنْتَ مَا بِتْكَلِّمْنِي لَيْهْ؟ أنْتَ مِشْ عَارِفْ آنِي عَنْدِي سُلْطَانْ أَطَلَّعَكْ، وِسُلْطَانْ أَصْلِبَكْ؟" 11 فجَاوبَهْ يَسُوعْ "مَا لِيكْ عَلِيِّ سُلْطَانْ أبَداً، لَوْ مَا اخَدْتْ الْسُلْطَانْ دَايْتِي مِنْ فُوجْ. عَلَشَانْ إِكْدِهْ إِللِّي سَلَّمْنِي لِيْكْ لِيْهْ خَطِيَّةْ أَعْظَمْ". 12 عَلَشَانْ دَايْتِي سَعَى بِيلاطُسْ أَنْ يُطْلِقَهْ، وَلَكِنْ الْيَهُودْ صَرَخُو: "إِنْ طَلَّعْتْ دَايْتِي،أنْتَ مَا بِتْحِبْ الْجَيْصَرْ. فَأَنْ كُِلْ مَنْ يِجْعَلْ نَفْسُهْ مَلِكْ، أَعَادْ الْجَيْصَرْ". 13 وِلمَّا سِمِعْ بِيلاطُسْ الْكَلامْ دَايْتِي، أَمَرْ بإِخْرَاجْ يَسُوعْ، وِجَلَسْ عَلَى كُرْسِي الْقَضَا فِي مَكَانْ إِسْمَهْ "الْبَلاطْ"، وِبِالْعِبْرِيِّةْ: "جَبَّاثَا". 14 وِكَانْ الْوَكْتْ حَوَالِي الْسَّاعَةْ سِتَّةْ فِي يُومْ الإِعْدَادْ لِلْفِصْحْ. وِجَالْ بِيلاطُسْ لِلْيَهُودْ: "مَلِكْكُمْ جِدَّامْكُمْ!" 15 فَصَرَخُو: "خُدْوهُ!خُدْوهُ! إِصْلِبْهُ!" فَسَأَلْهُمْ بِيلاطُسْ: "عَاوْزِينِّي أَصْلُبْ الْمَلِكْ بِتَاعْكُمْ؟" فَجَاوْبَهْ رُؤسَاءْ الْكَهَنَةْ وِجَالُو: "مَا لِينَا مَلِكْ إِلَّا الْجَيْصَرْ". 16 فَسَلَّمَهُ بِيلاطُسْ لِيهِمْ عَلَشَانْ يِنْصِلِبْ. 17 فَخَرَجْ وَهُوَّ حَامِلْ صَلِيبَهْ الْمَكَانْ الْمَعْرُوفْ بِمَكَانْ الْجُمْجُمَةْ، وِبِالْعِبْريِّةْ: "جُلْجُثَةْ"، 18 وِهُنُكَّ صَلَبُوهْ وِصَلَبُو مَعَاهْ إِتْنَانْ رِجِّالَةْ، وَاحِدْ مِنْ كِلْ جَانِبْ، وِيَسُوعْ فِي الْوَسَطْ. 19 وِعَلَّجْ بِيلاطُسْ لافْتَةْ عَلَى الْصَّلِيبْ مَكْتُوبْ عَلِيهَا: "يَسُوعْ الْنَّاصِرِي مَلِكْ الْيَهُودْ". 20 فَجَرَا الْيَافْتَةْ دَايْتِي إِكْتَارْ مِنْ الْيَهُودْ، عَلَشَانْ الْمَكَانْ إِللِّي صُلِبْ فِيهْ يَسُوعْ كَانْ جِرَيِّبْ مِنْ الْمَدِينَةْ. وِكَانَتْ الْيَافْتَةْ مَكْتُوبَةْ بِالعِبْرِيَّةْ وِالْلَّاتِينِيَّةْ وِالْيُونَانِيَّةْ. 21 وَجَالْ رُؤَسَاءْ كَهَنَةْ الْيَهُودْ لِبِيلاطُسْ: "مَا تِكْتُبْ "مَلِكْ الْيَهُودْ"، عَلَشَانْ الإِنْسَانْ دَايْتِي جَالْ عَنْ نَفْسُهْ: "آنِي مَلِكْ الْيَهُودْ!" 22 فَرَدْ بِيلاطُسْ وِجَالْ: "إِللِّي كَتَبْتَهْ كَتَبْتَهْ". 23 وِلَمَّا صَلَبْ الْجِنُودْ يَسُوعْ أَخَدُو ثِيابَهْ وِجَسَّمُوهَا إِلَى أَرْبَعَةْ أَجْسَامْ، فَأَخَدْ كُلْ عَسْكَرِي جِسْمْ. وِأَخَدُو الْجَمِيصْ كَمَانْ، وِكَانْ مَنْسُوجْ كِلَّهْ مِنْ جِطْعَةْ وَاحْدَةْ، بِغِيْرْ خِيَاطَةْ. 24 وَجَالْ الْجِنُودْ بَعْضِيْهِمْ لِبَعَضْ: "مَا نِجَطَّعُهْ، لَكِنْ نَعْمِلْ عَلِيْهْ جُرْعَةْ وِنْشُوفْ مِينْ يِكْسَبَهْ!" وِكُلْ دَايْتِي حَصَلْ عَلَشَانْ يِتِمْ كِلْ إِللِّي إِجَى فِي الْكِتَابْ: "جَسَّمُو ثِيَابِي بَيْنَتْهُمْ، وِعَلَى جَمِيصِي عَمَلُو جُرْعَةْ". وِكُلْ دَايْتِي عَمَلَهْ الْعَسَاكِرْ. 25 وِهُنُكَّ، عِنْدْ صَلِيبْ يَسُوعْ، وَجَفَتْ مَرْيَمْ أُمَّهْ، وِأُخَتْ أُمَّهْ مَرْيَمْ زَوْجِةْ كِلُوبَا، وِمَرْيَمْ الْمَجْدَلِيِّةْ. 26 وِلَمَّا شَافْ يَسُوعْ أُمَّهْ، وِالْتِلْمِيذْ إِللِّي كَانْ يِحِبَّهْ وَاجِفْ بِالجُرْبْ مِنْهَا، جَالْ لِأُمَّهْ: "يَا إِمْرَأَةْ، دَايْتِي إِبْنِكْ!" 27 وِبَعْدَاً جَالْ لِلْتِلْمِيذْ: "دَايْتِي أُمَّكْ". وِمِنْ وَكْتْ دَايْتِي خَدْهَا الْتِلْمِيذْ لِبِيْتَهْ. 28 بَعْدْ إِكْدِهْ شَافْ يَسُوعْ أَنَّ كِلْ شَيْ إِكْتَمَلْ، فَجَالْ: "آنِي عَطْشَانْ"، عَلَشَانْ يِتِمْ مَا إِجَى فِي الْكِتَابْ. 29 وِكَانْ هُنُكَّ مَعُونْ مَلْيَانْ بِالْخَلْ، فَغَمَسُو فِي الْخَلْ إِسْفِنْجَةْ وِضَعُوهَا عَلَى زُوفَا، وِعَلُّوهَا لِخَشْمُهْ. 30 وِلَمَّا دَاجْ يَسُوعْ الْخَالْ، جَالْ: "قَدْ أُكْمِلْ!" وِبَعْدْ إِكْدِهْ نَكَّسْ رَاسَهْ وِأَسْلَمْ الْرُّوحْ. 31 وِلَمَّا كَانْ الإِعْدَادْ يِتِمْ فِي الْيُومْ دَايْتِي، طَلَبْ الْيَهُودْ مِنْ بِيلاطُسْ أَنْ تِتْكِسِرْ رِجْلِيْنْ الْمَصْلُوبِينْ، وِتِتَّاخَدْ جِثَثْهُمْ عَلَشَانْ مَا تِبْجَى مِعَلَّجْ عَلَى الْصَّلِيبْ يُومْ الْسَّبْتْ، عَلَشَانْ الْسَّبْتْ دَايْتِي كَانْ يُومْ عَظِيمْ. 32 فَجَاءْ الْجُنُودْ وِكَسَرُو رِجْلِيْنْ الْرَّاجْلِيْنْ الْمَصْلُوبِينْ مَعْ يَسُوعْ. 33 لَكِنْ يَسُوعْ، لَمَّا وَصَلُو لِيهْ لِجْيُوهْ مَاتْ، عَلَشَانْ إِكْدِهْ مَا كَسَرُو رِجْلِيْهْ. 34 لَكِنْ طَعَنَهْ وَاحِدْ مِنْ الْجُنُودْ بِحَرْبَةْ فِي جَنْبَهْ، فَخَرَجْ فِي الْحَالْ دَمْ وِمَايْ. 35 وِاللِّي شَافْ دَايْتِي هُوَّ يِشْهَدْ، وِشِهَادْتَهْ حَجْ وَهُوَ يَعْرِفْ كُلِّيَاً أَنَّ هُوَّ يِجُولْ الْحَجْ، عَلَشَانْ يِتْآمْنُو إِنْتُو كَمَانْ. 36 وِكُلْ دَايْتِي حَدَثْ عَلَشَانْ يِتِمْ إِللِّي إِجَى فِي الْكِتَابْ: "مَا يِتْكِسِرْ مِنْهُ عَضْمْ!" 37 وِإِجَى كَمَانْ فِي مَوْضِعْ تَانِي فِي الْكِتَابْ: "هَيِشُوفُو كِلْ دَايْتِي إِللِّي طَعَنُوهْ". 38 وِبَعْدْ إِكْدِهْ طَلَبْ يُوسِفْ إِللِّي مِنْ الْرَّامَةْ لِبِيلاطُسْ أَنْ يِسْتَأَذَنُهْ أَنْ يَاخُدْ جِثْمَانْ يَسُوعْ، وِكَانْ يُوسِفْ دَايْتِي تِلْمِيذْ لِِيَسُوعْ وَلَكِنْ فِي الْسِّرْ، عَلَشَانْ كَانْ خَائِفْ مِنْ الْيَهُودْ، فَأَذَنْ لِيْهْ بِيلاطُسْ. وِإِجَى يُوسِفْ وِأِخَدْ جِثْمَانْ يَسُوعْ. 39 وَإِجَى كَمَانْ نِيجُودِيمُوسْ إِللِّي كاَنْ إِجَى مِنْ جَبْلْ لِيَسُوعْ فِي الْعَتْمَةْ، وِجَابْ مَعَهْ حَوَالِي تَلاتِينْ لِيتِرْ مِنْ طِيبْ الْمُرْ الْمَخْلُوطْ بِالْعُودْ. 40 وِأَخَدْ جُثمانْ يَسُوعْ وِلَفَّهْ بِاكْفَانْ مَعْ الْطِّيبْ، عَلَشَانْ كَانِتْ عَادَةْ الْيَهُودْ إِكْدِهْ فِي الْدَّفْنْ. 41 وِكَانْ فِي الْمَكَانْ إِللِّي صُلِبْ فِيهْ يَسُوعْ بُسْتَانْ، وَفِي الْبُسْتَانْ جَبْرْ جَدِيدْ، مَا سَبَجْ أَنْ حَدَاً دَفَنْ فِيْهْ. 42 فَدَفَنُو يَسُوعْ فِي الْجَبْرْ دَايْتِي لأَنَّهْ كَانْ جِرَيِّبْ، وِلأَنْ يُومْ دَايْتِي كَانْ يُومْ الإِعْدَادْ الفِصْحْ عِنْدْ الْيَهُودْ.