1 بَعَدمَا انْتَهَى يَسُوعْ صَلاتِهْ دَايْتِي، خَرَجْ مَعْ تَلامِيذَهْ وِعَبَرُو وَادِي جَدْرُونْ. وِكَانْ إِهْنُكَّ بُسْتَانْ، فَدَخَلَهْ هُوَّ وِتَلامِِيذَهْ. 2 وِكانْ يَهُوذَا إِللِّي خَانَهْ يَعْرِفْ الْمَكَانْ دَايْتِي عَلَشَانْ يَسُوعْ كَانْ بِيِجْتِمِعْ فِيهْ كَتِيرْ مَعْ تَلامِيذَهْ. 3 وِرَاحْ يَهُوذَا لِهْنُكَّ وِخَدْ مَعَاهْ فِرْجِةْ الْجُنُودْ وِحَرَسْ الْهِيْكَلْ، إِللِّي بَعَتْهُمْ رُؤسَاءْ الْكَهَنَةْ وِالْفَرِّيْسِيُّونْ، وِهُمَّ شَايْلِينْ الْمَشَاعِلْ وِالْمَصَابِيحْ وِالْسِّلاحْ. 4 وِكَانْ يَسُوعْ يَعْرِفْ كِلْ دَايْتِي هَيِحْصَلْ لِيهْ، فَتْجَدَّمْ نَحْوَهُمْ وِجَالْ: "عَايْزينْ مِينْ؟" 5 جَاوَبُوهْ: "يَسُوعْ الْنَّاصِرِي". فَجَالْ لَهُمْ: "آنِي هُوَّ". وِكانْ يَهُوذَا إِللِّي خَانَهْ وَاجِفْ مَعَاهُمْ. 6 وِلَمَّا جَالْ لَهُمْ: "آنِي هُوَّ"، رِجْعُو وِسَجَطُو عَلَى الأَرْضْ! 7 فَعَادْ يَسُوعْ يِسْأَلْهُمْ: "عَاوْزِينْ مِينْ؟" جَاوَبُوهْ: "يَسُوعْ الْنَّاصِرِي". 8 فَجَالْ لَهُمْ يَسُوعْ: "جُلْتِلْكُمْ: آنِي هُوَّ، لَوْ كُنْتُمْ عَاوْزِينِّي آنِي، خَلُّو دُولْ يِرُوحُو". 9 وِكُلْ دَايْتِي عَلَشَانْ يِتِمْ الْكِلْمَةْ إِللِّي جَالْهَا: "إِللِّي أَنْتَ وَهَبْتَهُمْ لِي مَا هِلِكْ مِنْهُمْ حَدَاً!" 10 وِكَانْ مَعْ سِمْعَانْ بُطْرُسْ سِيْفْ فَاطَلَّعْ وِضَرَبْ بِيهْ عَبْدْ رَئِيسْ الْكَهَنَةْ، فَجَطَعْ وِدْنَهَ الْيَمِينْ. وِكَانْ إِسْمْ الْعَبْدْ مَلْخُسْ. 11 فَجَالْ يَسُوعْ لِبُطْرُسْ: "رَجِّعْ الْسِّيْفْ لِمَكَانَهْ! الْكَاسْ إِللِّي أَعْطانِي الآبْ، مَاشْرَبْهَاشْ؟" 12 وِجَبَضَتْ الْفِرْجَةْ وِالْجَائِدْ وِحَرَسْ الْهِيْكَلْ عَلَى يَسُوعْ وِجَيَّدُوهْ. 13 وِسَاجُوهْ فِي الأَوَّلْ إِلَى حَنَّانْ وِهُوَّ حَمَى جِيَافَا رَئِيسْ الْكَهَنَةْ فِي الْسَّنَةْ دَايْتِي. 14 وِجِيَافَا هُوَّ إِللِّي أَشَارْعَلَى الْيَهُودْ إِنَّهْ مِنْ الأفْضَلْ أَنْ يَِمُوتْ رَجِلْ وَاحِدْ ويِفْدِي الأُمَّةْ كِلَّتْهَا. 15 وِتَبَعْ يَسُوعْ سِمْعَانْ بُطْرُسْ وِتِلْمِيذْ تَانِي كَانْ رَئِيسْ الْكَهَنَةْ يَعْرِفُهْ. وِدَخَلْ تِلْمِيذْ دَايْتِي مَعْ يَسُوعْ إلَى دَارْ رَئِيسْ الْكَهَنَةْ. 16 وَلَكِنْ بُطْرُسْ فَوَجَفْ بِالْبَابْ بَرَّةْ. فَجَرَجْ الْتِّلْمِيذْ الْتَّانِي إِللِّي كَانْ رَئِيسْ الْكَهَنَةْ يَعْرِفُهْ.، وِكَلَّمْ الْبَوَّابَةْ وِدَخَّلْ بُطْرُسْ. 17 وِسَأَلَتْ الْخَادْمَةْ الْبَوَّابَةْ بُطْرُسْ: "أَنْتَ مِشْ وَاحِدْ مِنْ تَلامِيذْ الْرَّاجِلْ دَايْتِي؟" جَاوَابْهَا: "لَاهْ، آنِي مِشْ مِنْهُمْ!" 18 وِكَانْ الْطَّجْسْ بَارِدْ، وِكَانْ أَوْجَدْ الْعَبِيدْ وِالْحُرَّاسْ نَارْ وِوَجَفُو يِتْدَفُّو حَوَلِيهَا، فَوَجَفْ بُطْرُسْ يِتْدَفَّى مَعَاهُمْ. 19 وِسَأَلْ رَئِيسْ الْكَهَنَةْ يَسُوعْ عَنْ تَلامِيذَهْ، وِعَنْ تَعْلِيمَهْ. 20 فَجَاوْبَهْ يَسُوعْ: "آنِي كُنْتْ فِي الْعَلَنْ إِتْكَلَّمْتْ لِلْعَالَمْ، وِدَايْمَاً عَلَّمْتْ فِي الْمَجْمَعْ وِالْهِيْكَلْ حِيْثْ يِجْتِمِعْ الْيَهُودْ كِلِّهِمْ، وِآنِي مَا جُلْتْ شَيْ فِي الْسِّرْ. 21 لِيهْ إِبْتِسْأَلْنِي آنِي؟ إِسْألْ إِللِّي سِمْعُو مَا إِتْكَلَّمْتْ بِيهْ، هُمَّ يَعْرِفُو مَا جُلْتَهْ". 22 وِلَمَّا جَالْ يَسُوعْ الْكَلامْ دَايْتِي لَطَمُهْ وَاحِدْ مِنْ الْحُرَّاسْ وِجَالْ لَهْ: "إِكْدِهْ إتْجَاوِبْ رَئِيسْ الْكَهَنَةْ؟" 23 جَاوْبَهْ يَسُوعْ: "إِنْ كُنْتْ آنِي جُلْتْ كَلامْ بَطَّالْ فَأَشْهَدْ عَلَى الإِسَاءَةْ، وَلَكِنْ إِنْ كُنْتْ جُلْتْ كَلامْ صَحْ، لِيهْ تِضْرِبْنِي؟" 24 بَعْداً بَعَتَهُ حَنَّانْ مُجَيَّدْ لِجِيَافَا رَئِيسْ الْكَهَنَةْ. 25 وِكَانْ بُطْرُسْ وَاجِفْ إِهْنُكَّ يِتْدَفَّى، وِسَأَلُوهْ: "مِشْ أَنْتَ كَمَانْ تَلامِيذْ الْرَّاجِلْ دَايْتِي؟" فَأَنْجَرْ وِجَالْ: " مِشْ آنِي". 26 فَجَالْ وَاحِدْ مِنْ عَبِيدْ رَئِيسْ الْكَهَنَةْ، وَهُوَّ نَسِيبْ الْعَبْدْ إِللِّي جَطَعْ بُطْرُسْ وِدْنَهْ: "آنِي شُفْتَكْ مَعَاهْ فِي الْبُسْتَانْ؟" 27 فَأَنْكَرْ بُطْرُسْ مَرَّةْ تَانْيَةْ. وَفِي الْحَالْ صَيَّاحْ الْدِّيكْ! 28 وِبَعْداً خَدُو يَسُوعْ مِنْ دَارْ جِيَافَا إلَى جَصْرْ الْحَاكِمْ الْرُّومَانِي، وِكَانْ دَايْتِي فِي الْصُّبْحِيِّةْ بَدْرِي جَوِي. وِالْيَهُودْ مَا دَخَلُو لِلْجَصْرْ عَلَشَانْ مَا يِتْنَجَّسُو وِلا يِتْمَكَّنُو مِنْ أَكْلْ خَرُوفْ الْفِصْحْ. 29 وَخَرَجْ بِيلاطُسْ إِلِيْهِمْ وِسَأَلْهُمْ: "آيْهْ الْتُّهَمْ إِللِّي تَتَّهِمُو الْرَّاجِلْ دَايْتِي بِيهَا؟" 30 أَجَابُوهْ: "لَوْ كَانْ مِشْ مُذْنِبْ، مَا كِنَّا سَلَّمْنَاهْ إِلِيْكْ!" 31 فَجَالْ بِيلاطُسْ:"خُدُوهْ أَنْتُمْ وِحَاكْمُوهْ حَسَبْ شَرِيعِتْكُمْ". فَجَاوْبُوهْ: "مَا يَحِجْ لِينَا نِجْتِلْ حَدَاً!" 32 وِدَايْتِي حَصَلْ عَلَشَانْ تِتِمْ الْكِلْمَةْ إِللِّي جَالْهَا يَسُوعْ إِشَارَةْ لِلْمُوتَهْ إِلْلِّي هَيِمُوتْهَا يَسُوعْ. 33 وَدَخَلْ بِيلاطُسْ جَصْرُهْ وِاسْتَدْعَى يَسُوعْ وِسَأَلَهْ: "أَنْتَ مَلِكْ الْيَهُودْ؟" 34 فَرَدْ يَسُوعْ: "إِتْجُولْ دَايْتِي مِنْ عَنْدَكْ، وِإلَّا جَالْ لِيكْ الْكَلامْ دَايْتِي نَاسْ تَانْيِينْ؟" 35 فَجَالْ لَهْ بِيلاطُسْ: "وِهَلْ آنِي يَهُودِي؟ بَلَدَكْ وِرُؤَسَاءْ الْكَهَنَةْ سَلَّمُوكْ لِيَّ. انْتَ آيْهْ عَمَلْتْ؟" 36 أَجَابْ يَسُوعْ: "مَمْلَكْتِي مِشْ مِنْ الْعَالَمْ دَايْتِي. وِلَوْ كَانِتْ مَمْلَكْتِي مِنْ الْعَالَمْ دَايْتِي، لِكَانْ حُرَّاسِي يِجَاهْدُوعَلَشَانْ مَا أُسَلَّمْ لِلْيَهُودْ. ولَكِنْ الآنْ مَمْلَكْتِي مِشْ مِنْ إِهْنِهْ". 37 فسَأَلَهْ بِيلاطُسْ: "أَنْتَ مَلِكْ إِذَنْ؟" أَجَابَهْ: "أَنْتَ جُلْتْ، إِنِّي مَلِكْ. وِعَلَشَانْ إِكْدِهْ وِلِدْتْ وِجِيتْ لِلْعَالمْ: عَلَشَانْ أَشْهَدْ لِلْحَجْ، وِكُلْ مَنْ هُوَّ مِنْ الْحَجْ يُصْغِي لِصَوْتِي". 38 وَجَالْ لَهْ بِيلاطُسْ: "آيْهْ هُوَّ الْحَجْ!" وِبَعْدَاً خَرَجْ لِلْيَهُودْ وِجَالْ: "آنِي مِشْ شَايِفْ أَنَّ الْرَّاجِلْ دَايْتِي مُذْنِبْ! 39 وِكَمَانْ جَرَتْ الْعَادَةْ عَنْدِكُمْ أطْلِجْ لِيكُمْ وَاحِدْ مِنْ الْمَسَاجِينْ فِي عِيدْ الْفُصْحْ. عَاوْزِينْ أَطْلِجْ لِيكُم مَلِكْ الْيَهُودْ؟" 40 فَصَرَخُو كُلَّاتْهُم فَجَالُو: "مَا تِطْلِجْ لِينَا دَايْتِي، لَكِنْ بَارَابَاسْ". وِكَانْ بَارَابَاسْ لِصْ!"