1 بَعْدْ إِكْدِهْ أَظْهَرْ يَسُوعْ نَفْسَهْ لِلْتَّلامِيذْ مَرَّةْ كَمَانْ عِنْدْ شَاطِئْ بِبِحِيْرِةْ طَبَرِيِّةْ. وِظَهَرْ نَفْسُهْ إِكْدِهْ : 2 إِجْتَمَعْ سِمْعَانْ بُطْرُسْ وِتُومَا، الْمَعْرُوفْ بِالْتَّوْأَمْ، وِنَثَنَائيلْ، وَهُوَّ مِنْ جَانَا بِمَنْطِجِةْ الْجَلِيلْ، وَلْدْ زَبَدِي، وِتِلْمِيذَانْ كَمَانْ. 3 وِجَالْ لَهُمْ سِمْعَانْ بُطْرُسْ: "آنِي رَايِحْ لِلْصِيْدْ!" فَجَالُو: "وِإِحْنَا كَمَانْ إِنْرُوحْ مَعَاكْ". فَرَاحُو وِرِجْبُو الْجَارِبْ، وَلَكِنَّهُمْ مَا اصْطَادُو شَيْ فِي الْلَّيْلَةْ دَايْتِي. 4 وِلَمَّا طِلِعْ الْفَجْرْ، وَجَفْ يَسُوعْ عَلَى الْشَّطْ، وَلَكِنْ الْتَّلامِيذْ مَا عِرْفُو أَنَّهْ يَسُوعْ. 5 فَسَأَلَهُمْ يَسُوعْ: "يَا فِتْيَانْ، عَنْدِيكُمْ سَمَكْ؟" أَجَابُوهْ : "لَاه" 6 فَجَالْ لَهُمْ: "الْجُو الْشَبَكَةْ إِلَى يَمِينْ الْجَارِبْ، تِلاجُو!" فَرَامُوهَا، وِمَا جِدْرُو يِجْذِبُو الْشَّبَكَةْ عَلَشَانْ كَانْ فِيهَا سَمَكْ كَتِيرْ! 7 وِجَالْ الْتِّلْمِيذْ إِلْلِّي كَانْ يَسُوعْ يِحِبُّهْ، لِبُطْرُسْ: "هُوَّ الْرَّبْ!" وِكَانْ بُطْرُسْ عَرْيَانْ، فَلَمَّا سِمِعْ الْكَلامْ دَايْتِي أَنَّ هُوَّ الْرَّبْ، رَاحْ إِتْسَتَرْ بِثِيابَهْ، وِرَمَى نَفْسَهْ فِي الْمَايْ وِعَامْ. 8 وِجِهْ بَاجِي الْتَّلامِيذْ بِالجَارِبْ وِهُمَّ بِجِرُّ شَبَكَةْ الْسَّمَكْ، عَلَشَانْ هُمَّ مَا كَانُو بِعَادْ عَنْ الْشَّطْ حَوَالِي مِيتِيْنْ ذِرَاعْ. 9 وِلَمَّا نِزْلُو لِلْشَّطْ، شَافُو هُنُكَّ جَمْرْ نَارْ وِسَمَكْ مَوجُودْ عَلَى الْنَّارْ، وِخُبْزْ. 10 فَجَالْ لَهُمْ يَسُوعْ: "هَاتُو مِنْ الْسَّمَكْ إِللِّي إِصْطَدْتِمُوهْ دِلْوَكِيِتِي!" 11 وِطِلِعْ سِمْعَانْ بُطْرُسْ لِلْجَارِبْ وِجَذَبْ الْشَّبَكَةْ لِلْبَرّْ، عَلَشَانْ كَانْ فِيهَا مِيَّةْ وِتَلاتَةْ وِخَمْسِينْ سَمَكْ مِنْ الْنُّوعْ الْكَبِيرْ، وِمَعْ الْكَتْرَةْ دَايْتِي كِلَّاتْهَا مَا إِتجَطَّعِتْ الْشَّبَكَةْ. 12 وِجَالْ يَسُوعْ لِتَلامِيذَهْ: "تَعَالُو كُلُو". وِمَا حَدَاً جَاتْلَهْ الْجُرْأةْ مِنْ تَلامِيذَهْ إِنَّهُمْ يِسْأَلَهْ: مِينْ أَنْتَ؟ عَلَشَانْ هُمَّ عِرْفُو أَنَّهْ الْرَّبْ. 13 وِبَعْدْ إِكْدِهْ إِتْجَدَّمْ يَسُوعْ وِخَدْ مِنْ الْخُبْزْ وِنَاوَلْهُمْ، وِالْسَّمَكْ كَمَانْ. 14 وِدايْتِي الْمَرَّةْ الْتَّالْتَةْ إِلْلِّي أَظْهَرْ فِيهَا يَسُوعْ نَفْسَهْ لِتَلامِيذَهْ بَعْدْمَا جَامْ مِنْ الأَمْوَاتْ. 15 وِبَعَدْمَا أَكَلُو سَأَلْ يَسُوعْ سِمْعَانْ بُطْرُسْ: "يَا سِْمعَان بْنْ يُونَا، أَنْتَ بِتْحِبِّنِي أَكْتَرْمِنْ كُلْ دُولْ؟" فَأَجَابَهْ " نَعَمْ يَا رَبْ، أَنْتَ عَارِفْ أَنِّي بِحِبَّكْ!" فَجَالْ لَهْ: "أَطْعِمْ حِمْلانِي!" 16 وِبَعْدَاً سَأَلَهْ تَانِي: "يَا سِمْعَان بْنْ يُونَا، بِتْحِبِّينِي؟" فَأَجَابَهْ: "نَعَمْ يَا رَبْ. أَنْتَ إِبْتَعْرِفْ آنِّي إبْحِبَّكْ!"جَالْ لَهْ: "إِرْعَ خِرَافِي" 17 وِسَأَلَهْ مَرَّةْ تَالْتَةْ: "يَا سِمْعَانْ بْنْ يُونَا، بِتْحِبِّينِِي؟" وِزِعِلْ بُطْرُسْ عَلَشَانْ يَسُوعْ جَالْ لَهْ فِي الْمَرَّةْ الْتَّالْتَةْ: "بِتْحِبِّينِي". وِجَالْ لَهْ: "يا رَبْ، أَنْتَ تَعْرِفْ كِلْ شَيْ. أنْتَ تَعْرِفْ إنِّ آنِي بِحِبَّكْ!" فَجَالْ لَهْ يَسُوعْ: "إطْعِمْ خِرَافِي!" 18 الْحَجْ الْحَجْ أَجُولْ لَكْ: إِنَّكْ لَمَّا كُنْتْ شَبَابْ كُنْتْ تُرْبُطْ حِزَامَكْ عَلَى وَسْطَكْ وِتْرُوحْ كِِيفْ مَا إِتْرِيدْ. وَلَكِنْ لَمَّا إتْصِيرْ شِيْخْ ، إِتْمِدْ يِدِيْكْ، وَاحِدْ تَانِي يِرْبُطْ حِزَامَكْ وِيِجُودَكْ لِمَكَانْ أَنْتَ مَا بِتْريدَهْ!" 19 وِجَالْ يَسُوعْ دَايْتِي وِبِشَاوِرْعَلَى الْمِيْتَةْ إللِّي هَيِمُوتْهَا بُطْرُسْ فَيِمَجِّدْ بِيهَا اللهْ. وِلَمَّا جَالْ لَهْ الْكَلامْ دَايْتِي، جَالْ لَهْ: "إِتْبَعْنِي". 20 وِنَظَرْ بُطْرُسْ وَرَآهْ، فَشَافْ الْتِّلْمِيذْ إِللِّي كَانْ يَسُوعْ يِحِبَّهْ يِتْبَعْهُمْ، وَهُوَّ الْتِّلْمِيذْ إِللِّي مَالْ عَلَى صَدْرْ يَسُوعْ فِي أَثْنَاءْ الْعَشَا وِجَالْ لَهْ: "يَا سَيِّدْ، مِينْ هُوَّ إِللِّي هَيِخُوُنَكْ؟" 21 فَلَمَّا شَافَهْ بُطْرُسْ سَأَلْ يَسُوعْ: "يَا رَبْ وِدَايْتِي، آيْهْ إِللِّي يِكُونْ لِيهْ". 22 أَجَابَهْ يَسُوعْ: "لَوْ آنِي عَاوِزْ أَنْ أَبْجِي عَلَى حَيَاتِهْ لَحَدْ مَا أَرْجَعْ، أَنْتَ مَالَكْ؟ إتْبَعْنِي أَنْتَ!" 23 وِانْتَشَرْ خَبَرْ دَايْتِي بَيْنْ الإِخْوَةْ أَنَّ الْتِّلْمِيذْ دَايْتِي إِللِّي يَسُوعْ كَانْ يِحِبَّهْ مِشْ هَيِمُوتْ، لَكِنْ يَسُوعْ مَا جَالْ لِبُطْرُسْ: "إِنَّهْ مِشْ هَيِمُوتْ!" لَكِنْ جَالْ لَهْ: "لَوْ آنِي عَايِزْ إِنَّهْ يِبْجَى لَحَدْ مَا أَرْجَعْ، أَنْتَ مَالَكْ؟"ّ 24 الْتِّلْمِيذْ دَايْتِي إِللِّي شَهَدْ بِكِلْ الأَمُورْ دَايْتِي، وِكَتَبْهَا إِهْنِهْ. وِِإِحْنَا خَابْرِينْ أَنِّي شَهَدْتَهْ حَجْ. 25 وَهُنُكَّ أَمُورْ تَاني كَتِيرةْ عَمِلْهَا يَسُوعْ. لَوْ إتْكَتَبَتْ وَاحْدَةْ وَاحْدَةْ، ما بَاظُنْ إِنِّ الْعَالَمْ كِلَّاتُهْ يِسَاعْ الْكُتُبْ دَايْتِي.