1 وِجَبْلْ عِيدْ الْفِصْحْ، وِيَسُوعْ عَارِفْ أَنَّ سَاعْتَهْ جَرَّبَتْ عَلَشَانْ يِمْشِي مِنْ الْعَالَمْ دَايْتِي وِيِرُوحْ لِلآبْ، هُوَّ حَبْ خَاصَّتَهْ إِللِّي فِي الْعَالَمْ، أَحَبَّهُمْ أَشَدْ مَحَبَّةْ. 2 وَهُمَّا بِيِتْعَشُّو، وِكَانْ الْشِّيْطَانْ حَطْ فِي جَلْبْ يَهُوذَا بِنْ سِمْعَانْ الإِسْخَرْيُوطِي أَنَّهْ يِخُونْ يَسُوعْ، 3 وِكَانْ يَسُوعْ عَارِفْ أَنَّ الآبْ حَطْ كِلْ شَيْ فِي يَدِيْهْ وِأَنَّهْ مِنْ اللهْ خَرَجْ وَإلَى اللهْ هَيَعُودْ، 4 وِجَامْ يَسُوعْ عَنْ الْوَكْلْ فِي الْعَشَا، وِخَلَعْ رِدَاءَهْ وَأخَدْ بِشْجِيرْ وِلَفَّهْ حَوَلِيْنْ وَسْطَهْ، 5 وبَعْدَاً صَبْ مَايْ فِي وِعَاءْ لِلْغَسِيلْ، وِبَدَا يِغْسِلْ رِجْلِيْنْ الْتِّلامِيذْ وِيِمْسَحْهَا بِالْمِنْشِفَةْ إِللِّي عَلَى وَسَطَهْ. 6 وِلَمَّا وَصَلْ لِسِمْعَانْ بُطْرُسْ، جَالْ لَهْ سِمْعَانْ: "يَا سَيِّدْ، انْتَ تِغْسِلْ رِجْلِيَّ!" 7 فَأجَابَهْ يَسُوعْ وَجَالْ: "انْتَ دِلْوَكِتِي مَا إبْتِفْهَمْ إللِّي أنِي بَعْمِلَهْ، لَكِنْ هَتِفْهَمْ بَعْدْ إكْدِهْ فِي الْمَسْتَجْبَلْ". 8 لَكِنْ بُطْرُسْ أصَرْ وِجَالْ: "لا مُشْ مُمْكِنْ تِغْسِلْ رِجْلِيِّ أبَدَاً!" فأجَابَهْ يَسُوعْ وِجَالْ لَهْ: "إنْ كُنْتْ مَا بَغْسِلَكْ، مَا يِكُونْ لِيكْ نَصِيبْ مَعِي!" 9 فِي نَفْسْ الْوَكْتْ جَالْ لَهْ سِمْعَانْ بُطْرُسْ: "يَا سَيِّد، مِشْ رِجْلَيَّ بَسْ، لَكِنْ رِجْلَيِّ وِرَاسِي كَمَانْ!" 10 وِجَالْ يَسُوعْ: "إللِّي اغْتَسَلْ صَارْ كُلَّهْ نَجِي، وَلا يِحتَاجْ إلَّا غَسِيلْ رِجْلِيهْ. وَانْتُمْ أنْجِيَاءْ، وَلَكِنْ مِشْ كُلُّكُمْ". 11 لأنْ يَسُوعْ كَانْ يَعْلَمْ مِينْ إللِّي هَيِخُونَهْ، عَلَشَانْ إكْدِهْ جَالْ: "مِشْ كُلُّكُمْ أنْجِيَاءْ". 12 وَبَعَدْ مَا خَلَّصْ يَسُوعْ مِنْ غَسْلْ رِجْلِيْهُمْ، خَدْ رِدَاءَهْ وَعَادْ يِتِّكَأ مِنْ جَدِيدْ، وِسَألْهُمْ: "أَنْتُو فَاهْمِينْ إِللِّي عَمَلْتُهْ مَعَاكُمْ؟ 13 أَنْتُو بِتْجُولُولِي أَنَِّ آنِي الْمُعَلِّم وِالْسَّيِّدْ، 14 وِدَا كَلامْ مَظْبُوطْ، آنَي إِكْدِهْ. فَإنْ كُنْتْ آنِي الْسَّيِّدْ وِالْمُعَلِّمْ غَسَلْتْ رِجْلِيْكُمْ، فَعَلِيْكُمْ أَنْتُو كَمَانْ تِغْسِلُو رِجْلِينْ بَعْضِيكُمْ. 15 آنِي جَدَّمْتْ لِيكُمْ مِثَالْ عَلَشَانْ تَعْمِلُو كِيفْ مَا عَمَلْتْ آنِي لِيكُمْ. 16 الْحَجْ الحَجْ أجُولْ لُكُمْ: مَافِيشْ عَبْدْ أعْظَمْ مِنْ سِيدَهْ، وِلا رَسُولْ أعْظَمْ مِنْ إللِّي أَرْسَلَهْ. 17 لَوْ كُنْتُمْ قَدْ عَرِفْتُو كُلْ دَيْتِي، يَا بَاخْتِيكُمْ لَوْ عَمَلْتُمْ بِيهْ. 18 وِآنِي مَا بَجوُلْ كُلْ دَايْتِي عَنْ جَمِيعِكُمْ، لأَنِّي عَارِفْ إِللِّي اخْتَرْتِهِمْ، وَلَكِنْ لابُدْ يِتِمْ الْكِتَابْ إِللِّي يِجُولْ: الآكِلْ مِنْ خُبْزِي، رَفَعْ عَلَيَّ عَجَبُهْ! " 19 وِآنِي أَجُولْ لَكُمْ كُلْ دَايْتِي جَبْلْ ان يِتِمْ، عَلَشَانْ لَمَّا يِتِمْ إِتْآمْنُوإنِّي آنِي هُوَّ. 20 الْحَجْ الْحَجْ أَجُولْ لَكُمْ: إِللِّي بِيِجْبَلْ إِللِّي أَرْسَلَهْ، يِجْبَلْنِي؛ وِمِينْ يِجْبَلْنِي، يِجْبَلْ إِللِّي أَرْسَلْنِي". 21 وِلَمَّا جَالْ يَسُوعْ دَايْتِي اضْطَرَبَتْ نَفْسَهْ وِجَالْ لِيهُمْ: "الْحَجْ الْحَجْ أَجُولْ لَكُمْ: وَاحِدْ مِنْكُمْ هَيِسَلِّمْنِي!" 22 وِرَاحْ الْتَّلامِيذْ يِبُصُّ لِبَعْضِيهِمْ مِتْحَيِّرينْ وَهُمْ مِشْ عَارْفِينْ آيهْ إِللِّي بِيَعْنِيهْ يَسُوعْ. 23 وِكَانْ الْتَّلْمِيذْ إِللِّي يِحِبَّهْ يَسُوعْ مَسْنُودْ فِي حُضْنَهْ، 24 وِأََشَارْ لِيهْ سِمْعَانْ بُطْرُسْ أَنْ يَسْأَلْ يَسُوعْ آيهْ إِللِّي بِيِكْصِدَهْ. 25 فَمَالْ يُوحَنَّا عَلَى صَدْرْ يَسُوعْ وِسَأَلَهْ: "مِينْ هُوَّ يَا سَيِّدْ؟" 26 فَجَاوَبْ يَسُوعْ: "هُوَّ إِللِّي أَعْطِيهْ الْلُّجْمَةْ إِللِّي أَغْمِسْهَا". وِبَعْداً غَمَسْ الْلُّجْمَةْ وِأَعْطاهَا لِيَهُوذَا بْنْ سِمْعَانْ الإِِسْخَْريُوطِي. 27 وِبَعْدْ الْلُّجْمَةْ، دَخَلَهْ الْشَّيْطَانْ. فَجَالْ لَهْ يَسُوعْ: "إِللِّي أَنْتَ عَاوِزْ تَعْمِلَهْ أَعْمِلَهْ بِسُرْعَةْ!" 28 وِمَا حَدَاً إِللِّي كَانْو مَوْجُودِينْ مَعْ يَسُوعْ فَاهْمِينْ لِيهْ جَالْ لَهْ الْكَلامْ دَايتِي، 29 لَكِنْ بَعْضْ مِنْهُمْ ظَنْ إنُّ يَأمُرُهْ انُّ يِشْتري إِللِّي بِيِحْتَاجُو لِلْعِيدْ، أَوْ أنًّهْ يَعْطِي لِلْفُجَرَا بَعْضْ الْمَالْ، عَلَشَانْ يَهُوذَا كَانْ أَمِينْ لِلْصَنْدُوجْ. 30 وِمَا أَنْ أَخَدْ يَهُوذَا الْلُّجْمَةْ، خَرَجْ وِكَانْ الْلِّيْلْ سَرَى. 31 وِلَمَّا خَرَجْ يَهُوذَا، جَالْ يَسُوعْ: "دِلْوَكِيتِي إِتْمَجَّدْ إِبْنْ الإِنْسَانْ وِاتْمَجَّدْ اللَّهْ فِيهْ. 32 وِمَادَامْ اللَّهْ إتْمَجَّدْ فِيهْ، هَيِمَجِّدَهْ فِي ذَاتَهْ، وَبُسُرْعَةْ كَمَانْ. 33 يَا وِلادْ الْصِّغَارْ، آنِي هَكُونْ مَعْكُمْ وَكْتْ جَصِيرْ، وِبَعْدَاً هَتُطْلِبُونِي، وَلَكِنْ أَجُولْ لَكُمْ كُلْ إِللِّي جُلْتْ لِلْيَهُودْ: إِنَّكُمْ مَا تِجْدِرُو تِيجُو مِنْ حَيْثْ آنِي رَايِحْ. 34 وَصِيَّةْ جَدِيدَةْ أَعْطِيكُمْ آنِي: حِبُّو بَعْضِيكُمْ بَعَضْ، كِيفْ مَا حَبِّيْتْكُمْ آنِي، إتْحِبُّو بَعْضِيكُمْ أَنْتُو كَمَانْ. 35 وَبِدَايْتِي يَعْرِفْ الْكِلْ أَنَّكُمْ تَلامِيذِي: إِنْ كُنْتُم إِتْحِبُّونْ بَعْضِيكُمْ لِبَعَضْ". 36 عَلَشَانْ إِكْدِهْ سَأَلَهْ سِمْعَانْ بُطْرُسْ: "يَا سَيِّدْ، وَيْنْ إتْرُوحْ؟" أَجَابَهْ يَسوعْ: "مَا تِجْدَرْ تِطْبَعْنِي الآنْ لِلْمَكَانْ إللِّي أَرُوحْ لِيهْ، وِبَعْداً هَتْجِينِي بَعْدْ إِكْدِهْ". 37 وِعَادْ بُطْرُسْ يِسْأَلْ: " يَا سَيِّدْ، لِيهْ مَا بَجْدِرْ أَنْ أَتْبَعَكْ الآنْ؟ آنِي أَحُطْ حَيَاتِي بَدَالَكْ!" 38 أَجَابَهْ يَسُوعْ: "أَتْحُطْ حَياتَكْ بَدَلاً عَنِّي؟ الْحَجْ الْحَجْ أَجُولْ لَكْ: مَا يِصِيحْ الْدِّيكْ حَتَّى إِتْكُونْ أَنْكَرْتِينِي تَلاتْ مَرَّاتْ".