1 "لَا تِضْطِرِبْ جُلُوبْكُمْ. أَنْتُمْ إِتْآمْنُو بِاللَّهْ، فَآمْنُو بِي كَمَانْ. 2 فِي بِيْتْ أَبُويْ بِيُوتْ كَتِيرَةْ، وَإِنْ كَانْ الأَمْرْ مِشْ إِكْدِهْ مَا جُنْتْ جُلْتْ لِيكُمْ! عَلَشَانْ إِكْدِهْ آنِي رَايِحْ عَلَشَانْ أَجَهِّزْ لِيكُمْ مَكَانَاً. 3 وبَعَدْ مَا أَرُوحْ وِأَجَهِّزْ لِيكُمْ مَكَانْ أَعُودْ لِيكُمْ وِأَخُدْكُمْ لِيَّ، عَلَشَانْ حَيْثْ أَكُونْ آنِي إِتْكُونُ أَنْتُو كَمَانْ. 4 أَنتُمْ عَارْفينْ فيْنْ آنِي رَايِحْ، وتَعْرِفُو الْطَّرِيجْ". 5 وِجَالْ لَهْ تُومَا: "يَا سِيدِي، إِحْنَا مِشْ عَارْفِينْ لَفينْ انْتَ إتْرُوحْ، كِيْفْ نَعْرِفْ الْطَّرِيجْ؟" 6 جَاوْبَهْ يَسُوعْ: "آنِي هُوَّ الْطَّرِيجْ وِالْحَجْ وِالْحَيَاةْ. مَافِيشْ حَدْ يِجِي لِلْآبْ إلَّا مِنْ خِلالِي آنِي. 7 لَوْ كُنْتُمْ عِرِفْتُونِي، عِرِفْتُو أَبِي كَمَانْ، وَمِنْ الآنْ إِنْتُو تَعْرِفُوهْ وِشِفْتُوهْ". 8 فَجَالْ لَهْ فِيلِبُّسْ: "يَا سيِّدْ، وَرِّينَا الآبْ وكَفَانَا!" 9 أَجَابَهْ يَسُوعْ: "كُلْ الْمُدَّةْ دَايْتِي الْطَّوِيلَةْ وِآنِي مَعَاكُمْ وِمَا عَرِفْتُونِي يَا فِيلِبُّسْ؟ إِللِّي شَافْنِي شَافْ الآبْ، فْكِيفْ إِتْجُولْ: وَرِّينَا الآبْ؟ 10 أَنْتَ مِشْ بِتْآمِنْ إِنِّي آنِي فِي الآبْ، وِإِنَّ ألآبْ فِيَّ؟ الْكَلامْ إِللِّي أَجُولَهْ مَا بِجُولَهْ مِنْ عَنْدِي، وَلَكِنْ الآبْ الْمَوْجُودْ جُوَّايْ بِيَعْمِلْ الأَعْمَالْ دَايْتِي. 11 صَدِّجُو جُوْلِي: آنِي جُوَّةْ الآبْ وِالآبْ جُوَّايْ، وِإلَّا صَدِّجُونِي عَلَشَانْ الأَعْمَالْ دَايْتِي. 12 الْحَجْ الْحَجْ أَجُولْ لَكُمْ:إِللِّي يِِآمِنْ بِي يَعْمِلْ الأَعْمَالْ إِللِّي آنِي بِاعْمَِلْهَا، وِكَمَانْ يَعْمِلْ أَعْظَمْ مِنْهَا، عَلَشَانْ آنِي ذَاهِِبْ لِأَبُويْ. 13 أَيْ شيْ تِطْلِبُو بِإسْمِي إعْمِلَهْ لِيكُمْ، عَلَشَانْ يِتْمَجَّدْ الآبْ بِالإِبِنْ. 14 إِنْ طَلَبْتُمْ شَيْ بِإسْمِي، آنِي أَعْمِلَهْ. 15 إنْ كُنْتُمْ تُحِبُّونِي فَأَعْمَلُو بِوَصَيَايْ. 16 وِآنِي هَأَطْلُبْ مِنْ الآبْ أَنْ يِدِّيكُمْ مُعِينْ تَانِي يِبْجَى مَعَاكُمْ لِلأَبَدْ، 17 وِهُوَّ رُوحْ الْحَجْ، إِللِّي مَا يِجْدَرْ الْعَالَمْ أَنْ يِجْبَلُهْ عَلَشَانْ مِشْ شَايْفينَهْ وَلا يَعْرِفُوهْ، لَكِنْ أَنْتُمْ عَارْفِينُهْ عَلَشَانْ فِي وَسْطِيكُمْ، وَهَيِكُونْ جُوَّاكُمْ. 18 آنِي مِشْ هَاسِيبْكُمْ يَتَامَى، لَكِنْ هَعَاوِدْ تَانِي لِيكُمْ. 19 بَعْدْ جَلِيلْ مِشْ هَيِشُوفْنِي الْعَالَمْ. لَكِنْ أَنْتُمْ هَتْشُفُونِي. لأَنِّي آنِي حَيْ، وِانْتُمْ كَمَانْ هَتِحْيُو. 20 فِي الْيُومْ دَايْتِي تَعْرِفُو أَنِّي آنِي فِي أَبِي، وِانْتُم فِيَّ، وِآنِي فِيكُمْ. 21 مَنْ كَانَتْ عَنْدُهْ وَصَايَايْ، وَيَعْمِلْ بِهَا، دَايتي يِحِبِّنِي. وِاللِّي يِحِبِّنِي، يِحِبْهُ أبُويْ، وِآنِي أحِبُّهْ كَمَانْ وِأعْلِنْ لِيهْ ذَاتِي". 22 وِسَألَهْ يَهُوذَا، غَيْرْ الإسْخَرْيُوطِي: "يَا سِيدِي، آهْ إللِّي حَصَلْ عَلَشَانْ تُعْلِنْ لينَا ذاتَكْ وِمَا إتْعَرِّفْهَا لِلْعَالَمْ؟" 23 أجَابَهْ يَسُوعْ: "مِينْ يِحِبَّنِي يَعْمِلْ بِكِلْمِتِي، وِيُحِبُّهْ أبُويْ، ولِيهْ نِيجِي، وعِنْدَهْ نِجْعَلْ لِينَا بِيْتْ. 24 واللِّي مَا يِحِبْنِي لا يَعمَلْ بِكَلامِي. وِالْكَلامْ دَايْتِي إللِّي تِسْمَعُونَهْ مُشْ مِنْ عَنْدي، لَكِنْ مِنْ الآبْ إللِّي بَعَتْنِي، 25 وِجُلْتْ لِيكُمْ الأمُورْ دَايْتِي وِآنِي مَوْجُودْ عَنْديكُمْ. 26 وِالْرُوحْ الْجُدُسْ، الْمُعِينْ اللِّي هَيِبْعَطُهْ الآبْ بإسْمِي، هُوَّ يِعَلِّمْكُمْ كُلْ شَيْ، وِيِذَكَِرْكُمْ بِكُلْ مَا جُلْتُهْ لِيكُمْ. 27 سَلامْ أسِيبْ ليكُمْ. سَلامِي أعْطِيكُمْ. مُشْ كِيفْ مَا يَعْطِي الْعَالَمْ أعْطِيكُمْ آنِي. لا تِضْطِرِبْ جِلُوبْكُمْ، وَلا إتْخَافْ وِتِرْهَبْ. 28 سِمِعْتُمْ انِّي جُلْتْ ليكُمْ، آنِي ذَاهِب عَنْكُمْ وِبَعْداً أعَاوِدْ لِيكُمْ. لَوْ كُنْتُمْ إتْحِبُّونِي، كُنْتُمْ فِرِحْتُمْ عَلَشَانْ آنِي رَايِحْ لِلآبْ، لأنْ الآبْ أعْظَمْ مِنِّي. 29 آنِي جُلْتُلْكُمْ بِالْأمْرْ جَبْلْ مَا يِتِمْ، عَلَشَانْ لَمَّا الأمْرْ يِتِمْ إتْآمْنُو. 30 آنِي مُشْ أكَلِّمْكُمْ إكْتِيرْ بَعَدْ، عَلَشَانْ سَيِّدْ الْعَالَمْ دَايْتِي جَايْ عَلِيَّ، وِمَافِي شَيْ لِيهْ فِيَّ. 31 إلَّا انِّي كُلْ دَايْتِي هَيِتِمْ عَلَشَانْ يَعْرِفْ الِعَالَمْ أنِّي بَحِبْ الآبْ، وِآنِي زَيْ مَا أوْصَانِِي الآبْ إكْدِهْ أفْعَلْ. جُومُو! نِمْشي مِنْ إهْنِهْ!