1 وِجَبْلْ الْفِصْحْ بِسِتْ أيَّامْ إجَى يَسُوعْ الْبَيْتْ عَنْيَا، بَلَدْ لِعَازَرْ إِللِّي جَوَّامَهْ مِنْ الْمُوتْ. 2 وِعَلَشَانْ إِكْدِهْ عَمَلُو لِيهْ وَلِيمَةْ عَشَى، وِكَانَتْ مَرْثَا تِخْدُمْ، وِكَانْ لِعَازَرْ وَاحِدْ مِنْ الْنَّاسْ إِللِّي كَانُو مَوْجُودِينْ مَعَهْ. 3 وِأَخَدَتْ مَرْيَمْ مَناً (يَعْنِي تِلْتْ لِتْرْ) مِنْ عِطْرْ الْنَّارْدِينْ الْخَّالِصْ الْغَالِي الْثَّمَنْ، وِدَهَنَتْ بِهْ جَدَمِيْ يَسُوعْ، وِبَعْداً مَسَحَتْ رِجْلِيْهْ بِشَعْرِهَا، عَلَشَانْ إِكْدِهْ إِمْتَلأ كِلْ الْبِيْتْ مِنْ رِيحِةْ الْعُطْرْ. 4 وِبَعْداً جَالْ وَاحِدْ مِنْ تَلامِيذَهْ، وَهُوَّ يَهُوذَا الأَسْخَرْيُوطِي، إِللِّي كَانْ هَيِخُونْ يَسُوعْ: 5 "لِيهْ مَا بِعْتُمْ الْعُطْرْ دَايْتِي بِتُلْتُ مِيِةْ دِينَارْ وِتتوَزَّعْ عَالْفُجَرَا؟" 6 وِكَانْ مَا بِجُولْ الْكَلامْ دَايْتِي عَلَشَانْ كَانْ بِيِشْفَجْ عَالْفُجَرَا، لَكِنْ عَلَشَانْ هُوَّ كَانْ حَرَامِي، وِكَانْ أَمِينْ الْصَّنْدُوجْ وِكَانْ يَاخُدْ كُلْ الْفِلُوسْ إِللِّي إبْتِتْحَطْ فِيهْ. 7 عَلَشَانْ إِكْدِهْ أَجَابَهْ يَسُوعْ وِجَالْ لَهْ: "سِيبْهَا! هِيَّ خَلَّتْ الْعُطْرْ دايتي لِيُومْ دَفْنِي، 8 عَلَشَانْ الْفُجَرَا مَعْكُمْ كُلْ الْوَكْتْ؛ لَكِنْ آنِي مِشْ مَعَكُمْ فِي كُلْ الْوَكْتْ". 9 وِعِلِمْ إِكْتَارْمِنْ الْيَهُودْ أَنَّ يَسُوعْ فِي بِيْتْ عَنْيَا، عَلَشَانْ إِكْدِهْ إِجُو مِشْ عَلَشَانْ يِشُوفُو يَسُوعْ بَسْ، لَكِنْ عَلَشَانْ يِشُوفُو لِعَازَرْ إِللِّي جَوَّمَهَا مِنْ الْمُوتْ. 10 وِجَرَّرْ رؤسَاءْ الْكَهَنَة انَّ هُمَّا يِجْتِلُو لِعَازَرْ كَمَانْ، 11 عَلَشَانْ إِكْتَارْ مِنْ الْيَهُودْ كَانُو يِسِيبُو الْفِرِّيسِيِّينْ بِسَبَبْ لِعَازَرْ وِيِآمْنُو بِيَسُوعْ. 12 وَفِي الْيُومْ مِنْ بَعدْ إِكْدِهْ، عِرِفْ الْجِمْهُورْ الإِكْتَاْرإِللِّي إِجُو لِلْعِيدْ أَنَّ يَسُوعْ جَايْ مِنْ أُورَشَلِيمْ. 13 وَاخَدُو سَعَفْ الْنَّخْلْ وِخَرَجُو لاِسْتِجْبَالَهْ وِهَتَفُو: "أُوصَنَّا! تَبَارَكْ الآتِي بِاسْمْ الْرَبْ! هُوَّ مَلِكْ إِسْرَائِيلْ!" 14 وِلِجِى يَسُوعْ جَحْشْ وَرِكِبْ عَلِيْهْ، زَيْ مَا كَانْ مَكْتُوبْ. 15 "لا إِتْخَافِي يَا بِنْتْ صَهْيُونْ، عَلَشَانْ مَلِكِكْ جَادِمْ لِيكِ رَاكِبْ عَلَى جَحْشْ أَتَانْ". 16 وِمَا عِرِفْ تَلامِيذْ يَسُوعْ فِي أَوَّلْ الأَمْرْ أَنَّ كُلْ دَايْتِي هُوَّ عَلَشَانْ يِتِمْ الْنُبُوَّةْ. وِلَكِنْ بَعَدْ مَا إِتْمَجَّدْ يَسُوعْ إِفْتَكَرُو أَنَّ الْكِتَابْ جَالْ كُلْ دَايْتِي عَنُّهْ، وَهُمْ عَمَلُو كُلْ دَايْتِي عَلَشَانْ يَسُوعْ. 17 وِالْجَمْعْ إِللِّي كَانْ مَعَهْ لَمَّا دَعَا لِعازَرْ مِنْ الْجَبْرْ وِأََجَامَهْ مِنْ الْمُوتْ كَانُو شَاهْدِينْ لِيهْ بِكُلْ دَايْتِي. عَلَشَانْ إِكْدِهْ خَرَجْ جُمُوعْ إِكْتَارْ لاِسْتِجْبَالَهْ، 18 عَلَشَانْ هُمَّ سِمْعُو أَنَّ عَمَلْ الآيَةْ دَايْتِي. 19 وِجَالْ الْفَرِّيسِيُّونْ بَعْضِهِمْ لِبَعَضْ: "شُفْتُمْ كِيفْ إنَّكُمْ مِشْ حَتِسْتِفيدُو بِشيْ؟ الْعَالمْ كِلَّهْ رَاحْ وَرَاهْ!" 20 وِكَانْ بَيْنْ الَّذِينْ جَصَدُو أُورُشَلِيمْ لِلْعِبَادَةْ فِي أَثْنَاءْ الْعِيدْ بَعْضْ الْيُونَانِيِّينْ، وِرَاحُو لِفِلِبُّسْ، 21 وَهُوَّ مِنْ بَيْتْ صَيْدَا فِي مَنْطَجَةْ الْجَلِيلْ، وِجَالُو لَهْ: "يَا سَيِّدْ، عَايْزِينْ إِنْشُوفْ يَسُوعْ". 22 وِِبَعْدَاً إِجَى فَيلِبُّسْ وِأَخبَرْ أَنْدْرَاؤسْ، وِبَعْدَاً رَاحُو مَعْ بَعْضِيهِمْ وِخَبَّرُو يَسُوعْ. 23 وِجَالَّهُمْ يَسُوعْ: "سَاعَةْ جَرَّبَتْ عَلَشَانْ يِتْمَجَّدْ إِبْنْ الإِنْسَانْ. 24 الْحَجْ الْحَجْ أَجُولْ لَكُمْ : حَبَّةْ الْحِنْطَةْ تِبْجَى وَاحْدِيهَا لَوْ مَا وِجْعِتْسْ فِي الأَرْضْ وِمَاتِتْ. وَإِن مَاتَتْ، إتْجِيبْ حِبُوبْ كَتِيرَةْ. 25 إِللِّي بِيِمْسِكْ حَياتَهْ، يَخْسَرَهَا. ِإِللِّي نبَذْهَا فِي الْعَالمْ دَايْتِي يِوَفِّرْهَا لِلْحَيَاةْ الأَبَدِيَّةْ. 26 إِللِّي عَاوِزْ يِخْدِمْنِي يِتْبَعْنِي. وِالْمَكَانْ إِللِّي أَكُونْ آنِي فيهْ يِِكُونْ خَدَّامِي كَمَانْ. وِكِلْ مِينْ يِخْدِمْنِي يِكْرِمْهُ أََبُويْ 27 نَفْسِي الآنْ مُضْطَرِبَةْ، آيْشْ أَجُولْ؟ أَيُّهَا الآبْ نَجِّينِي مِنْ الْسَّاعَةْ الْجَايَةْ عَلِيَّ؟ لَاهْ! عَلَشَانْ الْسَّاعَةْ دَِايْتِي آنِي جِيِتْ. 28 أَيُّهَا الآبْ، مَجِّدْ إِسْمَكْ!" وِصُوتْ مِنْ الْسَّمَا يِجُولْ: "جَدْ مَجَّدْتُهْ وَأُمجِّدَهُ كَمَانْ". 29 عَلَشَانْ إِكْدِهْ جَالُو بَعْضْ الْحَاضِرِينْ إِللِّي سِمْعُو الْصُّوتْ: "دَا صُوتْ رَعَدْ!" وَلَكِنْ غَيْرِهِمْ جَالُو: "مَلاكْ كَلاَّمَهْ". 30 وِأَجَابْ يَسُوعْ: "الْصُّوتْ دَايْتِي مِشْ عَلَشَانِي آنِي وَلَكِنْ عَلَشَانْكُمْ أَنْتُمْ. 31 وَدِلْوَكِيتِي وَكْتْ الْحُكْمْ عَلَى الْعَالَمْ دَايْتِي! الآنْ يِنْطِرِدْ رَئِيسْ الْعَالَمْ دَايْتِي بَرَّةْ! 32 وِآنِي لَمَّا ارْتَفِعْ عَنْ الأَرْضْ هَاجْذُبْ لِيَّ كِلْ الْنَّاسْ". 33 جَالْ دَايْتِي عَلَشَانْ يِشَاوِرْ عَلَى كِيِفْ هَيِمُوتْ. 34 وِجَالْ بَعْضْ الْحَاضِرِينْ: "عَلَّمَتْنَا الْشَّرِيعَةْ أَنَّ الْمَسِيحْ يِبْجَى حَيْ لِلْأَبَدْ، كِيفْ إِتْجُولْ أَنَّ ابْنْ الإِنْسَانْ لَا بُدْ يِتْعَلَّجْ؟ مِينْ هَُّو إِبْنْ الإنْسَانْ دَايْتِي؟" 35 وِجَالْ لَهُمْ يَسُوعْ: "الْنُّورْ مَوْجُودْ مَعَكُمْ وَكْتْ جَصِيرْ.كَمِّلُو سِيرْكُمْ مَادَامْ الْنُّورْ يِشْرِجْ عَلِيْكُمْ، عَلَشَانْ مَا يُطْبِقْ عَلِيْكُمْ الْظَّلْمَةْ، إِللِّي بِيِمْشِي فِي الْظَّلْمَةْ مَا بِيعْلَمْ لَوِينْ رَايِحْ. 36 آمْنُو بِالْنُّورْ مَادَامْ الْنُّورْ مَعَاكُمْ، وِإِتْكُونُو أَبْنَاءْ الْنُّورْ دَايْتِي". وِبَعَدْ مَا جَالْ يَسُوعْ الْكَلامْ دَايْتِي، رَاحْ وِخَبَّ نَفْسَهْ عَنْهُمْ. 37 وِمَعْ أَنَّهْ عَمَلْ جِدَّامْهُمْ آيَاتْ إِكْتَارْجِِدَّاً، مَا آمَنُو بِيهْ، 38 عَلَشَانْ يِتِمْ جُولْ الْنَّبِي إِشَعْيَا: "يَا رَبْ مَنْ آمَنْ بِكَلامْنَا؟ وِلِْمِينْ ظَهَرَتْ يَدْ الْرَّبْ؟" 39 عَلَشَانْ إِكْدِهْ مَا جِدْرُو يِِآمْنُو، عَلَشَانْ إِشَعْيَا جَالْ كَمَانْ: 40 "أَعْمَى عَنِيْهِمْ وِجَسَّى جُلُوبْهِمْ، عَلَشَانْ لَا يِشُوفُو بِعْيُونْهِمْ وِيِفْهَمُو بِجُلُوبِْهِمْ وِيِتُوبُو، وِأَشْفِيهِِمْ". 41 وِجَالْ إِشَعْيَا دَايْتِي لَمَّا شَافْ مَجْدْ الْرَّبْ وِإِتْكَلَّمْ عَنَّهْ. 42 وِمَعْ أَنَّ إِكْتَارْمِنْ رُؤسَا آمْنُو بِيَسُوعْ، مِنْ غِيرْمَا يِبَيِّنُو إِيْمَانْهِمْ، وِكَانُو خَايْفِينْ أَنَّ يِتْحِكِمْ عَِلِيْهِمْ وِينْطِرْدُو مِنْ الْمَجْمَعْ، 43 عَلَشَانْ أَحَبُّو الْمَجْدْ إللِّي جَايْ مِنْ الْنَّاسْ عَلَى الْمَجْدْ إِللِّي مِنْ اللهْ. 44 وِلَكِنْ يَسُوعْ جَالْ بِصُوتْ عَالِي: "إِللِّي يِآمِنْ بِي، مَا بِآمِنْ بِي أَنَا، لَكِنْ يِآمِنْ بِاللِّي أَرْسَلْنِي، 45 وِاللِّي شَافْنِي، شَافْ إللِّي أَرْسَلْنِي. 46 آنِي جِيِتْ لِلْعَالَمْ نُورْ، إِللِّي يِآمِنْ بِي مَا يِبْجَى فِي الْظَّلْمَةْ. 47 وِانْ سِمِعْ حَدْ كلامِي وَمَا آمَنْ بِيهْ، آنِي مَا بَحْكُمْ عَلِيْهْ، عَلَشَانْ آنِي مَا جِيتْ لِأَحْكُمْ عَلَى الْعَالَمْ، لَكِنْ عَلَشَانْ أُخلِّصْ الْعَالَمْ. 48 إللِّي يِرْفضْنِي وَلا يِجْبَلْ كَلامِي، لِيهْ مِينْ يِحْكُمْ عَلِيْهْ؛ الْكِلْمَةْ إللِّي جُلْتُهَا هِيَّ تِحْكُمْ عَلِيْهْ فِي الْيُومْ الآخِرْ. 49 آنِي مَا بِتْكلَمْ بِشَيْ مِنْ عِنْدِي، لَكِنْ أَجُولْ كِلْ إللِّي وَصَّانِي الآبْ إِللِّي أرْسَلْنِي. 50 وِآنِي عَارِفْ أَنِّ وَصِيَّتَهْ هِيَّ حَيَاةْ أَبَدِيَّةْ. وِكْدِهْ ْكُلْ مَا بِجُولُهْ مِنْ كَلامْ أَجُولَهْ كِيفْ مَا جَالْ لِي الآبْ".