1 وِمِرِضْ إِنْسَانْ إِسْمَهْ لِعَازَرْ، وَهُوَّ مِنْ بَيْتْ عَنْيَا فِي الْقَرْيَةْ إِللِّي مِنْهَا مَرْيَمْ وِمَرْثَا أُخْتَهَا. 2 وِمَرْيَمْ دَايْتِي هِيَّ إِللِّي دَهَنَتْ الْرَّبْ بِالعِطْرْ وِمَسَحَتْ جَدَمِيْهْ بِشَعْرَهَا وِكَانْ لِعَازَرْ الْمَرِيضْ خّيَّاهَا. 3 وِبَعَتِتْ الأُخْتِيْنْ لِيَسُوعْ وِجَالُو لَهْ: "يَا سَيِّدْ، إِللِّي بِتْحِبُّهْ عَيَّانْ". 4 وِلَمَّا سِمِعْ الْكَلامْ دَايْتِي جَالْ: "الْمَرَضْ دَايْتِي مِشْ لِلْمُوْتْ، لَكِنْ عَلَشَانْ يِتْمَجَّدْ اللهْ، وَبِيهْ هَيِتْمَجَّدْ ابْنْ اللهْ". 5 وِمَعْ أَنَّ يَسُوعْ كَانْ بِحِبْ مَرْثَا وِأُخْتَهَا وِلِعَازَرْ، 6 جَعَدْ فِي الْمَكَانْ إِللِّي كَانْ فِيهْ يُوْمِيْنْ بَعْدَمَا عِرِفْ لِعَازَارْ عَيَّانْ. 7 وِبَعْدْ إِكْدِهْ جَالْ لِتَلامِيذَهْ: "تَعَالُو نِرْجَعْ الْيَهُودِيَّة!" 8 جَالْ تَلامِيذَهْ: "يَا مِعَلِّمْ، عَاوِزْ تِرْجَعْ الْيَهُودِيِّةْ، وَمِنْ وَكْتْ جِرَيِّبْ كَان عَاوِزْ الْيَهُودْ يِرْجِمُوكْ؟" 9 جَالْ لَهُمْ يَسُوعْ: "مِشْ سَعَاتْ الْنَّهَارْ إِتْنَعْشَرْ سَاعَة؟ إِللِّي بِيِمْشِي فِي الْنَّهَارْ مَا بِيِتْعَتَّرْ عَلَشَانْ شَايِفْ نُورْ الْعَالَمْ دَايْتِي. 10 لَكِنْ إِللِّي يِمْشِي فِي الْلَّيْلْ مُمْكِنْ يِتْعَتَّرْ، عَلَشَانْ الْنُّورْ مِشْ فِيهْ". 11 وِبَعْداً جَالْ يَسُوعْ: "لِعَازَرْ حَبِيبْنَا رَجَدْ، وَلَكِنِّي هَارُوحْ عَلَشَانْ أَجِيمُهْ". 12 جَالْ الْتَّلامِيذْ: "يَا سَيِّدْ، إِنْ كَانْ رَجَدْ، هَايِجُومْ مُعَافَى". 13 وِكانْ يَسُوعْ عَاوِزْ يِجُولْ لَهُمْ عَنْ مُوْتْ لِعَازَرْ؛ لَكِنْ الْتَّلامِيذْ فَكَّرُو إِنَّ رُجَادْ الْنُّومْ. 14 وَسَاعَتْهَا جَالْ لَهُمْ يَسُوعْ صَرَاحَةً: "لِعَازَرْ مَاتْ. 15 وِعَلَشَانْكُمْ آنِي أَفْرَحْ عَلَشَانْ مَا كُنْتْ إِهْنُكَّ، عَلَشَانْ تِآمْنُو. يَلَّا بِينَا إنْروحْ لِيهْ!" 16 فَجَالْ لَهْ تُومَا، إِللِّي إِسْمُهْ مَعْرُوفْ بِالْتَّوْأَمْ، لِلْتَّلامِيذْ الْبَاجِينْ: "يَلَّا إِنْرُوحْ إِحْنَا كَمَانْ عَلَشَان يِجْتِلُونَا مَعَاهْ." 17 وِلَمَّا وَصَلْ يَسُوعْ لِبَيْتْ عَنْيَا كَانْ لِعَازَرْ دَفَنُو فِي الْجَبَرْ مِنْ أَرْبَعَةْ إِيَّامْ. 18 وِكَانَتْ بَيْتْ عَنْيَا مَا إِبْتِبْعِدْ عَنْ أُورُشَلِيمْ إلَِّا حَوَالِي إِتْنِينْ مِيلْ. 19 وِكَانْ إِكْتَارْ مِنْ الْيَهُودْ جُمْ لِمَرْثَا وِمَرْيَمْ عَلَشَانْ يِعَزُّوهُمْ فِي مُوْتْ خَّيِّهُمْ. 20 وِلَمَّا عِرْفِتْ مَرْثَا أَنَّ يَسُوعْ جَايْ طِلْعِتْ عَلَشَانْ تِسْتَجْبَلُهْ، وِبَجَتْ مَرْيَمْ جَاعْدَةْ فِي الْبَيْتْ. 21 وِجَالَتْ مَرْثَا لِيَسُوعْ: "يَا سَيِّدْ، لَوْ كُنْتْ إِهْنِهْ، مَا كَانْ خَيِّ مَاتْ. 22 آنِي وَاثجَةْ بِالتَّمَامْ إِنَّ اللهْ يِدِّيكْ كُلْ مَا تِطلُبْ مِنَّهْ". 23 وِجَالْ لهَا يَسُوعْ: "هَيِجُومْ خَيِّكْ". 24 جَالَتْ مَرْثَا: "آنِي عَارْفَةْ إنَّهْ سَيِجُومْ فِي الْجِيَامَةْ ، فِي الْيُومْ الأَخِيرْ!" 25 رَدْ يَسُوعْ وِجَالْ لَهَا: "آنِي هُوَّ الْجِيَامَة ْوِالْحَيَاةْ. وِكُلْ مَنْ آمَنْ بِي، وَلَوْ مَاتْ هَيَحْيَا تَانِي. 26 وَمَن كَانْ حَيْ وِآمَنْ بِي لَا يِمُوتْ لِلْأَبَدْ. تُؤمِنِينْ بِدَايْتِي؟" 27 جَاوْبَتَهْ: "نَعَمْ يَا سِيدِي. آنِي آمَنْتْ أَنَّكْ أَنْتَ الْمَسِيحْ ابْنْ الله إِللِّي إِجَى لِلْعَالَمْ!" 28 جَالِتْ الْكَلامْ دَايْتِي، وِراحَتْ تِجُولْ إِخْتَهَا مَرْيَمْ، وِجَالِتْ لَهَا بِالْسِّرْ: "الْمِعَلِّم إِهْنِهْ، هُوَّ يِطْلِبِكْ!" 29 وِلَمَّا سِمْعِتْ مَرْيَمْ هَبَّتْ وِجَامَتْ وَاجْفَةْ، وِجِريِتْ لِيَسُوعْ. 30 وِمَا كَانْ وِصِلْ لِلْقَرْيَةْ، لَكِن كَانْ فِي الْمَكَانْ إِللِّي لاجَتُهْ فِيهْ مَرْثَا. 31 وِلَمَّا شَافْهَا الْيَهُودْ، إِللِّي كَانُو مَعَهَا فِي الْبَيْتْ بِعَزُّوهَا، جَامَتْ تِجُومْ وَاجْفَةْ وَتِجْرِي بَرَّةْ الْبَيْتْ، لِحْجُوهَا، عَلَشَانْ فَكَّرُو أَنَّ هِيَّ رَايْحَةْ تِبْكِي عِنْدْ الْجَبِرْ بِتَاعْ خَيِّيهَا. 32 وِلَمَّا وِصْلِتْ مَرْيَمْ لِلْمَكَانْ إِللِّي شَافَتُهْ فِيهْ، وِجْعِتْ عَنْدْ جَدَمِيْهْ تِجُولْ لَهْ: "يَا سِيدِي لَوْ كُنْتْ إِهْنِهْ، مَا كانْ مَات خَيَّي!" 33 وِلَمَّا شَافْهَا يَسُوعْ وِإِبْتِبْكِي وِيِبْكِي مَعَهَا الْيَهُودْ إِللِّي رَافَجُوهَا، جَلْبُهْ إِتْحَرَّجْ بِشِدَّةْ مِنْ الْحُزْنْ، 34 وِسَأَلْ يَسُوعْ: "وَيْنْ دَفَنْتِمُوهْ؟" وِجَاوَبُو وِجَالُو لَهْ: "تَعَالْ، يَا سَيِّدي، وِشُوفْ!" 35 فِي الْوَكْتْ دَايْتِي بَكَى يَسُوعْ. 36 جَالْ الْيَهُودْ بَعْضِهُمْ لِبَعْضْ: "شُوفَو كَانْ يِحِبُّو كَدِّيْشْ!" 37 وِسَأَلْ بَعْضِهُمْ لِبَعَضْ: "مَا كَانْ يِجْدِرْ دَايْتِي إِللِّي فَتَحْ عَيْنْ الأَعْمَى أَنَّ مَا كَانْ يِخَلِّي لِعَاَزَرْ يِمُوتْ؟" 38 إتْأَسَّرْ جَلْبْ يَسُوعْ بِشِدَّةْ وِحِزِنْ مَرَّةْ تَانْيَةْ. وِبَعْدْ إِكْدِهْ جَرَّبْ لِلْجَبْرْ، وِكَانْ كَهِفْ عَلَى بَابَهْ حَجَرْ كَبِيْر. 39 وِجَالْ يَسُوعْ: "إِرْفَعُو الْحَجَرْ!" جَالِتْ لَهْ مَرثَا: "يَا سَيِّدْ، بَجَالَهْ أَرْبَعْ تِيَّامْ فِي الْجَبِرْ، وَهُوَّ عَفَّنْ". 40 جَالْ لَهَا يَسُوعْ: "آنِي مَا جُلْتُلِّكْ: إِنْ آمَنْتِ هَتْشُوفِي مَجْدْ اللهْ؟" 41 وِرَفَعُو الْحَجَرْ، وِرَفَعْ يَسُوعُ عَيْنِيْهْ لِلْسَمَا وِجَالْ: "أَيُّهَا الآبْ، أَشْكُرَكْ عَلَشَانْ سِمِعْتْ لِي، 42 وِآنِي عَارِفْ أَنَّكْ أَنْتَ عَلَى طُولْ إبْتِسْمَعْنِي. وَلَكِنْ جُلْتْ الْكَلامْ دَايْتِي عَلَشَانْ الْجَمْعْ إِللِّي وَاجِفْ حَوَلِيْنِي يِآمْنُو إِنَّكْ أَنْتَ بَعَدْتِينِي". 43 وِبَعْدَاً صَرَخْ يَسُوعْ بِصُوتْ عَالِي: "لِعَازَرْ إِخْرُجْ!" 44 فَخَرَجَ الْمَيِّتْ وِالْكَفَانْ بِتَاعْهَا عَلَى إِيدَهْ وَرِجْلَهْ، وِالْمِنْدِيلْ إِللِّي كَانْ عَلَى رَاسَهْ. وِجَالْ يَسُوعْ لِلِّي حَوَلِيْهْ: "فُكُّوهْ وِخَلُّوهْ يِرُوحْ!" 45 وِآمَنْ بِيَسُوعْ إِكْتَارْ مِنْ الْيَهُودْ إِللِّي إِجُو عَلَشَانْ يِعَزُّو مَرْيَمْ، لَمَّا شَافُوهْ بِيَعْمِلْ أَعْمَالْ دَايْتِي. 46 وِبَعْدْ مِنْهُمْ رَاحُو لِلْفَرِّيسِيِّينْ وِجَالُولْهُمْ عَمَّا عَمِلْهَا يَسُوعْ. 47 فَعَمَلْ رُؤسَاءْ الْكَهَنَةْ وِالْفَرِّيسِيُّونْ إِجْتِمَاعْ، وِجَالُو: "أَيْشْ إِنْسَوِّي؟ الْرَاجِلْ دَايْتِي بِيَعْمِلْ مُعْجِزَاتْ كَتِيرَةْ. 48 لَوْ سِبْنَاهْ وِشَأَنَهْ يِآمِنْ بِيهْ الْجَمِيعْ، وَيِجُو الْرُّومَانْ وِيِدَمِّرُونْ هَيْكَلْنَا الْمِجَدَّسْ وَكُلْ أُمِّتْنَا!" 49 وِجَالْ وَاحِدْ مِنْهُمْ، وَهُوَّ جِيَافَا إِللِّي كَانْ رَيِّسْ لِلْكَهَنَة فِي الْسَنَة دَايِتِي: "أَنْتُمْ مَا إِبْتَعْرِفُو شَيْ! 50 أَنْتُمْ مِشْ فَاهْمِينْ إنُّ مِنْ الأَفْضَلْ أَنْ يِمُوتْ رَاجِلْ وَحِدْ وَيِفْدِي الأُمَّةْ، بَدَل مَا تِهْلَكْ الأُمَّةْ كُلَّهَا". 51 لَكِنْ جِيَافَا مَا جَالْ الْكَلامْ دَايْتِي مِنْ عَنْدَهْ، لَكِنْ هَوَّ كَانْ رَيِّسْ الْكَهَنَةْ فِي الْسَّنَةْ دَايْتِي وِإِتْنَبَّأَ أَنَّ يَسُوعْ هَيِمُوتْ فِدَى الأُمَّةْ كُلَّهَا، 52 وِكَمَانْ مِشْ فِدَى الأُمَةْ كُلَّهَا بَسْ، لَكِنْ عَلَشَانْ كَمَانْ لِيِجَمِّعْ أَوْلادْ اللهْ الْمِتْشَتِّتينْ عَلَشَان يِخَلِّيهُمْ وَاحِدْ. 53 وَمِنْ الْيُومْ دَايْتِي جَرَّرْ الْيَهُودْ أَنْ يِجْتِلُو يَسُوعْ. 54 وِبَعْدَاً مَا رِجِعْ يِتْمَشَّى بِيْنَاتْهُمْ فِي الْعَلَنْ، لَكِنْ رَاحْ لِمَدينَةْ إِسْمَهْ أَفْرَايِمْ، وَهِيَّ فِي مَكَانْ جِرَيِّبْ مِنْ الْصَحْرَا، وَفِي الْمَكَانْ دَايْتِي أَجَامْ يَسُوعْ مَعْ إِتْلامِيذَهْ. 55 وِكَانْ عِيدْ الْفِصْحْ الْيَهُودِي جَرَّبْ، فَجُمْ إِكْتَارْ مِنْ الْكُرَى لِلأُورُشَلِيمْ عَلَشَانْ يَعْمِلُو تِجُوسْ تَطْهِيرْ الْسَّابْجَةْ لِلْعِيدْ. 56 وِكَانُو بِدَوَّرُو عَلَى يَسُوعْ، وِيِسْألُو وَهُمَّا جُوَّا الْهِِيْكَلْ مِجْتِمْعِينْ: "آيْشْ رَأَيِكُمْ؟ هَلْ هُوَّ جَايْ لِلْعِيدْ وَالْلاَّ؟" 57 وِكَانْ رُؤسَاءْ الْكَهَنَةْ وِالْفَرِّيسِيُّونْ عَمَلُو جَرَارْ كُلْ إِنْسَانْ وَجَدَ يَسُوعْ يِبَلِّغْ عَنَّهْ عَلَشَانْ يِجْبِضُو عَلِيْهْ.