¹ و باز اوشَأنَ بوگوفت:«یقین بدَأنید بعضی هَ یَ بپا ایسَد کی تا خدا ملکوتَ کی قدرتِ اَمرَه اَیه نیدیند، مرگِ طعمَ نچشد.» ² شیش روز بعدْ عیسی پطرس و یعقوب و یوحنایَ اوسَأد و خو مرَه بوبورد ایتَه کوه جُر. اونْ اوشَأنِ اَمرَه تنها بو و اوشأنِ نظرِ جَه اونِ صورت تغییر بوکود. ³ و اونِ لیباس درخشان بوبُست و برفِ مَأنستَأن سفید، جوری کی زمینِ رو هیچکس نتَأنه لباسی یَ اوقدر بوشوره کی اوطو سفیدَ بِه. ⁴ اونموقع الیاس و موسی یَ بیدد کی عیسی اَمرَه گب زند. ⁵ پطرس عیسی یَ بوگوفت:«ای اُستاد، چقدر خوبه کی اَمَأن اَیَ ایسَه ایم، پس سه تا سایبان چَأکونیم، ایتَه تِره، ایتَه موسی رِه و ایتَه هم الیاسِ رِه.» ⁶ اون نَأنسته چی گوفتَأن دره، چون همه تَه خیلی بترسه بود. ⁷ هون موقع اَبری ظاهرَ بوست و اوشَأنِ رو سایه تَأوَأده، و آوازی جی آسمان بأمو کی گوفته:«اَنْ می عزیزه پسره، اونِ حرفانَ گوش بوکونید.» ⁸ اوشَأنْ فوری خوشَأنِ دؤر و ورَ فَأندرستد، ولی جُز عیسی کسی یَ نیدد. ⁹ وختی کوه جَه بیجیر اَموده، عیسی اوشَأنَ بوگوفت تا قبلِ اونِ زنده بوستَأن درباره اونچی کی بیدد کسی یَ چیزی نوگوید. ¹⁰ اوشَأنم اِطاعات بوکودد، ولی خودشانِ میَأن بحث کودد کی عیسی منظور دربارۀ «زنده بوستَأن» چی بو. ¹¹ شاگردان عیسی جَه وَأورسد:«چره یهودِ مُلایان گوید کی اول وَأستی الیاس بأیه؟» ¹² عیسی جواب بده:«بله، البته کی اول وَأستی الیاس بَأیه، اون همه چیزَ آمادَه کونه، ولی چره کیتاب مقدسِ گویه کی انسانِ پسر وَأستی رنج و عذابِ زیادی یَ تحمل بوکونه و خوار و خفیف بیبه؟ ¹³ ولی دربارۀ الیاس وَأستی بوگویم هوطو کی دربارۀ اون بینیویشته بوبُسته بو اون بأمو و اوشَأنْ هر کاری کی اوشَأنِ دیل بخأسته اونِ اَمرَه بوکودد. ¹⁴ وختی عیسی و اون سه تا شاگرد فأرسد باقی شاگردانِ ورجَه، بیدد جمعیتِ زیادی اوشَأنَ دورَه کوده دَأرد و یهودِ مُلایان اوشَأنِ اَمرَه بحث کوند. ¹⁵ هوطو کی عیسی نزدیکَ بوسته، مردم تعجب کودد و بودو بودو بأمود اونِ پیشواز و اونَ سلام بوگوفتد. ¹⁶ عیسی وَأورسه:«دربارۀ چی بحث کونید؟» ¹⁷ جمعیتِ میَأنِ جَه ایتَه مردَأی بوگوفت:«ای استاد، می پسرَ تی ورجَه بأوردِم، اونْ روحِ شریرَ گرفتاره و نِتَأنه حرف بزنه. ¹⁸ و هر جا کی اونَ گیره اونَ به زمین تَأوَأده، جوری کی اونِ دَهن کف کونه و خو داندانانَ بهم زنه و اونِ بدن خوشکَ بِه. تی شاگردانِ جَه بخَأستم کی اون روحَ بیرون تَأوَأدد ولی نتَأنستد.» ¹⁹ عیسی اوشَأنَ بوگوفت:«ای قؤمِ بی ایمان، تا کِی شیمی اَمرَه بِئسم و چقدر شمرَه تحمل بوکونم؟ اونَ می ورجَه بأورید.» ²⁰ پس اونْ پسرَ اونِ ورجَه بأوردد. وختی عیسی پسرَ بیده فوری روح اونَ بیگیفت و به حالتِ صرع به زمین تأوَأده، اونِ دَهن کف بوکود و دس و پا بزَه. ²¹ عیسی اونِ پئرِ جَه وَأورسه:«چن وخته کی اَطو بوبُسته؟» جواب بدَه:«جی کوچیکی، ²² و بارها اونَ آب و آتشِ میَأن تَأوَأده دَأره تا اونَ هلاکَ بوکونه. هَسَه اگر تَأنی اَمرَه رَحم بوکون و یاری بوکون.» ²³ عیسی بوگوفت:«اگر تَأنم؟ اگر ایمان بدَأری همه چیز تِره ممکنه» ²⁴ هو لحظه اون پسرِ پئر فریاد بزَه و گریه اَمرَه بوگوفت:«بله ایمان اَورم ای خداوند، ولی می ایمان کمه، مرَه کمک بوکون تا می ایمان ویشترَ بِه.» ²⁵ وختی عیسی بیده کی مردم جمعَ بوستَأن دردْ روحِ شریرَ دستور بدَه کی:«ای روحِ کر و لال، ترَه دستور دهم کی اونِ جَه بیرون بَأیی و هیچ وخت اونَ داخل نیبی» ²⁶ اونْ روحْ نعره ایی بزَه و پسر پَرکش بوکود و بعدْ روح اونِ جَه بیرون بأمو، اون زَأیِ رنگ بپرسته بو و بمرده آدمانَ مَأنسته، جوری کی بعضی گوفتد:«زأی بمرد» ²⁷ ولی عیسی اونِ دسَ بیگیفت و اونَ ویریزَأنی و اونْ بپا بئسَه. ²⁸ بعد وختی بوشود بخانه، شاگردان خلوتی عیسی جَه وَأورسد:«چی وَسی اَمَأن نتَأنستیم اون روحَ بیرون تَأوَأدیم؟» ²⁹ عیسی جواب بدَه:«اَ جنس روحْ، جُز دوعا اَمره بیرون نیشه.» ³⁰ عیسی جی اویَ بوشو اُستانِ جلیل و نخَأسته کسی اونَ بشناسه. ³¹ چون خو شاگردانَ تعلیم بدَه و بوگوفته بو:«انسانِ پسرْ مردمِ دس تسلیم بِه و اوشَأنْ اونَ کوشد، ولی روزِ سوم دوباره زندَه بِه.» ³² ولی اوشأن اونِ منظورَ درک نوکودد، و ترسِئد کی اونِ جَه وَأورسد. ³³ بازن فأرسد کَفرناحوم، وختی خانه دورون ایسَه بود عیسی شاگردانِ جَه وَأورسه:«راه میَأن دربارۀ چی بحث کودید؟» ³⁴ اوشَأن ساکت بِئسَأد، چون راه میَأن بحث کودد کی کَ ی تَه پیله تره. ³⁵ عیسی بینیشت و اون دوازدَه شاگردَ دخَأد و بوگوفت:«هر کی خَأیه اول بیبه وَأستی آخرین و همه تَه خادم بیبه.» ³⁶ بعدْ عیسی ایتَه کوچی زأیَ بیگیفت وسطِ جَه بپا بدأشتْ، و بعد اونَ کشَه گیفت و بوگوفت: ³⁷ «هر کی ایتَه زأیَ به می نام قبول بوکونه، در واقع مرَه قبول بوکوده، و هر کی مرَه قبول بوکونه، نه مرَه، بلکی کسی کی مرَه اوسَه کوده یَ قبول بوکوده.» ³⁸ یوحنا بوگوفت:«ای اُستاد، کسی یَ بیده ایم کی به تی نامْ دیوانَ بیرون تَأوَأده ئِه، ولی چون جُزِ اَمی نفرات نوبو اونَ بوگوفتیم کی اَ کارَ نوکونه.» ³⁹ عیسی بوگوفت:«اونِ مانع نیبید، چون کسی کی به می نام مُعجزه ایی کونه بر ضد من نییه. ⁴⁰ چون هر کس کی بر ضدِ اَمَأن نییه، اَمی اَمرَه یه. ⁴¹ اگر کسی شمرَه، فقط اَنِ وَسی کی مسیحِ شینیدْ به می نام ایتَه کاسه آب فَأده، یقین بدَأنید خدا اونِ پاداشَ اونَ فَأده. ⁴² و هر کس ایتَه جی اَن کوچی زأکأنَ کی مرَه ایمان بأوردهْ جی راه بدرَ کونه و باعث بیبه خو ایمانَ جی دس بده، اونِ رِه بهتره بو کی سنگِ آسیابی اونِ گردنَ دوَسته بِد و اونَ دریا میَأن تَأوأدَه بِد. ⁴³ پس اگر تی دس تی گومراهی یَ باعث بِه، اونَ وَأوین، چون ترِه بهتره کی بی دس حیاتِ جاودانَ داخل بیبی تا اَنکی دو دسِ اَمرَه بیشی جهنم، یعنی آتشی دورون کی خاموشی نَئره. ⁴⁴ جایی کی اوشَأنِ کِرم نیمیره و آتشْ خاموشَ نیبه. ⁴⁵ اگر تی پا ترَه گومراه کونه، اونَ وَأوین، چون ترِه بهتره کی لنگ حیاتِ جاودانی یَ داخل بیبی تا اَنکی دو تا پا اَمرَه بیشی جهنم. ⁴⁶ جایی کی اوشَأنِ کِرم نیمیره و آتشْ خاموشَ نیبه. ⁴⁷ و اگر تی چوم ترَه مُنحرفَ کونه، اونَ بیرون بأور و فیشَأن، چون بهتره کی ایتَه چومِ اَمرَه خدا ملکوتَ وارد بیبی، تا اَنکی دو تَه چوم بدَأری، و جهنمِ دورون تَأوَأده بیبی. ⁴⁸ جایی کی اوشَأنِ کِرم نیمیره و آتشْ خاموشَ نیبه. ⁴⁹ چون همه آتشِ اَمرَه نمکی بهد، هوطو کی ایتَه قربانی نمکِ اَمرَه پاک بِهِه. ⁵⁰ نمک خوبه، ولی اگر خو خاصیتَ جی دس بده، دِ ارزشی نَئره و هیچی رِه بدرد نوخوره. پس شومَأنم شیمی خاصیتَ جی دس ندید و همدیگرِ اَمرَه صلح و صفا میَأن زندگی بوکونید.