¹ عیسی کفرناحومِ جَه راه دکفت و رودِ اُردنِ اوطرفِ جَه بأمو یهودیه. بازم مردم اونِ دور جمعَ بوستد و اونم طبق خو عادت شروع بوکود اوشأنَ تعلیم دَئَن. ² اون میَأنِ جَه چن تَه فریسی پیش بأمود و امتحان کودأنِ وَسی اونِ جَه سوال وَأورسد:«آیا مرد تَأنه خو زَنَ طلاق بده؟» ³ عیسی در جواب اوشَأنِ جَه وَأورسی:«موسی دربارۀ طلاق شمرَه چی بوگوفت؟» ⁴ اوشَأن جواب بدَأد:«موسی بوگوفت کی مردْ خو زنَ طلاقنامه فأده و اونِ جَه سیوایَ بِه.» ⁵ عیسی اوشَأنَ جواب بدَه:«شیمی سنگ دیلی وَسی بو کی موسی اَ حُکمَ فَأده، ⁶ وگرنه خدا جی هون اولِ خلقتْ انسانَ مرد و زن خلق بوکود. ⁷ و هَنه وَسیه کی مردْ خو پئر و مارَ ترکَ کونه، و خو زنِ اَمرَه پیوند خوره. ⁸ و اَ دو نفر ایتَه تن بِهد، یعنی دِ دو نفر نییدْ بلکی ایتَه ید. ⁹ پس اونچی کی خدا به هم پیوند بزَه دَأره یَ انسان نوَأستی سیوایَ کونه.» ¹⁰ بعداً وختی عیسی خانه دورون تنها بو، شاگردان ایبارِ دیگر اَ موضوعَ عیسی جَه وَأورسد. ¹¹ عیسی اوشَأنَ جواب بدَه:«هر کس خو زنَ طلاق بده و دیگری اَمرَه ازدواج بوکونه، نسبتِ به خو زنْ زِنا بوکوده. ¹² و هَطو هر زنی خو مردِ جَه سیوایَ بِه و مردِ دیگری اَمرَه ازدواج بوکونه، اونم زِنا بوکوده.» ¹³ مردم خوشَأنِ کوچی زأکأنَ اونِ ورجَه بأوردد تا زأکأنِ رو دس بنه، ولی شاگردان مردمِ جولویَ بیگیفتد و اوشَأنَ سرزنش بوکودد. ¹⁴ وختی عیسی شاگردانِ رفتارَ بیده ناراحتَ بوست و اوشَأنَ بوگوفت:«وَألید کوچی زأکأن می ورجَه بَأید و اوشَأنِ مانع نیبید، چون خدا ملکوت اَجور کسانِ شینه. ¹⁵ یقین بدَأنید هر کی خدا ملکوتَ کوچی زأکأنِ مَأنستَأن قبول نوکونه، هیچموقع اونَ بودورون نیشه.» ¹⁶ اونموقع زأکأنَ کشَه گیفت و خو دسَ اوشَأنِ رو بنَه و اوشَأنَ برکت بدَه. ¹⁷ وختی عیسی راه دکفت کی بیشه، اینفر بودو بودو بأمو اونِ ورجَه و وَأورسه:«ای استادِ خوب، چی بوکونم تا حیاتِ جاودانی وارث بوبوم؟» ¹⁸ عیسی اونَ بوگوفت:«چره مرَه خوب دَخأنی؟ هیچکس جُز خدا خوب نییه. ¹⁹ اَحکامَ دَأنی، زِنا نوکون، قتل نوکون، دوزدی نوکون، شهادت دوروغ ندن، کلک نزن، تی پئر ¬و¬ مارَ احترام بنن.» ²⁰ اون مرد جواب بدَه:«ای اُستاد، همۀ اَ کارانَ جی کوچیکی رعایت بوکوده دَأرم.» ²¹ عیسی مُحبتِ اَمرَه اونَ فَأندرست و بوگوفت:«هنوز ایتَه چی کم دَأری، بوشونْ و اونچی کی دَأری یَ بوفروش و فَأدن فقیر فُقرایَ، کی عالمِ بوجُرِ جَه گنجی بدس اَوری، بازن بیا و مرَه پیروی بوکون.» ²² اَ حرفِ جَه اون مردِ قیافه درهم بوبُست و ناراحتی اَمرَه جی اویَ بوشو، چون ثروتِ زیادی دَأشته. ²³ عیسی خو دور و ورَ فَأندرست و خو شاگردانَ بوگوفت:«چقدر سخته کی ثروتمندان خدا ملکوتَ وارد بوبود.» ²⁴ شاگردان اونِ حرفانِ جَه تعجب بوکودد، ولی عیسی اوشَأنَ بفرماست:«ای زأکأن، کسانی کی مالِ دونیایَ دیل دوَسته دَأرد رِه چقدر سخته کی خدا ملکوتَ بودورون بوشود. ²⁵ شُتر سوزنِ سوراخِ جَه راحت تر ردَ بِه تا ایتَه ثروتمند بتَأنه خدا ملکوتَ بودورون بیشه.» ²⁶ اوشَأن ویشتر تعجب بوکودد و همدیگرِ جَه وَأورسه ئِد:«پس کی تَأنه نجات پیدا کونه؟» ²⁷ عیسی اوشَأنَ فأندرست و بوگوفت:«انسانِ ورجَه مَحاله، ولی خدا رِه نه، چون خدا رِه هیچ کاری محال نییه» ²⁸ پطرس عیسی یَ جواب بدَه و بوگوفت:«من و باقی شاگردان هر چی کی دَأشتیمَ ولَ کودیم و تی پِیرو بوبُستیم.» ²⁹ عیسی جواب بدَه:«یقین بدَأنید کی هر کس می وَسی و انجیلِ وَسی، خو خانه یَ، و یا برأر خأخورانَ، و یا پئر و مارَ، و یا خو زنَ، یا خو اولادَ، یا خو زمینَ ترکَ کونه، ³⁰ اَ دونیا میَأن صد برابر ویشتر، خانه و برأر و خأخور و مار و زأی و زمین بدس اَوره، البته رنج و زحمت هم اونِ رأفأ ایسَه، و آخرتِ رِه حیاتِ جاودانی اونِ نصیب بِهه. ³¹ ولی خیلیان کی هَسَه پیله کس به نظر اَید، اون زمان کوچی تریند، و خیلیان کی هَسَه کوچیک حساب بود، اونزمان پیله کس بهد.» ³² عیسی و اونِ شاگردان راه دکفد بوشود اورشلیم، و عیسی اوشَأنِ پیشاپیش حرکت کوده. ایمرتبه شاگردانَ کی عیسی دونبال شوئون دوبود ترس بیگیفت. عیسی هم اون دوازدَه شاگردَ بوبورد ایتَه کنار و شروع بوکود دربارۀ اونچی کی وَأستی اونِ رِه اتفاق دکفه گب زَئَن. ³³ عیسی اوشَأنَ بوگوفت:«اَمَأن هَسَه شیم اورشلیم، و انسانِ پسرَ فَأدد کاهنانِ اَعظمْ و یهودِ مُلایانِ دس، اوشَأنم اونَ مرگَ محکوم کوند و ایسپارد غریبه یانِ دس، ³⁴ اوشَأنْ اونَ مسخره کوند، اونَ شلاق زند و اونِ صورت تُف فوکوند و اونَ کوشد، ولی روزِ سوم رِه دوباره زنده بِهه.» ³⁵ اونموقع یعقوب و یوحنا پیش بأمود و بوگوفتد:«ای اُستاد، اِمکان دَأره اونچی کی تی جَه خَأئیمَ اَمرِه انجام بدی؟» ³⁶ عیسی وَأورسه:«چی خَأئید شمرِه بوکونم؟» ³⁷ اوشَأن جواب بدَأد:«اَمَأن خَأئیم تا تی سلطنتِ موقع، ایتَه از اَمَأن تی راست طرفْ و اوی تَه تی چپِ طرف بینیشینه.» ³⁸ عیسی اوشَأنَ جواب بدَه:«شومَأن نَأنید چی خَأئید، آیا تَأنید اون پیاله ایی کی من خورمِ جَه شومَأنم بوخورید و اون تعمیدی کی من گیرمِ جَه شومَأنم بیگیرید؟» ³⁹ اوشَأن جواب بدَأد:«تَأنیم» عیسی اوشَأنَ بوگوفت:«پیاله ای جَه کی من خورم شومَأنم خورید و تعمیدی کی من گیرم شومَأنم گیرید، ⁴⁰ ولی نیشتَأن می راست و می چپِ طرف می اختیار نِنَه، فقط کسانی تَأند اویَ بینیشیند کی پیشترانِ رِه تعیین بوبُستد». ⁴¹ وختی باقی شاگردان بفهمستد کی یعقوب و یوحنا چی درخواستی دَأشتد اوشَأنِ جَه ناراحتَ بوستد. ⁴² پس عیسی همه تَه یَ دخَأد و بوگوفت:«دَأنید کی اَ دونیا پادشاهان و پیله کسانْ مردمِ رو فرمانروایی و ریاست کوند. ⁴³ ولی شیمی میَأن نوَأستی اَطو بیبه، بلکی برعکس، هر کی خَأیه شیمی میَأن پیلَه بِه، وَأستی دیگرانَ خدمت بوکونه. ⁴⁴ هر کی خَأیه اول بیبه وَأستی همه تَه غُلام بیبه. ⁴⁵ چون انسانِ پسر نَأمو دَأره تا خدمت بیبه، بلکی بأمو تا دیگرانَ خدمت بوکونه و خو جانَ دیگرانِ وَسی بنه.» ⁴⁶ بعدْ اوشَأنْ فأرسد شهرِ اَریحایَ. وختی عیسی خو شاگردانْ و جمعیتِ زیادی از مردمِ اَمرَه شهرَ بیرون شوئون دوبو، ایتَه گدایِ کورْ کی «بارتیمائوس» نام دَأشته و «تیمائوسِ» پسر بو راه کنار نیشته بو و گدایی کوده. ⁴⁷ وختی بیشتَأوست کی عیسایِ ناصریه، شروع بوکود فریاد کودَأن و بوگوفت:«ای عیسی، داوودِ پسر، مرَه رَحم بوکون.» ⁴⁸ ولی خیلی از مردم اونَ تَشر بوشد کی ساکت بوبون، ولی اون خو صدایَ بلندترَ کوده و فریاد زَئه:«ای داودِ پسرْ مرَه رَحم بوکون!» ⁴⁹ عیسی بِئسَه و بفرماست:«اونَ بوگوئید بأیِه اَیَ» مردم اون کورَ دخَأدد و بوگوفتد:«تی خیال جمع، ویریز ترَه دخَأنه.» ⁵⁰ بارتیمائوس درجا خو کُهنه ردایَ فیشَأد و خو جا سرِ جَه بپرست و بوشو عیسی ورجَه. ⁵¹ عیسی وَأورسه:«چی خَأیی ترِه انجام بدم؟» اون کور اونَ بوگوفت:«ای اُستاد، خَأیم ایبار دیگر بیدینم.» ⁵² عیسی اونَ بوگوفت:«بوشون کی تی ایمان تَره شفا بدَه.» اون کورْ فوری بتَأنست بیدینه و عیسی دونبال راه دکفت.